Read Saluan IMAMAT 12 Bible Online

IMAMAT 12 - Saluan bible

IMAMAT 12

¹Tumpu nombee'imo atulan haha aiya hi Musa,

²kona hi bansa Israel. De samian na boune mompohampe anak mo'ane, saba' pitun sinaa na kopinnyo boune aijo' mahumimi'mo sumomo tempo'nyo ia hau-haunyo tinokamo na adat nu boune.

³ I sinaa ko ialunnyomo anaknyo aijo' tionyo ahi' o sunatmo.

⁴Daagi' tolumpulu' ka totolu' na sinaa na boune aijo' daagi' sabole-bole mahumimi' kalana daagi' ko homenyo. Ia madi' timbali mongkanyang to bala-balang anu opake monsombah ka' madi' timbali minsoop i Kemah nu Tumpu sampe lapasje oposusi' na ia.

⁵De samian na boune mompohampe anak boune, saba' kopinnyo sampulu' ka' opat na sinaa na boune aijo' mahumimi', sumomo tempo'nyo ia hau-hau-nyo tinokamo na adat nu boune. Daagi' anompulu' ka' anon sinaa na boune aijo' daagi' sabole-bole mahumimi', kalana daagi' ko homenyo.

⁶De lapasmo na tempo'nyo momposusi' kalana nompohampemo anak mo'ane kabai anak boune, boune aijo' tionyo ahi' momboa anu osombahkon hi imam i ahop nu sabatan nu Kemah nu Tumpu. Anu osombahkon aijo', aijo'mo sa'angu' na anak nu domba umunnyo sataunmo bau koloban anu opotunu, ka' sa'angu' na tomonsi' malapati' anu daagi' bata'nyo kabai tomonsi' sapatau anu daagi' bata'nyo bau koloban pongampuni dosa'.

⁷Imam tionyo ahi' mombee' anu osombahkonnyo aijo' hi Tumpu ka' mombau adatnyo anu bau pompobelesi' humimi' nu boune aijo', sahingga ia timbalimo belesi'. Jadi' aijo' na tionyo sabole-bole obau nu samian na boune de ia moko pohampemo.

⁸ De boune aijo' madi' moko ala mompotouka sa'angu' na anak nu domba, yo ia tionyo ahi' momboa ohua' na tomonsi' malapati' anu daagi' bata'nyo kabai tomonsi' sapatau anu daagi' bata'nyo; sa'angu' bau koloban anu opotunu ka' sa'angu' mule' na koloban bau pongampuni dosa'. Imam tionyo ahi' sabole-bole mombau adatnyo bau pompobelesi'i humimi' nu boune aijo', sahingga ia timbalimo belesi'.