Read Saluan YESAYA 45 Bible Online

YESAYA 45 - Saluan bible

YESAYA 45

¹Tumpu nompile'imo i Kores binau tomundo'; ia tinantukanmo da mompatundu'mo to bansa-bansa, ka' mompota'alukmo kakuasa'an nu to tomu-tomundo'. Tumpu montuhe'akonmo tumban toto daka-daka' nu kota' da bau pinsoopannyo, madi'mo daagi' ko sa'angu' na madi' tontuhea'. Hi ia Tumpu motataemo,

²“Aku montoukaimo jalan da bau kajalanan nu beleyum; bungkutnyo tibaa puge'nyo Ku pohatamo, iwi-iwi' na tumban tambaga Ku paha biha'mo, ka' ponsupatinyo anu besak na binau Ku pato'imo.

³Sahingga beleyum Ku bee'imo halata', anu sulu-suluk, da nu sumbu' nu beleyum saba' Akumo na Tumpu, Tumpu Israel, anu nolagamo beleyum, sinanggo na sanggo nu beleyum.

⁴Beleyum ilagang-Kumo ka' binee'an-Kumo pangkat, maumo ahi' beleyum madi' nonsumbu' Aku. Binee'an-Kumo pakalaja'an na beleyum da montulungimo Israel posaihon-Ku, kalana aha bansa anu pinile'an-Kumo.

⁵Akumo na Tumpu madi'mo daagi' kosangga'atannyo, Akumo na Tumpu anu Sa'a-sa'angu'nyomo Beleyum binee'an-Kumo toongon, maumo ahi' beleyum madi' monsumbu' Aku.

⁶Iwi-iwi' aijo' binaung-Kumo da lengkat mae i kabete'an toka-toka i kinsoban iwi-iwi' na mian monsumbu'mo taalu' Akumo ahi' na Tumpu madi' ko Tumpu sangga'at, olanyomo ahi' Aku.

⁷Akumo na nompotimbali jingka tiba pintung, Aku na mompotoka mae balakat tiba balaa'. Akumo na Tumpu nonombaumo iwi-iwi' aijo'.

⁸Lengkat mae ilangit tinau'akon-Kumo na ka'untungan mahampate susumo ujan, tano' binalabukamo da montalimamo ia, lantas nompotumuu'mo kasalamatan tiba kabebasan; Akumo na Tumpu anu nombaumo aijo' sahingga jinadimo.”

⁹ Silakamo na mian anu painggaga tiba anu Nompotimbali ia; ia pokakanamo sumo kuhon tano' anu madi' tulut hi mian anu nombau ia. Pa' toho' mule' tano' ponto nompokilawa hi anu nombaumo kuhon tano', “Apaa na kalaja nu beleyum atina'?” Pa' toho' mule' kuhon tano' motusa'tukoonyo anu nombaumo ia madi' pande?

¹⁰Silakamo na mian anu motatae, hi tuuma tiba hi tinanyo, “Kadaka' aku pinohampemo susumo aiya na ka ada'anku?”

¹¹Tumpu, Tumpu nu Israel anu susi' notataemo, “Pokilawa mae hi belengku apaa na anu jadi aiya mae i ahop. Panyo boli mae mompokilawa pa' mosia na to ana-anak-Ku, kabai mompokaumo mae Aku da mombaumo apa-apaa.

¹²Akumo na Tumpu anu nompotimbalimo dunia aiya, ka' mule' nompotimbalimo mian da monjojoongi. Tiba kakuasa'an-Ku, Aku nombokamo langit ka' nompalentahmo batu nu sinaa, bitu'on tiba to manda-mandala'.

¹³Akumo na nompotuka hi Kores da obaumo na anu kinahanda'an-Kumo ka' mule' montoongimo hondo-hondo ka adilan. Ku pohatamo na jalan iwi-iwi' anu nu tului. Ia po ule'mo mombau kota'-Ku Yerusalem ka' mompobebasmo mian anu palesayamo hi beleng-Ku aijo'mo aha anu ihakop ka' binoamo madi' pinai tamboan ka' madi' pinai bayan.” Tumpu Anu Daka' na Kuasanyo notataemo.

¹⁴Tumpu notataemo hi Israel, “Alamo na hasin nu tano' Mesir tiba kauntungan nu aha Sudan. Aha to mia-mian nu Syeba anu toto hoso-hoson, belemiumo, na tumpunyo; aha lumajang aitu mae ihiku nu belemiu hau-haunyo pinungumo nu lante' besak. Aha tolodadupumo ka' mongakuimo, ‘Tumpu totu-totu'u daagi' ko anu atina' hi belemiu; madi' ko tumpu sanga'at ola ahi' Ia aijo'!

¹⁵Tumpu nonomposalamatmo Israel aijo'mo na Tumpu nonomposulukmo butong-Nyo.

¹⁶Iwi-iwi' na mian anu nombaumo patong nu pilogot; opopo'ambangmo ka' o'alumo.

¹⁷Panyo Israel nuposalamatmo nu Tumpu; kasalamatannyo madi' ola sasaingoni'. Belemiu madi'mo opopo ambang ka' o'alu sampe toka sidu-sidutu'.’ ”

¹⁸Tumpu na nompotimbali langit, Lamo ia Tumpu! Lamo ia nompotimbali ka' mule' nontali' dunia aiya, binaumo hoso-hoson ka' tataap satinjonyo. Ia madi' nompotimbali tampat anu liing hondo, panyo tampat da bau kajojoongan. Lamo ia notatae, “Akumo na Tumpu ka' madi'mo kosangga'atannyo.

¹⁹Aku motatae madi' oposuluk, kabai opohowini. Aku madi' mompokau mian anu palesayamo hi beleng-Ku, Israel molio Aku ola palasuma. Aku, Tumpu, na nontaloakon han anu totu'u, ka' nompoto'imo apaa na anu madi'sala'.”

²⁰Tumpu notatae, “Sihukmo ka' tokamo mae hingga-hinggat, belemiu iwi-iwi' anu madi' pinatean nu to bansa-bansa! Ponga' ahi' na to mia-mian anu molondakon patong kau' ka' balado'amo hi to pilo-pilogot anu madi' moko ala momposalamat.

²¹Kalak mae na palakala nu beleyum ka' poto'i mae na bukuti'nyo iwi-iwi', sampamo ahi' na aha basale' hingga-hinggat. Ihe na nompolelemo han aijo' ka' nompoto'imo salatanmo pe'e naipuan mae? Temisa' Aku ahi', na Tumpu? Madi' ko tumpu sangga'at, olanyomo ahi' Aku. Akumo na Tumpu anu adin ka' anu Momposalamat, madi'mo daagi' kosangga'atannyo, olanyomo ahi' Aku!

²²O, iwi-iwi' na anu jojoong i dunia, po ule' mae toka hi beleng-Ku da belemiu oposalamat, kalana olanyomo Aku na Tumpu madi'mo daagi' kosangga'atannyo!

²³ Aku binalajanji'mo ka' janji'-Ku aijo' madi'mo mongabali'; posi Akumo ahi' na binasumpa'; Toto samian saidi' mae tolodadupumo i ahop-Ku, ka' posi basa'nyomo na ia balajanji' tulu-tulutanmo hi beleng-Ku.

²⁴To mia-mian saidi' mae montaloakonmo, ‘Ka'adilan tiba kahosonan samata-mata lengkat mae hi Tumpu!’ Iwi-iwi' na mian anu nongka'idekimo Aku, tokamo mae hi beleng-Ku ka' ma'ambangmo.

²⁵Panyo lee' mae i Yakub saidi' mae oposalamatmo, ka' aha mompuji'mo mae Aku, Tumpu.