Read Saluan YESAYA 37 Bible Online

YESAYA 37 - Saluan bible

YESAYA 37

¹Salatan ihongomo i Tomundo' Hizkia na anu pinoto'i nu aha totolu' na mian haha aijo', binea-beaknyomo na baju'nyo ka' nompusokmo hude kalung salaku tanda sinusa'mo, lantas ia nambamo i Laigan nu Tumpu.

²Lapas aijo' ia nonsaimo i Elyakim kapala nu laigan nu tomundo', i Sebna julutulis nu negara tiba to ima-imam anu kopangkatnyo da mamba singkabot tiba i Nabi Yesaya anak i Amos. Aha suele nompusokmo hude kalung.

³Sumo uuka na potuunon mae i Hizkia anu nunu poto'i nu aha hi Yesaya, “Sinaa uuka sinaa binaladukamo; kita ohukumo ka' pinopo ambangmo. Kita sumomo ahi' boune anu kahanda'mo monganak panyo madi'mo kinokahosonan.

⁴Tomundo' nu aha Asyur nonsaimo mae suludadunyo mata-matangkas na pangkatnyo da mompopo ambang Tumpu anu tumuu'. Ihe anu monsumbu' pa' Tumpu nohongomo mae anu binau pinopo ambang nu aha aijo' ka' mohukumo aha anu nontaloakonmo mae aijo'! Kalana aijo' balado'amo hi Tumpu da nu tulungi mae na kita to mia-mian anu daagi' tutuu'.”

⁵Salatan nontalimamo potuunon lengkat mae hi Tomundo' Hizkia aijo',

⁶i Yesaya nomoto'imo hi mian anu sinai mae haha aijo' tinoka hi ia da mompoto'i hi Hizkia, “Koonyo nu Tumpu, belento tomundo' madi' timbali mabuhuk na mohongo apaa na anu pinoto'imo nu to botu-botuan itomundo' Asyur aijo' montaloakon tukoonyo Tumpu madi' moko ala mompobebas kita.

⁷Nu bauje nu Tumpu na lele anu madi' totu'u da nu palahatikan i tomundo' Asyur sahingga ia minsusule'mo iposi lipu'nyo ka' ikiijo' mae ia opateimo.”

⁸Suludadu nu Asyur mata-matangkas na pangkatnyo aijo' nohongomo lele tukoonyo nu aha tomundo'nyo nompala'imo Lakhis ka' hau-haunyomo mahampate nongewamo kota' Libna madi' majo'on lengkat ikiijo'. Sahingga nambamo na ia ikiijo' mae da singkabot tomundo'nyo aijo'.

⁹Tomundo' nu aha Asyur nohongomo lele gombuan nu suludadu nu Mesir kinapalaan mae i Tirhaka lengkat mae i Sudan tinokamo mae nontumbuhi aha. Kalana aijo' tomundo' nu aha Asyur nompakatumo sulat hi Hizkia,

¹⁰tomundo' nu aha Yehuda, sumo uuka na onyi' nu sulat aijo', “Boli o, akali nu palajanjian nu Tumpu anu nunu takabunakon aijo' au'aitu beleyum madi' ku poko ala kupatundu'.

¹¹Ihongomo nu beleyum sinin na lipu' anu tinumbuhanmo nu to tomu-tomundo' Asyur ihansunannyomo ingko-ingkot. Boli taha'iman beleyum timbali luput.

¹²Tempo'nyo mompolee'ku mae nohansunimo kota' Gozan, Haran tiba Resef ka' mule' nompateimo aha mian nu Eden anu jojoong i Telasar, madi' kosamian pe'e na pilogot nu aha haha aijo' na noko ala nomposalamat aha.

¹³Iyamo mae na to tomu-tomundo' nu kota' Hamat, Arpad, Sefarwaim, Hena tiba Iwa?”

¹⁴Tinalima i Hizkia na sulat aijo' hi aha to mia-mian anu sinai mae aijo' ka' binasa'nyomo. Lapas aijo' ia nambamo i Laigan nu Tumpu ka' nombokamo sulat aijo' hi ahop nu Tumpu

¹⁵lantas binalado'amo, ia notatae,

¹⁶ “O, Tumpu Anu Daka' na Kuasanyo, Tumpu anu mongkuasai iwi-iwi' na kalaja'an idunia aiya.

¹⁷O, Tumpu de timbali toakon mae apaa na anu jinadimo aiya hi kami. Potombihingakon mae iwi-iwi' na potatae mompopo ambang anu tinaloakonmo i Sanherib hi Belento, Tumpu anu tumuu'.

¹⁸Kami iwi-iwi' nonsumbu'mo, o, Tumpu nu to tomu-tomundo' nu aha Asyur manjoo'mo na bansa-bansa pinatean nu aha ka' mule' nohansunimo iwi-iwi na lipu' nu aha.

¹⁹Pilogot-pilogot nu aha suele pinapuanmo nu aha ka' ihansunanmo kalana pilogot haha aijo' madi' hondo-hondo balakuasa. Aha ola patong kau' na binau ka' batu anu binau nu mian.

²⁰O, Tumpu, Tumpu mami, posalamat mae na kami da madi' nu patei nu aha mian Asyur haha aijo' da iwi-iwi' na bansa idunia aiya monsumbu' saba' ola-olanyomo ahi' Belento na Tumpu.”

²¹Lapas aijo' i Yesaya nompotuunmo da oposampe hi Tomundo' Hizkia na salaku pontaami do'a i tomundo',

²²pinoto'i nu Tumpu, “Kota' Yerusalem mongkokojoimo ka' mongalumo beleyum, Sanherib!

²³Pa' sinumbu'mo nu beleyum ihe na anu lewa'mo kinaan nu beleyum ka' mule' anu pinopo ambangmo aijo'? Aku, Tumpu nu Israel, Tumpu anu susi'.

²⁴Beleyum nonsaimo tomia-mian da motatae molabi-labi tukoonyo nu aha kalana manjoo' na kareta anu bau pahampate nu beleyum, sahingga noko alamo nompatundu' iwi-iwi na bungkutnyo anu toto tangka-tangkas i Libanon.

²⁵Beleyum suele' nombuulakonmo tukooyum beleyum nongkekemo bubung ka' nonginumo uee ilipu' nu mian anu isalipu'an ka' kooyum mule' suludadu nu beleyum nompahampeja'akonmo Kaunyo nu Nil sampe no oti.

²⁶Pa' ma'isa toho' nohongo na beleyum mongkona hahan aijo' iwi-iwi' te misa' polo'mo ahi' tinangka'an-Ku salatanmo pe'e naipuan mae? Ka' tempo uuka aiya Ku baumo ahi'. Akumo aiya na nombee'i beleyum kuasa da mohansunimo iwi-iwi na kota' anu ko bentengnyo sahingga hansunmo.

²⁷Aha to mia-mian anu jojoong ikiijo' mae madi'mo daagi' moko ala batanga' mombau apa-apaa; aha tolokengkengmo ka' mabuhukmo. Aha sumomo hemput i padang kabai hemput anu tumuu' aita' ibuan nu atop anu manggasmo de nupuhimo nu mombun anu lengkat mae i sasu kabete'an anu mapanas.

²⁸Panyo Kusumbu' iwi-iwi' na ka ada'an nu butong nu belemiu. Kusumbu' apaa na anu binaumo nu belemiu ka mule' pa' moya na kalambanan nu belemiu. Ka' mule' Kusumbu' na beleyum pinusamo hondo hi beleng-Ku,

²⁹ka' ihongong-Kumo na beleyum pinusamo ka' mule' tinakabunmo atina'. Uuka aiya Ku pokaitmo na kait atina' isung nu beleyum tambang bau pontambangi nganga' nu beleyum, da beleyum Kuhela'mo osule'akonmo montulu jalan anu tinulu mae nu belemiu tempo'nyo belemiu tinoka mae aiya.”

³⁰I Yesaya nompakatu mule' potuunon aiya sumo uuka hi Hizkia, “Aiya na anu bau tanda hi beleyum. Taun aiya tiba taun anu aiya mae o, ahopi mian mongkaanmo gandum anu mosi tumuu'. Panyo lapas na aijo' aha timbalimo montugan gandum tiba mosu'an anggur ka' mule' molasaimo saidi' mae bua'nyo.

³¹Aha mian nu Yehuda anu daagi' tutuu' sanangmo na kantumuu'an nu aha susumo sosu'anon anu maleeng hondo na bakatnyo ka' saidi' mae mimbua'mo.

³²I Yerusalem tiba aita' ibungkutnyo nu Sion saidi' mae ko to mia-mianmo anu salamat kalana Tumpu Anu Daka' hondo na Kuasanyo nontantukanmo han aijo' memang tionyo ahi' jadi.

³³Aiyamo na anu titinaloakonmo nu Tumpu mongkona tomundo' nu aha Asyur: ‘Ia madi' koko minsoop i Yerusalem kabai mompana'akon pana' ikota' aijo'. To sulu-suludadu anu mintoongon nu kanta madi'mo daagi' ko anu mongohani kota' aijo', ka' ititikupnyo nu kota' aijo' madi'mo ko anu montambuni da bau pontumbuhian.

³⁴Tomundo' nu aha Asyur minsusule'mo montulu jalan anu tinulunyo mae tempo'nyo ia tinoka mae aiya madi' pilenje nompinsoopi kota' aijo'. Aku, Tumpu, notataemo.

³⁵Kota' Yerusalem Kutinjohimo ka' Kujagaimo da bau kaholomatan-Ku ka' kalana monginau' palajanjian-Ku hi posaihon-Ku i Daud’ ”.

³⁶Pihi-pihimo aijo' na malaekat nu Tumpu tinoka ibinakema'an nu Asyur ka' nompateimo 185.000 na suludadu. Dodododopnyo subu-subu bangke haha aijo' singkapmo sika-sika bandang.

³⁷Sahingga tinolosule'mo na i Sanherib, tomundo' nu aha Asyur ka' ninsusule'mo ka' ninsusule'mo i Niniwe.

³⁸Daagi' kinosansinaan hau-haunyo monsombah pilogot nu aha ilaigan nu Pilogot Nisrokh, ia pinateanmo i Adramelekh tiba i Sarezer tinabas nu aha nu bajak, aijo' aha to ana-anaknyo anu to momo ane. Lapas aijo' aha nopalaimo namba i Ararat. Sahingga i Esarhadon, anaknyo momo ane sangga'at na nombolosakon binau tomundo'.