Read Saluan YESAYA 65 Bible Online

YESAYA 65 - Saluan bible

YESAYA 65

¹ Tumpu notatae, “Aku sinadiamo montaami mian anu palesayamo hi beleng-Ku panyo aha madi' balado'a hi beleng-Ku. Aku balasadia nusingkaboti nu aha, panyo aha madi'mo molio Aku. Bansa aijo' madi'mo molaga Aku, maunyo ahi' Aku sinadiamo montaami: Aiyamo na Aku!

² Aku saja' tataap sadia molabot miana nu palesayamo hi beleng-Ku, aha mongka'ima'i saja' panggaga. Bansa aijo' mombau palabuatan anu ma'idek ka' mombatuki posi tanga'an nu aha.

³Aha saja' mombau anu moko potambuha' Aku kalana monsombahkonmo koloban i ale' nu aha hi to pilo-pilogot ka' nompapuimo kamangian i mezbah ponsombahkonan haha aijo'.

⁴De pihimo aha mambamo i liang ka' i kubulan da mompoita pokinde' i santuu' nu mian anu sinilakamo. Aha mongkaan bau' ka' monginum boulonnyo anu madi' timbali okaan.

⁵Aha notatae, ‘Lako'mo patikojo'on boli mondedes kami kalana kami susi' ka' madi'mo mati ohani tiba belemiu!’ Aku madi'mo moko ala montoa kalakuan nu aha! Tambuha'-Ku hi aha sumomo apu anu madi' toho' mate.

⁶Hukuman nu aha noko tulis-Kumo. Memang ahi Aku madi' ola momohokot. Ku balosije na palabuatan ma'idek nu aha

⁷kalana dosa' nu aha ka' dosa' nu mompolee' nu aha. Aha nompopo'ambangmo Aku kalana nompapumo kamangian i puge'nyo tampat ponsomban to pilo-pilogot. Aku mombalosije aha sitimbang tiba palabuatan anu lewa'mo binau nu aha.”

⁸Tumpu notatae, “Bua' nu anggur anu daagi' ko ueenyo madi' o, alin panyo opotimbalimo uee' nu anggur. Sumo aitu mule' na bansang-Ku madi' ku hopu'i iwi-iwi', kalana kiijo' hi aha daagi' ahi' ko anu tulu-tulutan hi beleng-Ku.

⁹Aha mian nu Israel anu lengkat mae i tulunan nu bansa Yehuda Ku balakatije, ka' lee' nu aha mohumpakje tano'-Ku anu i bungkutnyo. Mian haha aijo' anu pinile'an-Kumo anu tulu-tulutan hi beleng-Ku jojoongmo kiijo' mae.

¹⁰ Mian anu palesayamo hi beleng-Ku monsombahmo Aku; domba ka' sapi' nu aha mongototmo hemput i Hatanyo nu Saron ka' i Bangka'nyo nu Akhor.

¹¹Panyo misa' sumo aijo' na nasib nu to mia-mian anu nompala'imo Aku, anu madi' mompajuli Sion, puge'-Ku anu susi', anu monsombahkon kaanon hi Gad ka' hi Meni to pilo-pilogot nu ka'untungan ka' nasib nu mian.

¹²Belemiu iwi-iwi' silakamo salakumo koloban kalana panggaga. Kalana, salatan Aku nolagamo, belemiu madi' nontaami, ka' salatan Aku notatae, belemiu madi' mompotombihing. Belemiu lebe mongka'ima'i monggagakon Aku ka' mombau anu ma'idek.

¹³Sabenannyo mian anu monsombah Aku na mongkaan ahi' padahan belemiu mo'ohop. Aha monginum, padahan belemiu megot. Aha bilahimo, padahan belemiu ma'ambangmo.

¹⁴Sabenannyo aha montaligalaimo ka' lame'mo, padahan belemiu humang ka' susa'mo.

¹⁵To mia-mian anu pinile'an-Kumo mompake sanggo nu beleyum salaku kutuk: ‘O'amalakon da Tumpu Anu Matangkas na Kuasanyo mompatei belemiu susumo aha!’ Panyo mian anu tulu-tulutan hi beleng-Ku, Ku bee'ije sanggo anu bu'ou ponsanggohi.

¹⁶Toto samian ilipu' aijo' momoita balakat, momoita da obalakati nu Tumpu anu manonong. Toto samian anu mongka'oho' basumpa', basumpa'mo i sanggo nu Tumpu anu manonong. Kalana kasansala'an anu u'utu mae imadi'mo ka' kinolilimanmo.”

¹⁷ Tumpu notatae, “Aku mombaumo langit anu obauje mule' ka' dunia suele anu obauje mule'. Anu binaumo momona okolilimimo, ka' madi'mo daagi' o'inau'.

¹⁸Bilahimo ka' lame'mo sampe toka sidu-sidutu' kalana apaa na anu binaung-Kumo. Aku mombaumo Yerusalem anu obauje mule' ka' saja' kokabilahian, ka' mian anu monjojoongi ola saja' lame'.

¹⁹ Posi Aku suele saja' bilahi kalana Yerusalem, ka' lame'mo kalana mian anu monjojoongi. I kota' aijo' madi'mo daagi' ko anu humang, ka' madi'mo daagi' ko anu molobo' momoita tulung.

²⁰To ana-anaknyo madi'mo daagi' ko anu silaka daai' ise', ka'mian anu tu'anyomo mantanmo na umunnyo nu aha. Mian anu umunyo sa'atumo na taun daagi' o'anggap olitau, ka' mian anu sinilakamo ma'isa pe'e jinadi na aijo' o'anggapmo ahi' kinonamo nu hukuman-Ku.

²¹Mian mombaumo laigan ka' oposi jojoongimo mian sangga'at madi' timbali monjojoongi. Aha monsu'animo ale' nu anggur, ka' monginumo uee nu anggurnyo; mian sangga'at madi' timbali monginum. Mian anu palesayamo hi beleng-Ku mantanmo na umunnyo susumo kau', ka' mongkaanmo hasin nu pakalaja'an nu aha.

²³Iwi-iwi' na anu nu bau nu aha ko hasinnyomo, ka' to ana-anak nu aha madi' saitotolo' silakamo. Aha tiba lee' nu aha, Ku balakatimo sampe toka sidu-sidutu'.

²⁴Ma'isa pe'e aha mongkakase mae, Ku taamimo na aha, ma'isa pe'e aha lapas na balado'a, Ku talimamo na do'a nu aha.

²⁵ Serigala tiba anak nu domba mogalumo na mongotot hempu'; singa mongototmo haat susumo sapi', ka' mule' ulo madi'mo ahi' monsilakai. Isongko-songko na puge'nyo anu susi' anu Aku na tumpunyo madi'mo daagi' ko anu mompolugi kabai mombau palabuatan anu ma'idek.”