Read Saluan YESAYA 60 Bible Online

YESAYA 60 - Saluan bible

YESAYA 60

¹Tinjomo ka' timbalimo jingka, o Yerusalem, kalana jingka kasalamatan nu beleyum tinokamo; Tumpu monjingkaimo belemiu nu Kuasa-Nyo.

²Dunia sinongkohanmo nu pikat to bansa-bansa sinaputmo nu pintung panyo jingka nu Tumpu binete'mo atina' hi belemiu; sahaya nu kinahampean-Nyo onyata'mo atina' hi belemiu.

³To bansa-bansa mojonjulumo mae toka i jingka nu belemiu to tomu-tomundo kino kinyonyoamo i sahaya anu binete'mo atina' hi belemiu.

⁴Soba toa apaa na anu jinadimo atina' songko-songko hi belemiu; mian da'isan nosa'angu'mo da minsusule'mo hi belemiu. To ana-anak nu belemiu to momo'ane tinokamo lengkat mae itano' majo'on, to ana-anak boune nu belemiu otangkungmo mae.

⁵Belemiu nontoa aijo', bangangmo ka' ohup nu beleyum lame'mo; beleyum sanangmo na kinyonyoa bilahimo. Halata' nu to bansa-bansa oboamo hi belemiu, kakaya'an anu lengkat mae i santoa nu ambai manjoo'mo atina' hi belemiu.

⁶Lipu' nu belemiu nu sihukimo nu unta manjoo' hondo aha nolengkat mae i Midian ka' Efa. Mian momboa ame mosoni' tiba kamangian lengkat mae i Syeba, lantas mompuji'mo palabuatan nu Tumpu.

⁷Mee', domba nu Kedar oboamo mae hi belemiu domba lakinyo lengkat mae i Nebayot pinosadiamo da okolobanakon nu belemiu. Koloban aijo' momposanang kinyonyoa nu Tumpu Ia nompokopiani ma'i-ma'ima' Laigan-Nyo anu o'angga'i.

⁸Te apaa na aijo' anu i lumahapmo susumo kundom susumo malapati' anu hau-haunyo lumahap mobalikmo?

⁹Aijo'mo na to kapa-kapan anu tokamae balabu momboa mae mian anu palesayamo hi Tumpu anu ninsusule'mo mae lengkat i lipu' anu majo'on. Salaka tiba mosoni' suele binoanyo mae da bau pompuji' Tumpu nu beleyum, hi Tumpu Israel Anu Susi' hondo, anu mombau da mian-Nyo anu palesayamo hi Ia oholomati.

¹⁰Tumpu notatae hi Yerusalem, “Mian anu lengkat mae i salipu'an po'ule'je mombau pagan mesen nu beleyum ka' to tomu-tomundo' mombee'ije anu opalalui nu beleyum. Naipuan mae Aku nohukumo beleyum kalana Aku notambuha'mo panyo uuka aiya Aku sanangmo na mongkalibosi beleyum.

¹¹ Sinaa pihi tumban nu sabatan daka-daka' saja'mo tuhe-tuhea' da kakaya'an nu to bansa-bansa timbali oboa hi beleyum tiba to tomu-tomundo' nu aha salaku anu i hakop mae.

¹²Bansa tiba kalaja'an anu madi' mongka'oho' tulut hi beleyum osilakaimo ka' mingkotmo.

¹³Katalasanggoan nu alas Libanon oboamo hi belemiu kau' berangan, kau' lonlio' ka' kau' eru oboamo Da bau pompo ima' Laigan-Ku, ka' ma'ima'an nu tampat katinjoan-Ku.

¹⁴ To ana-anak anu nonsakisa beleyum tokamo tolodadupu monsombah, beleyum, anu toho'mo nongalu beleyum ta'alukmo, beleyum osanggohimo ‘Kota' nu Tumpu’, ‘Sion, Kota' nu Tumpu Israel anu Susi'.’

¹⁵Beleyum madi'mo opala'i ka' oka'ideki, ka' madi'mo opojohok da timbali liing hondo. Beleyum Ku pojadimo katalompoan sampe toka sidu-sidutu' bau tampat kalame'an sampe toka sidu-sidutu'.

¹⁶Beleyum nu potuu'mo nu to bansang-bansang tiba to tomu-tomundo', susumo samian na tina nu anak mompotuu' anaknyo. Sahingga nusumbu'je nu beleyum saba' Aku ahi'na Tumpu anu Nomposalamatmo beleyum ka' saba' Tumpu ahi' nu Israel na anu mahoson nonompobebasmo beleyum.

¹⁷Ku boamo na mosoni' salaku pombolosi tambaga, ka' mule' salaka salaku pombolosi besak. Ku bee'i tamba salaku pombolosi kau', kau' mule' basak salaku pombolosi batu. Lipu' nu beleyumo Ku potimbalimo aman totu-totu'u, ka' opalentahmo nu ka adilan.

¹⁸Madi'mo daagi' ko lele mongkona kasinggian ilipu' nu beleyum, ka' mule' mongkona kahansunan ka' anu o'idei i daerah nu beleyum. Susumo pagan mesen Aku monjagaimo beleyum, ka' beleyum mompuji'mo Aku salaku anu Nomposalamatmo beleyum.

¹⁹ Beleyum madi'mo daagi' nu timpa'i nu singgit de sinaamo ka' mule' madi'mo palalu nu jingkai nu bitu'on de pihimo. Kalana Aku Tumpu na timbalimo jingka sampe toka sidu-sidutu' hi beleyum, Aku monjingkaimo beleyum nu kaholomatan-Ku.

²⁰Hi beleyum daagi'mo ko batu nu sinaa anu madi'mo toho' makakinsap, ka' mule' bitu'on anu madi'mo toho' mopoho'. Kalana Aku Tumpu na timbalimo jingka hi beleyum sampe toka sidu-sidutu'. Sola'susa' kalana koanumo sinilaka imadi'anmo.

²¹Mian anu jojoong atina' hi beleyum saja'mo mian anu toto adi-adin, aha mohumpakmo lipu' anu sampe toka sidu-sidutu'. Aha sumomo anu cinangko' anu Aku na nosu'an, da bau pomponyata' saba' Aku anu ahi' oholomati.

²²ka' mule' auan anu madi' da'isan na miannyo ka' madi' talaholomat timbalimo bansa anu manjoo' na miannyo ka' mule' mahoson. Aku Tumpu sampamo, mompojadi aijo' ka' madi' sala' na tempo'nyo.”