Read Saluan IMAMAT 13 Bible Online

IMAMAT 13 - Saluan bible

IMAMAT 13

¹Tumpu nombee'mo atulan haha aiya hi Musa ka' hi Harun:

²De daagi' ko mian anu kinumalubabangmo kabai kinumahutonmo kabai ninana'mo mopute' i kilitnyo anu timbalimo panyakit kilit anu monsilakai, ia tionyo ahi' oboa hi imam lee' i Harun.

³Imam tionyo ahi' mompalesa kilit anu masakit hi mian aijo'. De bulu i tampat anu masakit aijo' mopute'mo, ka' kilitnyo anu masakit aijo' otoa mosi palebokmo madi'mo pokakana kilit anu i duhu-duhuknyo, mian aijo' kinonamo nu panyakit kilit anu monsilakai. Imam tionyo ahi' mompoto'imo taalu' mian aijo' nahumimi'mo.

⁴Panyo de kilit anu masakit aijo' mompute'mo ka' madi' mosi palebokmo susumo kilit anu i duhu-duhuknyo ka' bulu i tampat aijo' suele madi' mopute' mian aijo' tionyo ahi' oposi pojoongmo kopinnyo pitun sinaa.

⁵I sinaa ko ipitunnyo, imam tionyo ahi' mompo'ule'mo mompalesa. Ka' de koonyo panyakit aijo' sasumo aijo'nyomo ka' madi' molele, mian aijo' tionyo ahi' oposi pojoong pe'e daagi' pitun sinaa mule'.

⁶I sinaa ko ipitunnyo imam tionyo ahi' po'ule'mo mompalesa, ka' de i tampat anu masakit aijo' gagana'mo ma'alin ka' madi'mo molele, imam tionyo ahi' mompoto'i mian aijo' binelesi'mo. Aijo' panyakit kilit anu madi' monsilakai. Mian aijo' tionyo ahi' mombaso'imo baju'nyo ka' ia binelesi'mo.

⁷Panyo de opoko poto'imo nu imam binelesi'mo padahan panyakit aijo' po'ule' molele ia tionyo ahi' po'ule' mangadap hi imam.

⁸Imam tionyo ahi' po'ule' mompalesa, ka' de panyakitnyo memang nolelemo, mian aijo' tionyo ahi' opoto'i nahumimi'mo. Ia kinonamo nu panyakit kilit anu monsilakai.

⁹Toto samian anu kinonamo nu panyakit kilit anu monsilakai tionyo ahi' oboa hi imam.

¹⁰De koonyo nu imam anu nompalesa kilit nu mian aijo' ko anu bangkak mopute' ka' kumahuton ka' bulu i tampat aijo' mopute'mo,

¹¹mian aijo' kinonamo nu panyakit kilit anu monsilakai. Imam tionyo ahi' mompoto'i mian aijo' nahumimi'mo. Madi'mo pilenje momposi pojoong ia, kalana nanasamo taalu' i nahumimi'mo.

¹²De nutoa nu imam nana'nyo mompute' aijo', nolelemo lengkat aita mae i ubaknyo toka-toka akaong i tengkenyo,

¹³ka' de pinalesamo taalu' panyakit aijo' nolelemo i songko-songko na butong ka' songko-songko na kilitnyo nopute'mo, mian aijo' opoto'i binelesi'mo.

¹⁴Panyo de nukona mule' nu kumahut, imam tionyo ahi' po'ule'mo mompalesa.

¹⁵De aijo' memang kumahut, mian aijo' tionyo ahi' opoto'i nahumimi'mo, kalana ia kinonamo nu panyakit kilit anu monsilakai.

¹⁶Panyo de kumahut aijo' na'alinmo ka' po'ule' mule' mopute', mian aijo' tionyo ahi' mangadap hi imam

¹⁷da po'ule' mule' opalesa. De kumahut aijo' memang nopute'mo, imam mompoto'imo mian aijo' binelesi'mo.

¹⁸De ko mian anu binisulonmo lantas na'alinmo,

¹⁹panyo i pakitnyo lubatmo na bangkak mopute' kabai minana'mo mopute'ka' nohahamo, mian aijo' tionyo ahi' mangadap hi imam,

²⁰da opalesa. De nana'nyo haha aijo' otoa mosi palebokmo madi'mo sumo kilit anu i duhu-duhuknyo ka' bulu i tampat aijo' suele nopute'mo, imam tionyo ahi' mompoto'i taalu' mian aijo' nahumimi'mo. Bisun aijo' montampu'unimo panyakit kilit anu monsilakai.

²¹Panyo de koonyo nu imam anu nompalesa bulu i tampat aijo' madi' nopute' ka' tampat aijo' madi' nosi palebokmo i kilit anu i duhu-duhuknyo, ola nohahamo, mian aijo' tionyo ahi' oposi pojoongmo kopinnyo pitun sinaa.

²²De nana'nyo mopute' aijo' nolelemo, imam tionyo ahi' mompoto'i mian aijo' nahumimi'mo kalana ia kinonamo nu panyakit kilit anu monsilakai.

²³Panyo de nana'nyo mopute' aijo' madi' mongabali' ka' madi' ahi' molele, aijo' ola pakit nu bisun, jadi mian aijo' opoto'i binelesi'mo.

²⁴De ko mian mohohut ka' kilit anu mohohut aijo' nopute'mo kabai mopute' ka' nohahamo,

²⁵imam tionyo ahi' mompalesa. De bulu i tampat aijo' nopute'mo ka' belanyo mosi palebokmo, madi'mo susumo kilit anu i duhu-duhuknyo saba' aijo' panyakit kilit anu monsilakai nolelemo i bela anu nohohut aijo', ka' imam tionyo ahi' mompoto'i mian aijo' nahumimi'mo.

²⁶Panyo de bulu i tampat aijo' madi' mopute' ka' i tampat aijo' madi' mosi palebokmo i kilit anu i duhu-duhuknyo, ola nohahamo saba' mian aijo' tionyo ahi' oposi pojoongmo pitun sinaa na kopinnyo.

²⁷I sinaa ko ipitunnyo imam tionyo ahi' po'ule'mo mompalesa. De nana'nyo mompute' aijo' nolelemo, saba' mian aijo' kinonamo nu panyakit kilit anu monsilakai, ka' tionyo ahi' opoto'i nahumimi'mo.

²⁸Panyo de nana'nyo mopute' aijo' madi'mo mongabali' ka' madi' ahi' molele, ola ahi' mompaka popute'mo, aijo' misa' panyakit kilit anu monsilakai. Imam tionyo ahi' mompoto'i taalu' mian aijo' belesi', kalana anu mopute' aijo' pakit nu anu nohohut.

²⁹De samian na mo'ane kabai boune nukona nu panyakit kilit i ubaknyo kabai i ajenyo,

³⁰ia tionyo ahi' opalesa nu imam. De i tampat anu masakit aijo' otoa mosi palebok i kilit anu i duhu-duhuknyo, ka' hambahan nu ubak kabai jangkut i tampat aijo' mokinimo ka' mohudu'mo, saba' mian aijo' kinonamo nu panyakit kilit anu monsilakai sahingga tionyo ahi' opoto'i nahumimi'mo.

³¹De koonyo nu imam anu nompalesa tampat anu masakit aijo' madi' nosi palebokmo i kilit anu i duhu-duhuknyo, panyo madi' ko hambahan nu ubak kabai jangkut anu daagi' ma'ima' i tampat aijo' mian aijo' tionyo ahi' oposi pojoongmo pitun sinaa na kopinnyo.

³²I sinaa ko ipitunnyo, imam tionyo ahi' po'ule' mompalesa tampat anu masakit aijo' ka' de panyakit aijo' madi' molele ka' madi' ko hambahan nu ubak kabai jangkut anu nokinimo i tampat aijo' ka' mule' otoa madi' nosi palebokmo i kilit anu i duhu-duhuknyo,

³³mian aijo' tionyo ahi' mongkismo ubaknyo kabai jangkut i duhu-duhuknyo nu tampat anu masakit aijo'. Lantas ia tionyo ahi' oposi pojoongmo pitun sinaa.

³⁴I sinaa ko ipitunnyo, imam tionyo ahi' po'ule'mo mompalesa. De panyakitnyo aijo' madi' molele ka' tampat aijo' otoa madi mosi palebokmo i kilit anu i duhu-duhuknyo, mian aijo' opoto'i belesi' ka' tionyo ahi mombaso'i baju'nyo.

³⁵Panyo de opoko poto'imo belesi' lantas panyakitnyo aijo' molelemo,

³⁶imam tionyo ahi' po'ule'mo mompalesa. De memang panyakit aijo' nolelemo, madi'mo pilenje imam mompalesa pa' hambahan nu ubak kabai jangkut nu mian aijo' nokinimo, kalana nanasamo saba' mian aijo' nahumimi'mo.

³⁷Panyo de koonyo nu imam panyakitnyo madi' nolele, ka' hambahan nu ubak tumuu' kabai jangkut ma'ima' i tampat aijo', saba' panyakitnyo aijo' na'alinmo, ka' imam tionyo ahi' mompoto'i ia binelesi'mo.

³⁸De samian na mo'ane kabai boune ko nana'nyo mopute' i kilitnyo,

³⁹imam tionyo ahi' mompalesa mian aijo'. De nana'nyo aijo' otoa moho-moho'mo pute' ia ola i lelean nu kumahut, ka' opoto'i ia belesi'.

⁴⁰De samian na mo'ane lendesmo na ubak i tundun kabai i buan nu siakan, lendesnyo aijo' madi' monsaduakon ia mahumimi'mo.

⁴¹

⁴²Panyo de binangkakmo ka' mopute' ka' nohahamo i tampat anu i lendesmo aijo', ia kinonamo nu panyakit kilit anu monsilakai.

⁴³Imam tionyo ahi' mompalesa mian aijo' ka' de memang ko anu bangkak mompute' ka' nohahamo,

⁴⁴imam tionyo ahi' mompoto'i ia taalu' nahumimi'mo kalana kinonamo nu panyakit kilit anu monsilakai i ubaknyo.

⁴⁵De ko mian anu kinonamo nu panyakit kilit anu monsilakai tionyo ahi' mompusok baju' anu mobea-beak ka' mompojohokmo ubaknyo tapuhakak. Ia tionyo ahi' mongkukubi aluknyo nu ohupnyo ka' lewa' moloboo', “Nahumimi'mo! Nahumimi'mo!”

⁴⁶De daagi' ia ko panyakit aijo' ia mahumimi' ka' tionyo ahi' jojoong i sambiha' nu kemah matikojo'on hi mian sangga'at.

⁴⁷De ko anumo nahu' na baju' kabai hude laken na binau kabai lenan,

⁴⁸kabai i kilit kabai pa' apa-apaa anu kilit na binau,

⁴⁹ka' buhitnyo nu anu nahu'mo aijo' moho-moho'mo nobilu' kabai nohahamo, jadi anu nahu'mo aijo' sumomo anu molele, jadi tionyo ahi' opotoa hi imam.

⁵⁰Imam tionyo ahi' mompalesa balang aijo', lantas oposi po'una'mo kopinnyo pitun sinaa.

⁵¹I sinaa ko ipitunnyo ia tionyo ahi' po'ule'o mompalesa, ka' de anu nahu'mo aijo' memang nolelemo, balang aijo' nahumimi'mo.

⁵²Imam tionyo ahi' mompapuimo balang aijo' kalana anu nahu'mo aijo' sumomo gampanyo nu anu molele, jadi tionyo ahi' opapuimo.

⁵³Panyo de koonyo nu imam anu nompalesa balang anu nahu'mo aijo'; madi' nolele i balang aijo',

⁵⁴ia mompokau da balang aijo' obaso'i ka' oposi po'una' kopinnyo po'ule' pitun sinaa.

⁵⁵Lantas imam tionyo ahi' po'ule' mompalesa. De anu nahu'mo aijo' madi' nolele panyo lupanyo tataap pokakana, balang aijo' daagi' mahumimi' ka' tionyo ahi' opapuimo, mau mule' anu nahu'mo aijo' ola i sasu ahopnyo kabai i sasu hikunyo.

⁵⁶Panyo de koonyo nu imam anu nompalesa anu nahu'mo aijo' madi'mo ma'ima, tampat anu nahu'mo i hude kabai i kilit aijo', tionyo ahi' obeakakonmo.

⁵⁷De lapas aijo' po'ule' mule' nukona, saba' anu nahu'mo aijo' nolelemo ka' tumpunyo tionyo ahi' mompapuimo balang aijo'.

⁵⁸De opoko baso'imo buhitnyo nu anu nahu'mo i balang aijo' binelesi'mo, saba' balang aijo' tionyo ahi' po'ule' obaso'i atina'je ka' osanggohimo binelesi'mo.

⁵⁹Sumo aijo' na to atu-atulannyo mongkona anu nahu'mo anu ohumpak i baju' kabai i hude' kabai laken, kabai pa' apa-apaa anu kilit na binau.