Read Saluan YESAYA 33 Bible Online

YESAYA 33 - Saluan bible

YESAYA 33

¹Silakamo na to sampo-sampobali'to! Aha mompahuhuakon maumo aha madi' opa huhuakon, ka' mombau palabuatan ma'idek maumo madi' obau apa-apaa na anu ma'idek hi aha. Panyo salatan moko pahuhuakonmo ka' mombaumo palabuatan anu ma'idek aha mule' ahi silakamo kalana sola' mompahuhuakon ka' mombau palabuatan anu ma'idek.

²O, Tumpu, kalibosiakon mae na kami. Belentomo na anu otaha'imani mami. Jagaiakon mae na kami sansina-sinaa ka' posalamatakon mae na kami de kami sakisamo.

³De Belento tuminjo'mo ka' mompohongomo mae potatae nu Belento anu susumomo gohung, saba' to bansa-bansa mopalaimo ka' mobagi-bagimo.

⁴Sumo sampahas na kihi-kihi' na mian montumbuhi aha ka' mompahuhuakon halata' nu aha.

⁵Tumpu talalo hondo susi'; Ia na mongkuasai iwi-iwi na apaa. Ia na montoongi totu-totu'u atulan tiba ka' adilan i Yerusalem

⁶ka' mombee'i ka amanan hi aha mian anu palesayamo hi Ia. Halata' anu momposalamat aha aijo'mo kapandean tiba ilimu' ka' mule' moholomati Tumpu.

⁷Aha to mia-mian anu toto babaani mahaloboo'anmo momoita tulung; to mia-mian anu mongusahakon paladamean humangmo kalana sinusa'mo hondo.

⁸Iwi-iwi' na jalan anu toto daka-daka' monsilakaimo sahingga timbalimo liing; madi'mo adagi' ko anu motulu ikiijo'. Palajanjian madi'mo oganapi ka' palasitujuan madi'mo otalima. Madi'mo daagi' ko anu opajuli.

⁹Lipu' opala'imo sahingga liingmo. Iwi-iwi' na alas nu Libanon mateekmo, ka' bangka'nyo nu Saron anu molumba' hondo sumomo padang tampat anu mateges. I Basan tiba i Bungkutnyo nu Karmel, iwi-iwi na hon nu kau' singkapmo mo hudu'.

¹⁰Tumpu notataemo i bansa aijo', “Uuka aiya Aku tuminjomo ka' mombaumo apaa pompotoan-Kumo kakuasa'an-Ku.

¹¹Tanga'an nu belemiu madi' kokaliangannyo, ka' iwi-iwi' na anu obau nu belemiu madi' kagunanyo. Beleyum motambuha' ola susumo opau anu monsilakai posi butong nu beleyum.

¹²Belemiu sumomo batu gahanggan anu opapui da bau tilon; susumo kuhat anu kohii'nyo, anu otaa'mo ka' opapuimo nu apu.

¹³Bakas da iwi-iwi' na mian anu ohani kabai anu majo'on mohongo mae palabuatan-Ku ka' mongakuimo kakuasa'an-Ku.”

¹⁴Aha to mia-mian baladosa' i Sion nu lakatmo nu nubuhak. Aha motataemo, “Kaputusan nu Tumpu sumo apu anu banyela-nyelakmo sampe toka sidu-sidutu'. Te daagi' ahi' komian anu moko ala tumuu' i uno nu apu anu mompateimo aijo?”

¹⁵Belemiu timbali moko ala tumuu' de belemiu motatae, ka' mombau anu sahondo-hondonyo. Boli molio ka untungan ka' sola' mompolugi' mian anu kasiasi, ka' boli ahi' mongala doi anu bau ponsogo' nu mian. Boli maninggalum hi aha mian anu saja' montanga'i da mompatei mian kabai palabuatan ma'idek sangga'at.

¹⁶Sahingga belemiu olindungimo ka' madi'mo ko anu mompoposia madi' sala' sumomo ahi' i uno nu benteng anu mahoson hondo. Anu okaan tiba anu o, inum memang pinosadiamo da bau bagi nu belemiu.

¹⁷Tokaje mae na tempo'nyo belemiu montoamo samian na tomundo' anu mompalentah ma'ima'mo hondo ilipu' anu kaho ko bentengnyo.

¹⁸Kahosonan nu beleyum anu ihiku hakonmo kona hi aha anu montalima pajak, anu kapangkat ka' anu montoa aha mian anu isalipu'an mae me sola' opo inau'akon.

¹⁹Belemiu madi'mo daagi' montoa aha mian anu isalipu'an mae mamadi' monsumbu' atulan ka' motatae nu basa' anu madi' osumbu' nu belemiu

²⁰Tonto'i na Sion tampat bau polame'akonanto lamean nu agama. Tonto'i na Yerusalem! Madi' hondo ko anu mompoposia na tampat aijo' bau kajojoongan sumomo ahi' kemah anu madi' toho' ilali-alin, pinontotoli madi' toho' ginautakon, ka' kahohonnyo madi' toho' nobotu'.

²¹Tumpu mompotoamo katalasanggoan-Nyo hi kita. Kita tumuu'mo isonibi nu kaunyo anu bola, kapan nu anu monsampobali' madi' moko ala talabut kiijo'.

²²Iwi-iwi' na palasadia'an nu aha kiijo' ikapan madi' kogunanyo; sinin na kadutnyo madi' opoko ala obokakon! Iwi-iwi' na kakaya'an nu suludadu anu monsampobali' kita opahuhuakontomo ka' manjoo' hondo na anu ohumpakto, sahingga mau mian anu kapi' mohumpak ahi' bagian. Tumpumo na timbali tomundo'to; Iamo na mompalentah, montoongi atulan hondo-hondo ka' momposalamatmo kita da madi' nu poposia nu anu monsampobali'mae kita.

²⁴Madi'mo daagi' ko samian anu aiya ilipu'to na motusa' kalana masakit, ka' mule' iwi-iwi' na dosa' o, ampunimo.