Read Saluan IMAMAT 14 Bible Online

IMAMAT 14 - Saluan bible

IMAMAT 14

¹Tumpu nombee'mo atulan haha aiya hi Musa

² mongkona anu obau pompobelesi' de ma'alinmo i panyakit kilit anu monsilakai. Toka i sinaanyo salatan opoto'imo na mian aijo' belesi'mo ia tionyo ahi' momboamo hi imam,

³lantas i imam momboamo i sambiha'nyo nu kemah. De koonyo i imam mian anu pinalesamo aijo' na'alinmo,

⁴i imam mompokaumo ia momboa mae ohua' na tomonsi' anu daagi' tumuu', anu timbali okaan, tiba sangkolong na kau' walu, sambotu' na kahohon momea' ka' sampanga' na hisop.

⁵Sa'angu' na tomonsi' aijo' tionyo ahi' o kolot i kuhon tano' anu ko isinyo uee belesi' anu ingasu i mata nu uee.

⁶Tomonsi' sa'angu' mule' tiba kau' walu, kahohon momea', ka' sampanga' na hisop, olobongakon i baso' nu tomonsi' anu kinolotmo.

⁷Imam mompipi'akon baso' nu tomonsi' aijo' pimpitun hi mian anu na'alinmo, ka' mompoto'i ia aijo' binelesi'mo. Lantas tomonsi' anu daagi' tumuu' tionyo ahi' opolapas i padang.

⁸Lapas mae mian aijo' tionyo ahi' mombaso'i baju'nyo, ubaknyo o kis iwi-iwi', ka' mindii'mo. Jadi ia belesi'mo, ka' timbalimo minsoop i uno nu kemah, panyo pitun sinaa ia ma'isa timbali minsoop i uno nu posi kemahnyo.

⁹I sinaa ko ipitunnyo ia tionyo ahi' mongkismo ubaknyo iwi-iwi', ka' jangkutnyo, bangkulangnyo ka' iwi-iwi' na bulu nu butongnyo. Lantas ia tionyo ahi' mombaso'i baju'nyo ka' mindii' lapas aijo' atina'je ka' ia belesi'mo.

¹⁰Toka i sinaa ko ialunnyo mian aijo' tionyo ahi' momboa ohua' na anak nu domba lakinyo ka' sa'angu' na anak nu domba behenyo umunnyo anu sataunmo, ka' toto sa'angu' madi' ko panyakitnyo. Ka' suele mule' labu totolu na kilogram anu ginalo'anmo nu lanya' zaitun ka' saliten na lanya' nu zaitun anu obagi totolu', sambahagian na oboa mae.

¹¹Lantas imam tionyo ahi' momboa ia tiba anu nu sombahkon aijo' i ahop nu sabatan nu Kemah nu Tumpu.

¹²Imam tionyo ahi' mongalamo sa'angu' na anak nu domba lakinyo tiba lanya' nu zaitun saliter obagi totolu', sambahagian na bau koloban polugi'i, ka' osombahkon salaku palasombahan anu obee' hi Tumpu.

¹³Anak nu domba aijo' tionyo ahi' o kolot i tampat anu tinantukanmo samata-mata bau pongkolotan binatang bau koloban pongampuni dosa' ka' koloban anu opotunu. Domba aijo' tionyo ahi' o kolot ikiijo' kalana koloban bau polugi'i ka' koloban pongampuni dosa' aijo' talalo hondo susi', ka' aijo' baumo bagi nu imam.

¹⁴Imam tionyo ahi' mongala sangkiding na baso' nu anak nu domba aijo' lantas monsapuakon i bihing nu mian aijo' sasu koanan i aluknyo, i kanumpu nu lima koanan ka' i kanumpu nu tengke koanan nu mian anu opoto'i binelesi'mo.

¹⁵Lapas aijo' imam mongalamo sangkiding na lanya' nu zaitun ka' mondudu'akon i pala nu posi limanyo sasu kewe'.

¹⁶Lapas aijo' nu lobongakonmo na kangkam nu limanyo koanan i lanya' ka' mompipi'akonmo pimpitun i uno nu Kemah nu Tumpu.

¹⁷Lantas sangkiding na lanya' anu dagi' i limanyo tionyo ahi' nu sapuakon i tampat-tampat anu sinapuanmo baso', aijo'mo i bihing koanan sasu aluknyo, i kanumpu nu lima koanan ka' i kanumpu nu tengke koanan hi mian anu pinoto'imo belesi'.

¹⁸Labinyo nu lanya' tionyo ahi' odudu'akonmo i ubak nu mian aijo'. Sumo aijo'mo na imam mombau anu bau pomposusi' hi mian aijo' i ahop nu Tumpu.

¹⁹Lapas aijo' imam tionyo ahi' monsombahkonmo koloban pongampuni dosa' da mian anu nahumimi'mo aijo' belesi'mo. Lapas mae ia tionyo ahi' mongkolotmo binatang bau koloban anu opotumuu',

²⁰ka' monsombahkon hingga-hinggat tiba koloban kaanon i mezbah. Sumo aijo'mo na imam mombau anu bau pomposusi' hi mian aijo' da ia timbalimo belesi'.

²¹De mian aijo' kasiasi ka' madi' moko ala montanggungi koloban saba' koloban bau polugi'i ia timbali momboa ola sa'angu' na anak nu domba lakinyo anu osombahkon obee' hi Tumpu. Ka' mule' sangga'at labu sa'angu' na kilogram ogalo'i nu lanya' zaitun bau koloban kaanon, ka' sa'angu' na liten lanya' zaitun anu obagi totolu' sambagian na obee'.

²²Ia tionyo ahi' momboa ohua' na tomonsi' malapati anu daagi' bata'nyo kabai sapatau anu daagi' bata'nyo: sa'angu' bau koloban pongampuni dosa' ka' sa'angu' mule' bau koloban anu opotunu.

²³Iwi-iwi' na anu osombahkon aijo' tionyo ahi' oboa hi imam i ahop nu sabatan nu Kemah nu Tumpu i sinaa ko ialunnyo bau pomposusi' butongnyo.

²⁴Imam mongala anak nu domba ka' lanya' nu zaitun aijo' ka' monsombahkon salaku palasombahan anu obee' hi Tumpu, ka' aijo' baumo bagi nu imam.

²⁵Lantas imam tionyo ahi' mongkolotmo anak nu domba aijo' ka' monsapuakon sangkiding baso'nyo i bihing koanan sasu aluknyo, i kanumpu nu limanyo koanan ka' i ka' numpu nu tengkenyo koanan hi mian aijo' anu opoto'i binelesi'mo.

²⁶Imam tionyo ahi' mondudu'akon sangkiding na lanya' i pala nu limanyo kowi,

²⁷ka' kangkam nu limanyo koanan mompipi'akon lanya' aijo' pimpitun i uno nu Kemah nu Tumpu.

²⁸Lantas sangkiding na lanya' anu daagi' i limanyo tionyo ahi' osapuakon i tampat-tampat anu sinapuanmo baso', aijo'mo i bihing koanan sasu aluknyo, i kanumpu nu lima koanan ka' i kanumpu nu tengke koanan hi mian anu opoto'i binelesi'mo.

²⁹Labinyo nu lanya' tionyo ahi' odudu'akon i ubak nu mian aijo' da bau pomposusi' butongnyo i ahop nu Tumpu.

³⁰Lapas aijo' imam tionyo ahi' monsombahkon sa'angu' na tomonsi' malapati bata'nyo kabai sapatau bata'nyo,

³¹bau koloban pongampuni dosa', ka' sa'angu' mule' sangga'at bau koloban anu opotunu, hingga-hinggat tiba koloban kaanon anu osombahkon. Sumo aijo'mo na imam mombau anu pomposusi' mian aijo' hi ahop nu Tumpu.

³²Aijo'mo na atulan mongkona mian anu oposusi' salatan lapasmo na nukona nu panyakit kilit anu monsilakai kona hi mian anu madi' moko ala montanggungi koloban.

³³Tumpu nombee'mo hi Musa ka' hi Harun,

³⁴atulan haha aiya mongkona laigan anu kinonamo nu mapuk anu molele. Atulan haha aiya pinake salatan bansa Israel ninsoopmo i Kana'an, lipu' anu binee' nu Tumpu hi aha.

³⁵De ko mian montoa anu mapuk i laigannyo, han aijo' tionyo ahi' opoto'i hi imam.

³⁶Ma'isa pe'e i imam toka montoa anu mapuk aijo', ia tionyo ahi' mompalentahkonmo da iwi-iwi' apaa na anu i laigan aijo' tionyo ahi' osabatakonmo. De madi', maumo pa' apaa na anu i laigan aijo' timbalimo mahumimi'. Lantas i imam tionyo ahi' toka,

³⁷da montoa anu napukmo aijo'. De ko anu lumene moho-moho' mobilu' kabai mohaha, anu otoa susumo anu humpis minsoop mokiijo' i mesen,

³⁸imam tionyo ahi' mompala'i laigan aijo', ka' ogunsingmo ko pinnyo pitun sinaa.

³⁹Sinaa ko ipitunnyo tionyo ahi' ia po'ule'mo toka montoa. De anu mapuk aijo' molele,

⁴⁰ia tionyo ahi' mompalentahkonmo da batu nu mesen haha aijo' anu napukmo o tetegimo ka' iwi-iwi' na mesen sasu unonyo o kahugimo. Kahugian mesen anu pinompelester, ka' batu haha aijo' tionyo ahi' o alin i tampat anu mahumimi' i sambiha' nu kota.

⁴¹

⁴²Lantas batu haha aijo' anu ingalinakonmo tionyo ahi' obolosi nu batu anu toto bu'ou-bu'ou. Iwi-iwi' na mesen nu laigan aijo' tionyo ahi' olapisimo nu pelester anu bu'ou.

⁴³De anu mapukmo aijo' mompo'ule' mule', padahan batu haha aijo' i laigan binolosanmo ka' mesennyo haha aijo' kinahuganmo ka' po'ule'mo pinelester,

⁴⁴saba' imam tionyo ahi' po'ule' toka ka' montoa laigan aijo'. De anu mapuk aijo' memang nolelemo, saba' laigan aijo' memang nahumimi'mo,

⁴⁵ka' tionyo ahi' otatakimo. To batu-batu, to kau-kau' ka' iwi-iwi' na pelesternyo tionyo ahi' oboamo i tampat anu mahumimi' i sambiha' nu kota.

⁴⁶Anu ninsoopmo i laigan aijo' ma'isa pe'e tinatakan, tinimbalimo nahumimi' sangkutnyo sinaa nakakinsapmo.

⁴⁷De ko anu mongkaan kabai hoyot i laigan aijo' tionyo ahi' mombaso'i baju'nyo.

⁴⁸Panyo de imam tokamo ka' nutoa madi'mo po'ule' mapuk, salatan laigan aijo' po'ule'mo pinelester, ia tionyo ahi' mompoto'i saba' laigan aijo' binelesi'mo, kalana madi'mo ko anu mapuk.

⁴⁹Bau pomposusi' laigan, imam tionyo ahi' mongala ohua' na tomonsi', kau' lontio', kahohon momea' ka' sampanga' na hisop.

⁵⁰Tomonsi' sa'angu' tionyo ahi' o kolot i kuhon anu ko isinyo uee belesi' anu ingala i mata nu uee.

⁵¹Lantas kau' lontio, kahohon momea', hisop ka' tomonsi' anu daagi' tumuu' tionyo ahi' olobongakon i baso' nu tomonsi' anu kinolotmo ka' hi uee anu belesi'. Lapas mae laigan aijo' tionyo ahi' opipi'imo pimpitun.

⁵²Tomonsi' anu daagi' tumuu' tionyo ahi' opolapasmo i padang anu i sambiha' nu kota. Tiba jalan anu sumo aijo' imam nombaumo pomposusi' laigan da laigan aijo' timbalimo belesi'.

⁵³

⁵⁴Aijo'mo na atulan mongkona panyakit kilit anu monsilakai,

⁵⁵mongkona anu kumalubabang, kumahut kabai anu ko nana'nyo mopute', kabai bangkak i butong nu mian ka' mongkona mahu'mo i baju' kabai i laigan.

⁵⁶

⁵⁷Atulan haha aijo' gunanyo bau pomponyata' apa-apaa pa' belesi' kabai mahumimi'.