Read Saluan YESAYA 59 Bible Online

YESAYA 59 - Saluan bible

YESAYA 59

¹Boli monsangka Tumpu madi' moko ala momposalamat belemiu kabai matikobongonmo na mohongo potatae nu belemiu.

²Kalana palabuatan ma'i-ma'idek nu belemiu sahingga Ia madi'mo ahi' mohongo belemiu balado'a hi Ia. Dosa' nu belemiu haha atina' na mongga'at belemiu hi Tumpu.

³Belemiu sinala'mo kalana binaleko'mo ka' mule' nombaumo anu madi' totu'u kalana talalomo ahi' sininggi ka' sola'mo nompatei mian.

⁴Belemiu mongkalak palakala madi' ko sababnyo apa-apaa ka' momputusi palakala madi' adin. Belemiu baleko' ka' montakabunakon anu madi' kogunanyo; belemiu ko tanga'an monsilakai mian sangga'at ka' mombau anu ma'idek.

⁵Tanga'an nu belemiu haha aijo' anu ma'idek monsaduakonmo kasilaka'an susumo nggalau' nu ulo anu ko bisa'nyo. De nggalau' aijo' otitigi'mo lubatmo mae na ulonyo. Tanga'an aijo' madi' hondo kogunanyo hi belemiu sumomo hude loa' na tinonun.

⁷ Belemiu saja' balatanga' mombau anu ma'idek ka' gagalan sampa obau. Madi' bata-bata na belemiu mompatei mian anu madi' ko sala'nyo. Mau moya na belemiu mamba, belemiu mompala'i anu singkapmo ma'idek tiba kasilaka'an.

⁸Belemiu madi'mo nongusahakon da dame, ka' iwi-iwi' na palabuatan nu belemiu madi' adin. Jalan nu belemiu minggeo-geo' ka' mian anu mombatuki jalan aijo' madi' sanang.

⁹Bansa aijo' notataemo hi Tumpu, “Uuka aiya sinubu'mo mami kadaka' Belento madi' nomposalamat mae kami da madi'mo nu sakisa nu to mia-mian anu nongkabisa'imo mae kami. Kami montanda'imo jingka, panyo anu daagi' ola kapintungan.

¹⁰Kami mahakanyangan susumo mian anu mapisok; sonsu-sonsu'un kami tinosumpunmo mimbalu-balu'mo tonga' pahu; itotonga' nu mian tumuu', kami sumomo mian anu natemo.

¹¹Kami nabuhukmo ka' sinusa'mo; kami molio ka'adilan, panyo imadi'an; kami montaha'imani kasalamatan, panyo ola ahi' pinalasuma.

¹²Manjoo' hondo na palabuatan ma'idek mami hi Belento; dosa' mami haha aiya nomposala'mo kami. Kami totu-totu'unyo mongakuimo palabuatan mami anu ma'idek, ka' nonsumbu'mo dosa-dosa' mami.

¹³Kami madi'mo nohongo ka' pinusamo hi Tumpu, ka' madi'mo mongka'oho' mombatuki Tumpu mami. Kami lewa'mo nonsakisa mian sangga'at ka' madi'mo nombatuki atulan, pikilan mami sinala'mo ka' potatae mami binaleko'mo.

¹⁴Hukuman anu adin madi'mo i hongo, ka' ka'adilan najo'onmo, Kahondoan madi'mo tinapalan i tampa-tampat nu mian da'isan, ka' kinyonyoa anu madi' tageo' inguna'mo i sambiha'nyo.

¹⁵Madi'mo ko mian anu hodi' na kinyonyoanyo, ka' ihe na anu mati kojo'onmo ipalabuatan ma'idek, posi ia na montanggungi palabuatan anu ma'idek.” Tinoamo nu Tumpu, ka' madi' sanang na Ia, taalu' madi'mo daagi' ko ka'adilan.

¹⁶ Ia binangangmo kalana madi'mo ko anu tinolo aiha' ka' madi'mo ko anu nonsangaja'i. Sahingga nosi alamo kuasa-Nyo na Ia da momposalamatmo ka' mombee'imo aha kamenangan.

¹⁷ Ia nompake ka'adilan ka' kasalamatan, salaku baju' besak ka' songko' anu ko aja'nyo. Ia ko kahanda' mompokopiani kaadaan ka' mombalosi anu madi' adin.

¹⁸Ia mombalosimo aha to sampo-sampo bali'-Nyo sitimbang tiba palabuatan nu aha. Ka' mule' to bansa-bansa i togong anu toto jo'o-jo'on madi' ahi' bebas ihukuman-Nyo.

¹⁹Kuasa tiba kaholomatan-Nyo nukabuhuk nu mian iwi-iwi' lengkat mae i kabete'an toka-toka i kinsoban. Ia toka mae mimbalu-balu' kaunyo anu mabohos, anu kinembongmo mae nu baleba' anu makansang hondo.

²⁰ Tumpu notataemo hi mian anu palesayamo hi Ia, “Aku tokaje mae i Yerusalem da momposalamat belemiu iwi-iwi' anu binala tobatmo i dosa' nu belemiu haha atina'.

²¹Aku mombaumo palajanjian tiba belemiu: Kuasang-Ku Kubee'mo hi belemiu ka' ajalan-Ku sampe toka sidu-sidutu'. Ajanakon hi to ana-anak nu belemiu da aha mongajanakon suele i tulunan uuka aiya sampe toka sidu-sidutu'.”