Read Saluan YESAYA 6 Bible Online

YESAYA 6 - Saluan bible

YESAYA 6

¹ Kinakona itaun kikinasilakaanmo i Tomundo' Uzia aku nontoamo Tumpu. Ia suha-suhang ikadela-Nyo tangka-tangkas ka' anu oholomati. Juba'-Nyo monsalingkukubi songko-songko na Laigan nu Tumpu.

²Titikub hi Ia paha-paha tinjo na to mala-malaekat ka' moak susumo apu, totosamian anom na polipiknyo. Ohua' na polipiknyo mongkukubi ohupnyo, ohua' mongkukubi butongnyo ka' anu ohua' mule' nu pake bau polahapnyo.

³ Aha motatae daka-daka' hi samian toka hi samian: “Susi', susi', susi'. Susi' na Tumpu Anu Daka' na Kuasanyo. Ia anu talasanggo Nu songkohi na dunia aiya.”

⁴ Potatae nu aha timbali monggau' paningkokoan nu Laigan nu Tumpu ka' mule' Laigan nu Tumpu aijo' kaho tibuk.

⁵Lantas aku notataemo, “Silakamo! Madi'mo daagi ko anu ku taha'imani kalana nganga'ku nahenyumo nu dosa' ka' aku jojoong hi aha bansa anu suele susumo aijo'mo. Maumo sumo aijo' posi matangkumo na nontoa Tomundo', aijo'mo Tumpu Anu Daka' na Kuasanyo!”

⁶Lapas aijo' sala'samian na malaekat haha aijo' ilumahapmo mae no uuka hi belengku nomboa mae obaa anu ingalanyo mae nu ponsapit aijo' i mezbah.

⁷Sinintungnyo na biwingku nu obaa ai-aijo' ka' notatae, “Biwi aiya nonsintungmo biwi nu beleyum. Uuka aiya kasala'an nu beleyum ingalinanmo ka' mule' dosa' nu beleyum ingampunanmo nu Tumpu.”

⁸Lantas ihongongkumo na potatae nu Tumpu nompoto'i, “Ihe na Kusai? Ihe na momboa lele lengkat aiya hi kita?” Tinaamankumo, “Aiya na aku. Saimo mae na aku!”

⁹Lantas sinai-Nyomo na aku da mamba momboa potuunon aiya hi aha mian: “Belemiu saja' sahongo-hongonyo panyo madi' mangalati'. Belemiu sapala-palahatikannyo panyo madi' osumbu' nu belemiu pa' apaa na anu saidi' mae jadi.”

¹⁰Lantas notataemo mae na Ia hi belengku, “Popikokakon na pikilan nu mian haha aijo', pobongonakon na bihingnyo ka' mule' popisokakon na matanyo da aha madi'mo montoa-toa, madi'mo mohongo-hongo kabai madi'mo mangalati' lantas po ule'mo toka mae hi beleng-Ku ka' ma'alinmo.”

¹¹Aku nompokilawamo, “Sampe tokaje hi pian na kopinnyo na anu susumo aiya saja' jadi, o, Tumpu?” Tinaaman-Nyo mae, “Sampeje iwi-iwi na kota' hansunmo ka' madi'mo ko anu monjojoongi, iwi-iwi' na laigan madi'mo ko anu monjojoongi ka' mule' tano' madi'mo ko apa-apaanyo ka' mategesmo.

¹²Miannyo anu jojoong ikota' haha aijo' Ku laa'mo da mambamo itampat anu majo'on sahingga songko-songko na tano' liingmo totu-totu'u.

¹³Pakalaus de daagi' ko anu aha sampulu' na mian lantas samian na daagi' jojoong ilipu' aijo' ia suelemo ahi' opatei. Panyo susumo kau' nunuk de otaa'mo daagi' ahi' ko tu'onyo sumo aijo' mule' daagi' ahi' ko tuha'nyo na bansa aijo' anu saidi' mae pomulaian mian anu susi'mo.”