Read Saluan YESAYA 56 Bible Online

YESAYA 56 - Saluan bible

YESAYA 56

¹Tumpu notatae hi mian anu palesayamo hi Ia, “Baumo apaa na anu adin ka' anu situju hi atulan-Ku. Kalana madi'mo daagi' pin Aku tokamo mae momposalamat belemiu ka' ka'adinan-Ku oponyata'mo.

²Ku balakatimo na mian anu toka i sinaa nu Sabat ka' madi' mohumimi'i sinaa aijo'. Mian anu madi' mombau palabuatan ma'idek, ku kalesangmo ima-ima'.”

³Mian anu isalipu'an mae mogalumo tiba mian anu palesayamo hi Tumpu madi' timbali motatae, “Tumpu madi' mompoloas aku monsombah Ia hingga-hinggat tiba mian anu palesayamo hi Ia.” Miana nu tinoku'imo madi' timbali bapikin “Aku madi'mo timbali sangalu nu mian anu palesayamo hi Tumpu, kalana aku madi' timbali mohumpak lee'.”

⁴Tumpu notatae hi aha, “De belemiu mompahatikan sinaa nu Sabat, de belemiu tulu-tulutan ahi' i palajanjian-Ku ka' mombau apaa na anu moko sanang kinyonyoang-Ku,

⁵saba' sanggo nu belemiu madi' okolilimi i uno nu Laigan-Ku, ka' mule' hi aha bansang-Ku. Aijo' na lebe ma'ima' nalingkudui na mohumpak anak to momo'ane ka' to bou-boune. Belemiu ku bee'imo sanggo sidu-sidutu', anu madi'mo okolilimi.”

⁶Tumpu notatae hi mian anu isalipu'an mae, anu ninsoopmo lekengan nu mian anu palesayamo hi Tumpu, anu mongka'ima'imo Tumpu ka' saja' monsombah Ia, anu mongangga'i sinaa nu Sabat, ka' tulu-tulutan hi palajanjian-Nyo,

⁷ “Belemiu Ku boamo mamba i Sion i bungkutnyo anu susi' anu Aku na tumpunyo ka' Ku bee'imo kalame'an i laigan-Ku ponso-ponsoban Aku. Koloban iwi-iwi' anu osombahkon nu belemiu i mezbah-ngKu, Ku talimamo. Laiganku osanggohimo laigan balado'an nu iwi-iwi' na bansa.”

⁸Sumo uukamo na potatae nu Tumpu Anu Matangkas na Kuasanyo anu nolaya'mo Israel ninsusule' mae lengkat i tampat pinompojongan aha, “Aku momboamo aha to mia-mian sangga'at da mogalumo hi aha anu sinuhukmo mae.”

⁹Tumpu nompokaumo to bansa-bansa anu isalipu'an mae da toka susumo binatang anu mahangas da monsilakaimo miannyo anu palesayamo hi Ia.

¹⁰Koonyo nu Tumpu, “To pola-polaya' nu bansang-Ku atina'mo na to mia-mian anu mapisok! Aha madi' monsumbu' apa-apaa. Aha susumo dedeng anu momo' anu madi' mohu'akon panyo ola ahi' hoyot ka' mongipi. Sanang hondo na aha hoyot!

¹¹Aha susumo ahi' dedeng anu majoko' anu madi' toho' mobosu. To pola-polaya' haha aijo' madi' mangalati'. Toto samian mombau apaa na anu nu kai' ma'i nu aha ka' molio posi ka'untungan nu aha.

¹²Anu topo palangu haha aijo' notatae, ‘Imbo' da kita monginum anggur ka' monginum sampe ma'osa! Dodop na lebe' mule' ma'ima' nulingkudui na sinaa uuka aiya!’ ”