Read Saluan YESAYA 49 Bible Online

YESAYA 49 - Saluan bible

YESAYA 49

¹ Potombihing mae na aku, o, lipu' anu toto jo'o-jo'on opalahatikan na potataengku. Tumpu nolagamo aku ma'isa pe'e aku pinohampe, Ia nompile'imo aku daagi' pe'e i uno nu ma'alum.

² Ia nompotajomo potataengku susumo bajak, Ia nonjagaimo aku nu posi lima-Nyo. Ia nompotimbalimo aku susumo hihis nu pana' anu binoitmo, ka' pino isimo i uno nu bulu'nyo da me bapake-pake.

³Pinoto'i-Nyo hi belengku, “Beleyumo na posaihon-Ku; Aku saidi' mae oholomati kalana beleyum.”

⁴Panyo tinaloakonkumo, “Lawengku ola ahi' palasuma; madi' kino kaliangannyo na aku nongingkoti kahosonanku!” Panyo maumo ahi' sumo aijo', aku palesaya ahi' totu-totu'u saba' Tumpu montoakon mae ahi' haku. Tumpu mombalosi mae aku pokakana tiba palabuatanku.

⁵Ma'isa pe'e aku ihampe, ilagamo nu Tumpu da timbalimo posaihon-Nyo, da momposihukmo aha mian nu Israel, da aha po ule'mo mae toka hi bele-Nyo. Tumpu nompojadimo aku da iholomatan Tumpu aijo'mo na bau kahosonanku.

⁶ Tumpu notataemo hi belengku, “Pakalaja'an anu lebe daka' hondo montanda'imo beleyum, o, posaihon-Ku; beleyum misa' ola monsule'akon mae tuha' nu lee' i Yakub, ka' mompo ule' mompojadi kaholomatan nu to tulu-tulunan nu bansa Israel, panyo Ku pojadimo mule' ahi' jingka nu to bansa-bansa, da songko-songko na dunia oposalamatmo.”

⁷Tumpu anu susi' anu Momposalamatmo Israel notataemo hi mian anu talalo hondo saja' o, alu, ka' anu oka'ideki nu to bansa-bansa ka' mule' binaumo posaihon nu to mia-mian anu balakuasa, “To tomu-tomundo' montoamo saidi' mae palabuatan-Ku; aha saidi' mae moholomatimo Aku. To mia-mian anu balakuasa saidi' mae suele montoamo ahi' lantas tolodadupumo monsombah.” Han aijo' bisa jadi' kalana Tumpu nompile'imo posaihin-Nyo; Tumpu nu Israel anu susi' madi' mongkolilimi palajanjian-Nyo.

⁸ Tumpu notataemo hi mian anu palesayamo hi Ia, “De Aku situjumo, Aku montaamimo; de tokamo isinaanyo nu Aku momposalamatmo, Aku montulungimo belemiu. Belemiu Ku lindungimo ka' Kujagaimo, ka' Ku potimbalimo palajanjian hi to bansa-bansa. Po ule'mo Ku bau na lipu' anu iliingmo hondo timbalimo tano' pusaka' anu ojojoongimo.

⁹Mian anu tinalungku'mo Ku palentahmo da mosabat; anu daagi' itampat anu pikat Ku boamo itampat anu majingka. Ka' mule' ipuge'nyo anu madi' ko anu montumuu'i, aha madi' kakulangan, tutus jalan daagi ko anu okaan.

¹⁰ Aha madi'mo megot ka' mo'ohop, ka' madi'mo nu kona nu singit ipadang tampat anu mateges. Kalana Tumpu mongkalibosimo aha ka' mompotiju'mo aha, ka' montaka'mo mamba i mata nu uee.

¹¹Aku mombaumo jalan montulu bungkutnyo iwi-iwi' na jalan anu bau kajalanan-Ku, Ku pohatamo.

¹²Lengkat mae ilipu' anu majo'on singkapmo mae toka na mian anu palesayamo hi beleng-Ku, lengkat mae isasu utara, ka' mule' isasu kinsoban ka' mule' Sinim anu isasu salatan.”

¹³Panyanyimo o, langit, pontaligalaimo o, tano' o, to bungku-bungkutnyo, pontaligalaimo lame-lame'! Kalana Tumpu tokamo mae mohase mian anu palesayamo hi Ia, Ia mongkalibosimo mian anu palesayamo hi Ia, anu sinansalamo.

¹⁴Panyo mian anu jojoong i Yerusalem notataemo, “Tumpu nompala'imo kita, Tumpunto nongkolilimimo kita.”

¹⁵Tumpu nontaamimo mae, Ia notatae, “Tetoho' mule' samian na tina nu anak mongkolilimi anaknyo, ka' madi'mo mongkalibosi anak anu kinandungnyomo? Maumo ahi' ia na mongkolilimimo, panyo Aku na madi' ahi' mongkolilimi beleyum!

¹⁶O, Yerusalem, Aku saja' monginau' beleyum; sanggo nu beleyum tinulis-Kumo ipala nu limang-Ku.

¹⁷Aha to mia-mian anu po ule'mo mombau beleyum malia'mo toka, ka' anu nohansunimo beleyum saidi' mae mambamo.

¹⁸Tonto'i ka' toa titikup atina' hi beleyum, layat nu beleyum sinihukmo ka' tinokamo mae hi beleyum. Aku, Tumpu anu tumuu', Aku notataemo, memang, beleyum sanangmo na kinyonyoa, kalana mian anu jojoong hi beleyum sumomo ahi' panganten boune sanangmo kalana pinakeanmo palahiasan.

¹⁹Lipu' nu beleyum anu kinunmo ka' iliingmo hondo uuka aiya binunsokmo hondo hi aha to mia-mian anu kahanda' monjojoongi. Ka' aha to mia-mian anu kahanda'mo mompatei beleyum, nambamo jo'o-jo'on nompala'i beleyum.

²⁰To ana-anak anu ihampe mae ilipu' nu mian saidi' mae motataeje hi beleyum, ‘Lipu' aiya bunsok ahi' hondo hi belengku bee'i mae tampat da aku timbali jojoong i aiya.’

²¹Sahingga beleyum motataemo i uno nu kinyonyoa ‘Ihe na nompohampe anak haha aiya hi belengku? Te misa' nolapusmo ahi' na to ana-anaku, ka' madi'mo ahi' daagi' mompohampe? Aku binoamo ka' pinojoongmo kiijo' mae ka' ingalinmo, ka' pinala'ianmo me ahi' sausa'. Jadi lengkat mae iya na anak haha aiya ka' ihe na nompidaka'i aha?’ ”

²²Tumpu Anu Matangkas na Kuasanyo notataemo hi mian anu palesayamo hi Ia, “Aku saidi' mae mombee'ije tanda hi aha to bansa-bansa, ka' aha monsule'akonje to ana-anak nu beleyum; to ana-anak nu beleyum anu to momo ane saidi' mae otangkungmo, ka' mule' to ana-anak nu beleyum anu to bou-boune osombungmo ibekoang.

²³To tomu-tomundo' saidi' mae sumomo ahi' tuuma nu beleyum ka' to tomu-tomundo' boune sumomo ahi' posi tina. Aha saidi' mae tolodadupumo moholomati beleyum ka' mati'alukmo hi beleyum. Sahingga nu sumbu'je nu beleyum taalu' Akumo ahi' na Tumpu; miana nu montaha'imani Aku madi' mule' mompele-pele'.”

²⁴Belemiu mompokilawamo, “Tetoho' mule' balang anu pinahuhuakon ingagoan hi lima nu talenga', kabai mian anu ihakop ingala aijo' totoong hi lima nu mian anu singgi?”

²⁵Tinaamanmo nu Tumpu, “Aijo'mo na saidi' mae jadi. Mian anu ihakop nu to tale-talenga' po ule'mo o, agoi. Balang anu nu mian singgi po ule'mo opahuhuakon. Kalana Akumo na mongewa sampobali' nu beleyum; Ku posalamatmo na to ana-anak nu beleyum.

²⁶Ku potimbalimo na sampobali' nu beleyum da mangoa i baso', sahingga aha mompaha pate-pateimo. Jadi iwi-iwi' na manusia saidi' mae monsumbu'mo, taalu' Akumo ahi', na Tumpu Anu momposalamat beleyum; Anu Mahoson hondo, Tumpu i Yakub Anu nontobusmo beleyum.”