Read Saluan YESAYA 52 Bible Online

YESAYA 52 - Saluan bible

YESAYA 52

¹ Pobulamo o, Yerusalem, pobulamo! Pohoson na kinyonyoa nu beleyum! Pusokmo na baju' pesalin nu beleyum! O, Yerusalem, kota' anu susi', mian anu mahumimi' madi'mo daagi' minsoop i sabatan daka' nu belemiu.

²Tinjomo lengkat mae atina' i abu' o Yerusalem, sapui na abu' anu natikampitmo i butong nu beleyum. Bukai na lante' anu atina' sego-segot i gogohong, nu beleyum. O, mian anu jojoong i Sion anu i hakopmo!

³Tumpu notataemo hi mian anu palesayamo hi Ia, “Belemiu pinobalukmo madi' kino pombayannyo, jadi uuka aiya belemiu pinobebasmo suele madi' kino pombayannyo.

⁴U'utu mae belemiu nambamo i Mesir ka' jinojoongmo i kiijo' mae susumo mian anu i salipu'an. Lantas Asyur nompalentahmo belemiu talalo ahi' pinoko ideknyo mau madi' kosababnyo.

⁵ Uuka aiya apaa na ulusan-Ku i aiya? Mian nu Babel nohakopmo belemiu mau madi' kokasala'an. Aha anu nonsansalamo belemiu tinakabunmo ka' saja'mo nongalu Aku.

⁶Kalana aijo' belemiu tionyo ahi' mongakuimo saba' Akumo na Tumpu ka' tempo' aitu detokamo, belemiu monsumbu'je taalu' akumo na notatae hi belemiu.”

⁷ Talalo hondo sanang na montoa katokaan nu mian anu sinai mae; ia lumajang notulu i bungkutnyo ka' nomboa lele ma'ima', lele anu moko bilahi kantumuu'an, lele kasalamatan hi aha Sion; koonyo, “Tumpu nu beleyum Tomundo!”

⁸Hongo pe'e na ais kalana i lame'mo na anu topo jagai kota', aha lewa'mo nontaligalai hingga-hinggat! Kalana posi mata nu aha na nontoamo Tumpu poule'mo ninsusule'mo namba i Sion.

⁹Pontaligalaimo lame-lame' o, anu singkapmo ihansun i Yerusalem, kalana Tumpu mohase'mo mian anu palesayamo hi Ia ka' mompobebasmo Yerusalem.

¹⁰Tumpu mompotoamo kakuasa'an-Nyo, i ahop nu mata iwi-iwi' na bansa. Sahingga songko-songko na dunia timbalimo monsakisi'i kasalamatan anu lengkat mae hi Tumpunto.

¹¹ Lako'mo! Pala'imo na kota' Babel, O, belemiu anu nomboamo pakakas nu Laigan nu Tumpu! Boli monsintung balang anu maheyu; posusi'mo pe'e na butong nu beleyum ma'isa pe'e mamba.

¹²Belemiu madi' ko sia-sia' na mamba, ka' misa' susumo mian anu mompalaimo. Kalana Tumpu na montaka belemiu; Tumpu Israel na monjagai belemiu maumo pa' iya mae na tampat.

¹³Tumpu notatae, “Memang, posaihon-Ku usahanyo nu humpak; ia opuji-puji'mo ka' oholomatimo.

¹⁴Naipuan mae manjoo' na mian tinolokengkengmo na montoa ia, butongnyo ingideanmo sahingga madi'mo daagi' susumo mian.

¹⁵ Panyo uuka aiya manjoo' na bansa nongkabangangimo, to tomu-tomundo' madi'mo noko ala notatae kalana binangangmo. Aha saidi' mae montoaje ka' mangalati'mo apaa na anu momonanyo mae ma'isa ahi' sinumbu' nu aha.”