Read Saluan YESAYA 43 Bible Online

YESAYA 43 - Saluan bible

YESAYA 43

¹O, Israel sumo uuka na koonyo nu Tumpu, “Akumo na nompotimbali ka' nontali'mo beleyum, boli mabuhuk, beleyum memang Ku posalamatmo! Aku nolagamo beleyum sinanggo na sanggo nu beleyum, beleyum Akumo na tumpu-Nyo.

²De beleyum motapmo i uee, Aku na monsangalui beleyum, beleyum madi' mule' molomos i uno nu kasansala'an-kasansala'an nu beleyum. De motulu i apu, beleyum madi' mule' motoyo', palasoba'an anu toto daka-daka' madi' mule' monsilakai beleyum.

³Kalana Akumo na Tumpu nu beleyum, Tumpu nu Israel anu susi', anu Momposalamatmo beleyum. Mesir Ku bee'mo salaku baumo pontokongi beleyum, Sudan tiba Syeba salaku baumo pombolosi beleyum.

⁴Beleyum na ko angga'nyo ahi' imatang-Ku, Aku mohalagai ka' mule' mongkalibosi ahi' beleyum; sahingga Ku bee'imo mian salaku baumo pombolosi beleyum, to bansa-bansa salaku baumo pombolosi santuu' nu beleyum.

⁵Boli mabuhuk, kalana Ku jagaimo na beleyum. Lengkat mae ikinsoban tiba lengkat mae ikabete'an. Ku palentahmo mae na mompolee' nu beleyum da tokamo mae sihuk.

⁶Ku palentahmo na utara tiba salatan, da aha sampa opolapas. Sahanyo to ana-anak nu beleyum anu to momo ane minsusule'mo, mae lengkat itano' anu majo'on, ka' to ana-anak nu beleyum anu to bou-boune minsusule'mo mae lengkat iwi-iwi na pus nu tano'.

⁷Kalana aha iwi-iwi' ilagamo i uno nu sanggong-Ku, aha pinotimbaling-Kumo da mompopodaka' Aku.”

⁸Tumpu notatae, “Palentah da mamba mae i ahop, bansang-Ku anu napisokmo, maumo ahi' ko matanyo; anu nabongonmo maumo ahi' ko bihingnyo.

⁹Palentah da iwi-iwi' na bansa sihuk mae, ka' iwi-iwi' na tulunan nu bansa silimu' mae. Ihe na pilogot nu aha haha aijo' anu nompoto'imo apaa na anu jinadimo uuka aiya? Ihe na anu aijo' hi aha nongkila-kilamo apaa na anu jadi aiya mae i ahop? Sahanyo sakisi nu aha toka mae, da mompobukuti' taalu' aha aijo' memang totu'u, da iwi-iwi' na anu nohongomo aha motatae taalu' memang ahi' sumo aijo'!

¹⁰O, mian anu palesayamo hi beleng-Ku, belemiumo na to sakisi-sakising-Ku, belemiu pinile'an-Kumo da baumo to posa-posaihon-Ku da monsumbu' mae Aku ka' mule' palesaya mae hi beleng-Ku, ka' mangalati'mo taalu' Akumo ahi' na Tumpu. Akumo na Tumpu Anu Sa'a-sa'angu'nyomo madi'mo daagi' ko sangga'atnyo mau ma'isa pe'e ko Akunyo kabai mau daagi'mo ko Akunyo aiya.

¹¹Ola-olanyomo Aku na Tumpu, madi' ko sangga'atannyo na anu momposalamat.

¹²Aku polo'mo nompoto'i hi beleyum, Akumo na momposalamat belemiu misa' tumpu nu aha anu isalipu'an mae anu atina' hi beleyum belemiumo na timbali bau to sakisi-sakising-Ku. Ka' Aku, Akumo aiya na Tumpu,

¹³sampe toka sidu-sidutu' Akumo aiya na tataap Tumpu. Madi' ko anu madi' i uno nu kakuasa'an-Ku, kabai montewa' anu tinanga'an-Kumo.”

¹⁴Tumpu na Nomposalamatmo Belemiu, Anu Susi' Israel, notataemo, “Kalana belemiu, Aku nonsaimo suludadu namba i Babel, ka' pinaha idean-Kumo na ponsupati tumban nu talungku': taligala nu aha mian nu Kasdim ingabali'-Kumo nu tando' ka' haang.

¹⁵Akumo na Tumpu nu beleyum anu susi', Tomundo' nu beleyum anu nompotimbalimo beleyum o, Israel!”

¹⁶Tumpu nombaumo sa'angu' na jalan montulu ambai, montulu uee anu ko bokonnyo.

¹⁷Ia nompalentahmo suludadu biasa tiba suludadu anu toto tangka-tangkas na pangkatnyo da mahampatemo, ka' aha nambamo notumbuhi sinumake ikareta anu nu hela' nu ajahan. Panyo aha tinombahangkangmo ka' madi'mo noko ala po ule' tinuminjo, aha sinilakamo susumo sumbu nu sulu' anu nopoho'mo.

¹⁸Tumpu notatae, “Madi'mo kogunanyo na lewa' montutugi anu ihikuhakonmo, palasuma'mo nalewa' mompo'inau'akon anu u'utu mae.

¹⁹Soba palahatikan, Aku mombaumo apaa na anu sala'je obau; uuka aiya tinampu'unanmo pa' ma'isa, o tinoa nu beleyum? Ku baumo na jalan i padang tampat anu mateges, ka' mule' kaunyo i padang tampat anu ewa.

²⁰Binatang anu ma'ela' moholomatimo Aku; serigala tiba tomonsi' unta mompuji'mo Aku, kalana Aku nompojalanmo uee i padang tampat anu mateges, ka' kaunyo i padang tampat anu ewa, da bau pompo inumi mian anu pinile'an-Kumo.

²¹Ahamo na bansa anu pinojading-Kumo da mombau anu Ku palentahkon, da timbali mombebakon anu bau pompuji' Aku.”

²²Tumpu notatae, “Panyo beleyum Israel madi'mo nonsombah Aku, ka' madi'mo tulu-tulutan hi beleng-Ku.

²³Beleyum madi'mo mae nomboa domba bau koloban nu beleyum anu opotunu, madi'mo noholomati Aku nu palasombahan nu beleyum. Padahan Aku madi' nombee'i tanggungan hi beleyum anu okolobanakon, kabai nonsusa'imo beleyum ka' nontuntutmo kamangian.

²⁴Beleyum madi'mo nongoli kamangian mano-manohong da papu mae hi beleng-Ku, madi'mo mae nompopuas Aku nu lompo' nu koloban anu okolot nu beleyum. Ola mule' ahi nombee'imo mae tanggungan Aku, nu dosa-dosa' nu belemiu, nonsusa'imo mae Aku nu kasala'an-kasala'an nu beleyum.

²⁵Panyo Aku ahi' Tumpu na nohapusmo dosa' nu beleyum, Aku mongampunimo beleyum kalana sumo aijo'mo nakinyonyoang-Ku; Aku madi'mo daagi' sola' monginau dosa' nu beleyum.

²⁶Po ingat mae hi belengku, imbo' kita mambamo hi mian kopian, kalakmo na palakala nu beleyum da nyata'mo taalu' beleyum totu'u ahi'.

²⁷Mompolee' nu beleyum anu momonanyo binaladosa'mo, to pola-polaya' nu beleyum notomuhukmo mae hi beleng-Ku.

²⁸Aha to ima-imam nu beleyum nohumimi'imo Laigan-Ku. Sahingga Israel Ku bee'mo da lewa' o, alu, lee' i Yakub Ku pojohokmo da opateimo.”