Read Saluan YESAYA 44 Bible Online

YESAYA 44 - Saluan bible

YESAYA 44

¹Tumpu notatae, “Potombihing mae o, Yakub posaihon-Ku, o, Israel mian anu pinile'an-Kumo!

²Akumo na Tumpu anu nompotimbalimo beleyum, anu nompojadimo beleyum salatanmo pe'e kiijo' ima'alum ka' anu nontulungimo beleyum. Boli mabuhuk, beleyumo na posaihon-Ku, mian anu pinile'an-Kumo ka' Ku kalibosi.

³Kalana Ku bulokakonmo mae na ujan aiya itano' anu notismo, ka' nompojalanmo kaunyo itano' anu nategesmo. Ku bee'mo na kakuasa'an-Ku hi lee' nu beleyum, ka' mombalakatimo makumpu nu beleyum.

⁴Aha molumba'mo na tumuu' susumo hemput anu tumuu' koko uee, susumo kau' gandarusa isonibi nu kaunyo.

⁵Samian ka' samian mongakuimo butongnyo Aku na tumpunyo, ka' tokamo mae maninggalum tiba lee' i Yakub. Toto samian montulismo ilimanyo: Anumo nu Tumpu, ka' monsanggohim butongnyo ninsoopmo mian nu Tumpu.”

⁶ Aiyamo na potatae nu Tumpu Anu Daka' na Kuasanyo, Tomundo' ka' anu monjagai aha Israel, “Aku Tumpu Anu Sa'a-sa'angu'nyomo, anu momonanyomo pe'e mae ka' anu saidi' mae imihinyo.

⁷Ihe na anu sumo Aku? Pokau na ia da mangakumo! Sahanyo ia mompoto'imo mae ka' mompobukuti mae hi beleng-Ku! Ihe na nongkila-kilamo apaa na anu jadi aiya mae i, ahop salatanmo pe'e momonanyo sampe toka imihinyo mae?

⁸O, bansang-Ku, boli mabuhuk kabai tolokengkeng; temisa' salatanmo pe'e naipuan mae sampe uuka aiya, Aku nongkila-kilamo apaa na anu jadi saidi' mae? Belemiumo na to saki-sakising-Ku. Madi'ko anu sangga'at na monjagai, ka' mule' madi' ko anu Kusumbu' sangga'at.”

⁹Aha to mia-mian anu lewa' mombau patong bapilogotan aijo' madi' kokaliangannyo, ka' mule' to pilo-pilogot nunu sombah nu aha aijo' madi' ahi' ko gunanyo. Aha to mia-mian anu monsombah patong aijo' napisokmo ka' madi' monsumbu' apa-apaa kalana aijo' aha saidi' mae, aha ma'ambangmo.

¹⁰Palasuma na mombau patong anu osu'an ka' mule' osombah na ia salaku pilogot!

¹¹Memang iwi-iwi' na mian anu monsombahmo patong ma'ambangmo. Aha to mia-mian anu nombaumo patong aijo' mian biasa. Pokau mae na aha hingga-hinggat tokamae; da aha saidi' mae mabuhukmo ka' mule' ma'ambangmo.

¹²Tukang besak mongala sa'angu' na logam ka' mompapui nu apu lantas nu tutukmo nu malatelu sahingga jadimo na patong aijo'. Iwi-iwi' na kahosonannyo nu pakemo mombau aijo' hau-haunyo mombau aijo' ia mo'ohopmo, megotmo, ka' malawemo.

¹³Tukang kau' mongukun kau'. Nu gambar na patong aijo' nu kapur, ka' nu bau nu pakakas ka' nu potimbalimo patong susumo mian anu ontinganan hondo lantas nu pokokomo i uno nu laigannyo.

¹⁴Ugaat kau' anu binaunyo kau' cemara, kau' eru, kabai kau' terpentin, anu tinaa'nyo mae i alas. Kabai ugaat kau' salam na sinu'annyo lantas tinanda'annyomo sampe ujan nompotumuu'mo ia.

¹⁵Sambagian na kau' aijo' ingalanyomo binau kau' anu oposun da pinjohuan ka' mule' da bau pontunuan roti ka' mule bau pontapa' ponoha' lantas sanangmo na kinyonyoanyo. Ia minjohumo ka' motataemo, “Beh, na ko ima' hondo, ka'napanasmo mae! Memang nomposanangmo mae na apu aiya!” Tuha' aijo' binaunyomo patong. Ia tinolodadupumo ka' nonsombahmo ka' ia binalado'amo, “Belentomo na tumpu allah ngku, posalamatakon mae na aku!”

¹⁸Memang ponga' ahi' na to mia-mian anu susumo aijo'! Aha nongkukubimo mata tiba kinyonyoa nu aha sahingga madi'mo daagi' nompangalati'i apa-apaa.

¹⁹Mian anu nombau patong aijo' madi'mo daagi' binapikin, “Kau' aijo' sambagian pinapuankumo, ka' obanyo pinakengkumo bau pinontunuan roti ka' mule' bau pontapa'i ponoha' da ku kaan. Lantas tuha' nu kau' aijo' ku baumo patong. Jadi uuka aiya aku monsombahmo sangkolong na kau'!”

²⁰Mian anu nombau aijo' pokakanamo nongkaan abu'. Mian aijo' pinoponga'mo nu pikilannyo pipinonga'mo sahingga ia susa'mo na daagi otulungi. Ia madi'mo daagi' moko ala mongakui saba' patong anu aijo' ilimanyo samata-mata ola ahi' mongakali.

²¹Tumpu notatae, “O, tutugi na iwi-iwi' aiya, o, Israel, kalana beleyumo na posaihon-Ku. Aku nompotimbalimo beleyum ka' mule' beleyumo na posaihon-Ku, o, Israel, Aku madi' mongkolilimi beleyum!

²²Kasala'an nu beleyum Ku laa'mo da mamba susumo kundom, dosa' nu beleyum Kusikaimo da mamba susumo sehu'. Pinsusule'mo mae hi beleng-Ku, kalana pinobebas-Kumo na beleyum!”

²³Pontaligalaimo lame-lame' o, langit pontaligalimo hoso-hoson o, anu i uno nu tano'! Pontaligalaimo lame-lame o, to bungku-bungkutnyo! ka' suele alas ka' mule toto sa'angu' na kau' anu kiijo' i alas! Kalana Tumpu nompotoamo kakuasa'an-Nyo anu daka' hondo, aijo'mo ia nomposalamatmo mian anu palesayamo hi Ia.

²⁴Sumo uuka na koonyo nu Tumpu anu Momposalamatmo beleyum anu nompotimbalimo beleyum daagi' pe'e i uno nu ma'alum, “Akumo na Tumpu anu nompotimbalimo iwi-iwi na apaa, anu nombokamo aita' langit ka'nompotimbalimo tano' mau madi' ko anu nontulungi.

²⁵ Akumo na anu madi' nompototu'u aha anu biasa sola' mongkila-kila apa na jadi saidi' mae, ka' sola'mo nombia-biangakon aha anu lewa' montahi'i. Potatae nu aha anu toto pande-pande ginagakon-Kumo, kapandean nu aha pinojading-Kumo kaponga'an.

²⁶Akumo na nompododo potatae nu posihaon-Ku, ka' nompotimbalimo apaa na anu tinanga'anmo nu anu sinaing-Kumo, Pinoto'ing-Kumo, Yerusalem po ule'mo ojojoongi nu mian, ka' iwi-iwi' na kota' i daerah Yehuda po ule'mo Ku bau; anu singkapmo na idek po ule'mo obau.

²⁷Akumo na notatae hi lananyo nu ambai: Tolotutusmo na oko! Aku kahanda'mo mongotii iwi-iwi na kaunyo nu beleyum.

²⁸ Akumo na notatae hi Kores, ‘Belentomo na saidi' mae mompalentah mian da toka mae hi beleng-Ku, ka' mombau iwi-iwi' na anu Ku kahanda'i. Palentahmo da Yerusalem po ule'mo obau, ka' Laigan nu Tumpu suele obaumo na paningkokoannyo'.’ ”