Read Saluan YESAYA 3 Bible Online

YESAYA 3 - Saluan bible

YESAYA 3

¹Memang Tumpu Anu Daka' na Kuasanyo mongalamo iwi-iwi' na palasadia'an i Yerusalem tiba i Yehuda aijo'mo au okaan ka' mule' uee. Ka' suele iwi-iwi' na mian anu nu taha'imani nu aha:

²to suludadu anu toto babani tiba tiba to sulu-suludadu biasa, to mia-mian kopian, to mia-mian anu lewa' montahi'i ka' mule' to mia-mian anu lewa' mompokinde'i,

³to sulu-suludadu anu toto tangka-tangkas na pangkatnyo, to mia-mian anu matangkas na pangkatnyo, ka' mule' anu toto pande i negara, to mia-mian anu pangatahuanon, tiba to sando-sando.

⁴Tumpu mohangkatmo to oli-olitau da timbali polaya' nu mian da'isan ka' aha mompalentahmo madi' ko ka adilannyo.

⁵Aha to mia-mian mompaha bebee'mo kasusa'an. To oli-olitau madi'mo mompajuli aha to tu'a-tu'anyo ka' mian anu kasiasi madi'mo mompajuli mian anu kaya.

⁶Tempo'nyo aijo' mian montiju'mo sala' samian na utusnyo ka' motatae hi ia, “Ola beleyum na ko baju' anu pantas opake; kalana aitu timbalimo bau polaya' mami itempo' anu sinusa'mo sumo aiya.”

⁷Panyo ia montaami, “Aku misa' sando! Aku suele madi'mo ko anu okaan ka' pakean anu opusok. Boli mae opokau na aku timbali polaya' nu bansa!”

⁸Memang Yerusalem madi'mo kino angga'nyo! Yehuda madi'mo tinala sanggo! Kalana iwi-iwi' na potatae tiba palabuatan nu aha madi'mo nontuluti Tumpu ka' madi'mo nompajuli kakuasa'an-Nyo.

⁹Kalakuan nu aha bubuulon ponsumbu'anmo palabuatan nu aha ma'i-ma'idek. Nu totonggolakonmo nuaha na mombau dosa' susumo aha mian nu Sodom naipuan mae. Silakamo na aha! Aha mosi silakaimo posi butong nu aha.

¹⁰Tumpu notatae, “Poto'i hi mian anu tulu-tulutan hi beleng-Ku, saba aha mohumpakmo kantumuu'an ma'ima' ka' salamatmo. Nu lasaimo nu aha na lawe nu pakalaja'an nu aha.

¹¹Panyo silakamo na mian anu ma'idek na kinyonyoanyo! Aha osakisamo susumo aha nonsakisamo mian sangga'at.

¹²Mian anu palesayamo hi beleng-Ku osakisamo nu mian anu lewa molio kauntungan ka' nu akalimo nu mian anu osanggohi linta' nu katano'an. Mian anu palesayamo hi beleng-Ku nu pobingungmo nu to pola-polaya' sahingga madi'mo nu sumbu' nu aha na anu obau.”

¹³Tumpu sinadiamo da po ule'mo obali'i nakaputusan hi aha mian anu palesayamo hi Ia.

¹⁴Tumpu mongulusmo susumo mian kopian hi aha to pola-polaya' nu aha mian anu palesayamo hi Ia. Sumo uuka na Tumpu nontudu aha; “Belemiumo na nontomang iwi-iwi' na isi nu ale' nu anggur; laigan nu belemiu kahomo balang anu ingagoan nu belemiu hi aha mian anu kasiasi.

¹⁵Kadaka' belemiu nonsakisamo mian anu palesayamo hi beleng-Ku ka' lewa'mo nongakali mian anu kasiasi? Aku, Tumpu Anu Matangkas na Kuasanyo ka' mule' Anu Daka' na Kuasanyo notataemo.”

¹⁶Tumpu notatae, “Buulon hondo na to bou-boune nu Yerusalem! Aha saja' honbagaya ka' saja mata kalajang ka' mule' aha lumajang saja' kotige-tige. Aha lu majang sumo anu obau-bau ka' gilinsingan na galang nu tengkenyo.

¹⁷Panyo Ku hukumo na aha; ubak nu aha saidi' mae kahomo kumahut ka' okismo.”

¹⁸Saidi' me de tempo'nyo tokamo Tumpu mongalamo to bou-boune nu aha Yerusalem haha aijo' iwi-iwi na palahiasan anu nunu kabubuulakon nu aha; saladun nu aha, galang nu tengke nu aha, olo' nu aha,

¹⁹galaang nu lima nu aha, pikukumbung nu aha,

²⁰sigut nu aha, ajimat anu opobobot i botokon tiba ikompong,

²¹sinsing nu aha tiba anting-anting nu aha anu opokait i suung.

²²Baju' anu opake ibau-bauon, anu toto ima-ima' model nu mantel nu aha, dampet nu aha,

²³baju moni-monipis nu aha, baju' lenan nu aha, salendang igogohong nu aha, tiba kukumbung manta-mantan nu aha.

²⁴Uuka aiya aha mompake minya-minya anu toto noho-nohong, saidi' mae aha mamabusikmo. Pombutu' nu aha anu ma'i-ma'ima hondo obolosimo nu kahohon anu madi' ma'ima'. Ubak nu aha anu ko bulunyo nu ubak anu ma'ima' hondo saidi' mae okiismo. Baju nu aha anu toto ima-ima' saidi mae obolosimo nu anu toho'mo lewa' pinusok nu mian. Uuka aiya aha singkap handa; saidi' mae ohup nu aha ma'idekmo kalana osapmo.

²⁵To momo'ane anu toto hoso-hoson saidi' mae silakamo i uno nu pahampatean.

²⁶Isabatan toto daka-daka' nu kota' mian humangmo ka' lewa'mo tumando' ka mule' kota' aijo' saidi' mae sumomo boune anu ilanggo'anmo anu suha-suhang i tano'.