Read Saluan YESAYA 30 Bible Online

YESAYA 30 - Saluan bible

YESAYA 30

¹Tumpu notatae, “Silakamo na to pola-polaya' nu aha Yehuda kalana aha notomuhukmo mae hi beleng-Ku. Aha nontulutimo tanga'an-tanga'an anu misa' tanga'an-Ku. Aha nontandatanganimo palajanjian anu madi' sosok tiba pongka'oho'-Ku. Sahingga tinumalatambunmo na dosa' nu aha.

²Aha nambamo i Mesir madi' pe'e nomoita mae kaputusan-Ku. Aha nomoitamo da boli opoposia na aha hi aha Mesir ka' nontaha'imanimo da nutulungi i tomundo' Mesir.

³Panyo tomundo' aijo' saidi mae madi' ahi' nompalahatikan aha ka' indi nu aha da boli opoposia na aha i Mesir madi' ahi' mingkaliangan.

⁴Maumo ahi' to mia-mian anu sinai lengkat mae i Yehuda namba i Mesir momoita da boli opoposia tinokamo ikota-kota' Zoan tiba Hanes i daerah Mesir,

⁵iwi-iwi' na mian saidi' mae jadi ma'ambang kalana nontakabunakonmo bansa anu madi' kogunanyo hi aha. Anu ihumpak nu aha misa' ahi' ka untungan kabai da tinulungan mae panyo ola ahi' da pinopo ambang mae.”

⁶Sumo uuka na potuunon nu Tumpu kona hi aha binatang-binatang anu jojoong i tano' sasu salatan, “Tomia-mian anu sinai aijo' nompaha posake'imo keledai tiba unta nu aha anu opalasenakon, lantas nololonga'mo daerah anu manjoo' hondo na anu okabuhuk kalana kajojoongan nu singa, ulo anu kobisa'nyo ka' mule' ulo anu kopolipiknyo. Palasen haha aijo' nu palasombahkon nu aha hi sa'angu' na bansa anu madi' moko ala montulungi aha.

⁷Anu pinontulungi mae nu Mesir ola pinalasuma. Kalana aijo' Mesir Ku sanggohi, ‘Ulo anu madi' mompoposi’.”

⁸Tumpu nompalentahmo aku da montulis palabuatan ma'idek nu mian anu palesayamo hi Ia isa'angu' na kitab salaku bau tanda anu madi' okolilimi sampe toka sidu-sidutu'.

⁹Kalana, aha aijo' sa'angu' na bansa anu saja' mongka'oho' motomuhuk hi Tumpu, saja' baleko', ka' madi' mongka'oho' mompotombihing pangajalan nu Tumpu.

¹⁰Aha nontaloakon hi to nabi-nabi, “Gunggumi na nganga' nu belemiu! Boli mae mompoto'i hi kami hahan anu totu'u, panyo ola ahi' apaa na anu oka'ima'i mami ohongo. Bakas da kami ola saja' mompopikilakon anu madi' mingkaliangan.

¹¹Lako'mo bolimo mamba mae hi kami, pongalamo jalan sangga'at. Bolimo mae sola' mongganggu kami tiba Tumpu Israel anu susi'.”

¹²Kalana aijo' Tumpu nu Israel anu susi' nompoto'imo sumo uuka, “Belemiu madi'mo nontalima potataeng-Ku ka' montakabunakonmo lewa monsakisa ka' mongakali.

¹³Kalana aijo' belemiu sinala'mo. Belemiu sumomo ahi' pagan mesen tangka-tangkas anu noleetmo lengkat mae aita' toka-toka akaong i aluknyo; monti-montiik ahi' belemiu motuamo.

¹⁴Belemiu mohintutumo susumo kuhon tano' anu moposo'mo ka' motatabumo, sahingga anu nohintutumo aijo' madi'mo ahi timbali opake mau ola ponsake'an mae oba aijo' itolukun kabai mau ola bau pontauk uee aijo' ibak nu uee.”

¹⁵Tumpu Anu Matangkas na Kuasanyo, Tumpu nu Israel anu susi', nompoto'imo hi mian anu palesayamo hi Ia, “Balatobatmo ka' potataap na kinyonyoa da belemiu Ku posalamat. Palesaya mae na Aku nu kinyonyoa anu madi' mimpio-pio' da belemiu Ku bee'ije kahosonan.” Panyo belemiu madi' ahi mongka'oho'!

¹⁶Ola mule' ahi' belemiu binatanga'mo nopalai da boli nu poposia nu sampobali' nu belemiu ka' nonsake'imo ajahan anu malia' hondo. Ma'ima'mo! Memang belemiu tionyo ahi' mopalaimo! Tinutugan nu belemiu au'aitu ajahan nu belemiu atina' sukupmo hondo na kolia'yo na ia mopadeka' padahan anu montotumputi mae belemiu na lebe malia'.

¹⁷Samadala na mian saidi' mae ola mopalai de montoamo samian na sampobali' montumbuhimo mae belemiu, ka' de ahamo olima' na montumbuhi mae belemiu iwi-iwi' mopalaimo. Anu sanggombu na suludadu nu belemiu me totahan sangkau na tiang nu bandela' aita' ipuge'nyo.

¹⁸Maumo ahi' sumo aijo' panyo Tumpu na me ahi' montatanda tempo'nyo, Ia mompotoamo kalibosan-Nyo hi belemiu. Ia memang mongkalibosimo belemiu. Kalana Tumpu aijo'mo na Tumpu anu mombau apa-apaa madi' hondo sala'. Mohumpak kabilahian na mian anu saja' mompasehakon kantumuu'annyo hi Ia.

¹⁹O, belemiu anu jojoong i Yerusalem, belemiu madi'mo me saja' humang. Tumpu mongkalibosimo, ka' sampamo montaami belemiu de belemiu mongkakasemo momoita tulung hi Ia.

²⁰Tumpu daagi' mombee'i tempo da osobai na belemiu nu soba'an anu maboat salaku bau pongajan belemiu. Panyo uuka aiya Ia na monsangalui belemiu sahingga o, oa'imo nu belemiu na Ia saja' ahi' atina' hi belemiu.

²¹De belemiu madi'mo montulu ijalan anu memang ahi' ojalani, aitu mae ihiku nu belemiu ohongomo na potatae-Nyo montaloakon, “Aiya ahi' mae na jalan; tuusakon na jalan aiya.”

²²Iwi-iwi na patong bapilogotan nu belemiu anu ilapisan nu salaka tiba mosoni' saidi' mae o, alinmo nu belemiu susumo duhehe ka' motatae, “Lako' pala'imo na aku!”

²³De belemiu motuganmo bine', Tumpu montudunakonmo mae ujan da bine' aijo' tumuu' da kohasinnyo ahi' anu opadak ka' molabi-labi. Ka' mule' potuu'on nu belemiu sadiamo na hemput padang anu ewa na tampatnyo.

²⁴Sapi' lakinyo tiba keledai anu mompajeko ale' nu belemiu mongototmo ototon nu potuu'on anu ma'ima' hondo anu memang pinosi potoukamo.

²⁵De tokamo isinaanyo benteng-benteng nu sampobali' nu belemiu otikumo ka' aha to mia-miannyo opateimo toto sa'angu' na bungkutnyo tiba puge'nyo mompolubatmo mae gimpangan-gimpangan nu kaunyo.

²⁶Bitu'on majingkamo mae susumo batu nu sinaa, ka' mule' batu nu sinaa lebemo majingka pimpitunmo lipat nulingkuduimo na jingkanyo bia-biasamo, sumomo ahi' jingka nu anu pitunsinaa na oposa'angu'mo. Iwi-iwi' aijo' saidi' mae jadimo de Tumpu mombobodimo ka' mompo'alinmo iwi-iwi na bela nu mian anu palesayamo hi Ia anu saja'mo ingoa'an nu aha.

²⁷Kakuasa'an tiba Tumpu talasanggo ahi' otoamo aijo' mae majo'o-jo'on. Apu tiba tibuk aijo' bau pomponyata'nyo saba' Ia notambuha'mo. Ia motataemo tiba aha ka' potatae-Nyo aijo' mompapui susumo apu.

²⁸Nu sai na mombun mamba pe'e momona susumo iaba' anu kotangkas-Nyo ungka'mo gogohong anu monganjuhakonmo sinin na apaa. Nu silakaimo iwi-iwi' na to bansa-bansa ka' madi'mo mompojadi sinin na tanga'an nu aha anu ma'idek.

²⁹Panyo belemiu mian anu palesayamo Tumpu, saidi' mae lame'mo ka' lewa'mo manyanyi susumo pihi de molame'akon agama. Belemiu saidi' mae bilahimo susumo to mia-mian lumajang mojajalan tiba mian anu mompuhi puloit mamba i Laigan nu Tumpu, anu monsangaja'i Israel.

³⁰Tumpu saidi' mae mompohongomo potatae-Nyo anu daka' hondo ka' toto samian molasaimo kuasa-Nyo anu opalias hondo. Tambuha'-Nyo saidi' mae mompotokamo mae ujan anu daka' hondo, ujan batu tiba antong anu makansang hondo.

³¹Aha mian nu Asyur tolokengkengmo de mohongomo potatae nu Tumpu ka' molasaimo hukuman-Nyo mabo-maboat.

³²Hau-haunyo aha molasaimo pondoke-Nyo, mian anu palesayamo hi Tumpu na balasanang-sanang ahi' nu musik tiba gandang ka' mule' kasapi'. Tumpu na mahampate mongewa mian nu Asyur.

³³Nai puan pe'e mae na nomposadia tampat pompapuian i tomundo' Asyur. Tampat aijo' maleeng ka' mule' bola ingisianmo kau' bau pomposuli anu pinaha potambunmo manjoo' hondo. Tumpu na saidi mae momposuli apunyo, sawo-nyo na mompuhi, pokakanamo ahi' susumo kaunyo nu belerang na kobohosnyo.