Read Saluan IMAMAT 16 Bible Online

IMAMAT 16 - Saluan bible

IMAMAT 16

¹Salatan anak i Harun ohu-ohua' sinilakamo tempo'nyo nonsombahkon apu anu madi' kina'ima'an nu Tumpu, Tumpu notataemo hi Musa,

² Ia notatae, “Sisikakon hi utus nu beleyum i Harun, saba' ola ahi' tempo' anu tinantukanmo na ia timbali minsoop i Salipi' anu Susi' hondo anu nu oloti nu lalanse', kalana ikiijo' na Aku nanintoa i uno nu kundom i kolop nu Peti' Palajanjian. De i Harun molanggai palentah aijo' ia matemo.

³ Ola de monsombahkonmo sapi' lakinyo bau koloban pongampuni dosa', ka' mule' sa'angu' na domba lakinyo bau koloban anu opotunu, yo i Harun timbali minsoop i Salipi' anu Susi' hondo.”

⁴Ka' mule' i Harun tionyo ahi' saja' mongintomakon atulan haha aiya. Ma'isa pe'e minsoop i Salipi' anu Susi' hondo ia tionyo ahi' mindii' pe'e lantas mompusok baju' nu imam, aijo'mo baju', saluan kodo', pombutu' ka' suluban, iwi-iwi' lenan na binau.

⁵Lantas mian nu Israel tionyo ahi' mombee' hi Harun ohua' na mee' lakinyo bau koloban pongampuni dosa' ka' sa'angu' na domba lakinyo bau koloban anu opotunu.

⁶I Harun tionyo ahi' monsombahkon sa'angu' na sapi' lakinyo bau koloban pongampuni dosa' nu posi butongnyo ka' aha salaigan.

⁷Ohu-ohua' na mee' lakinyo aijo' anu lengkat mae hi aha mian Israel tionyo ahi' nu boa i ahop nu sabatan nu Kemah nu Tumpu.

⁸Ikiijo' ia tionyo ahi' mompile'i opakeakon onde aijo'mo mompake batu ohua', sa'angu' otandai “bagi nu Tumpu”, ka' sangga'at mule' “bagi nu Azazel”.

⁹Mee' anu tinompile'i bagi nu Tumpu tionyo ahi' osombahkon bau koloban pongampuni dosa'.

¹⁰Mee' anu tinompile'i bagi nu Azazel tionyo ahi' opolapas daagi' tumuu' i ahop nu Tumpu lantas o laa'mo da mambamo i padang bola bau bagi nu Azazel da dosa' iwi-iwi' nu bansa Israel opobelesi'mo.

¹¹Salatan moko lapasmo na i Harun monsombahkon ka' mongkolotmo sapi' lakinyo bau koloban pongampuni dosa' nu posi butongnyo ka' kona hi aha salaigan,

¹²ia tionyo ahi' mongalamo tampat nu apu anu aijo' i mezbah ka' o isimo buke-buke' nu oba nu apu ka' uangkakup na kamangian anu nahutemo lantas oboamo i Salipi' anu Susi' hondo.

¹³Kamangian aijo' tionyo ahi' opapui i ahop nu Peti' Palajanjian aijo', sahingga tibuknyo monsapumo kolop nu Peti' aijo' ka' i Harun madi'mo moko ala montoa kalana de ia montoa ia matemo.

¹⁴Lantas i Harun tionyo ahi' mongalamo sangkiding na baso' nu sapi', ka' kangkam nu limanyo mompipi'akonmo baso' aijo' i sasu ahop nu kolopnyo nu Peti' Palajanjian aijo', ka' pimpitun i ahop nu Peti' aijo'.

¹⁵ Lapas aijo' i Harun tionyo ahi' mongkolotmo mee' bau koloban pongampuni dosa' nu aha mian Israel. Baso' nu mee' aijo' tionyo ahi' nu boa i Salipi' anu Susi' hondo, lantas opipi'akonmo i sasu ahop nu kolop nu Peti' Palajanjian aijo', ka' i ahop nu Peti', susumo anu binaunyomo i baso' nu sapi' lakinyo.

¹⁶Tiba jalan anu sumo aijo' ia momposusi'mo Salipi' anu Susi' hondo, anu i humimi'anmo nu aha bansa Israel kalana dosa' nu aha iwi-iwi'. Kemah nu Tumpu tionyo ahi' oposusi' kalana ia binau i totonga' nu kemah nu aha bansa Israel ka' kinonamo nu kapahumimi'an nu aha.

¹⁷Salatanmo i Harun minsoopmo i Salipi' anu Susi' hondo, mombau anu bau pomposusi' sangkutnyo ia nosabat, samian pe'e madi' timbali ko anu daagi' i uno nu Kemah aijo'. De lapasmo na mombau anu bau pomposusi' posi butongnyo, tiba aha salaigan ka' iwi-iwi' na aha bansa Israel,

¹⁸i Harun tionyo ahi' mosabatmo ka' mambamo i mezbah pompotunuan koloban momposusi' mo mezbah aijo'. Ia tionyo ahi' mongala sangkiding na baso' nu sapi' ka' baso' nu mee', ka' monsapuakon i tanduk haha aijo' opa-opat i pasu'nyo nu mezbah.

¹⁹Tiba kangkamnyo aijo' ia tionyo ahi' mompipi'akon sangkiding na baso' aijo' pimpitun mokiijo' i mezbah. Tiba jalan sumo aijo' ia momposusi'mo mezbah kalana kapahumimi'an nu aha bansa Israel, da timbali susi'.

²⁰De lapasmo na mombau anu bau pomposusi' Salipi' anu Susi' hondo ka' bahagian sangga'at i Kemah nu Tumpu tiba mezbahnyo, i Harun tionyo ahi' monsombahkonmo hi Tumpu mee' anu daagi' tumuu' anu pinile'anmo bau bagi nu Azazel.

²¹Ia tionyo ahi' mompotiik limanyo ohu-ohua' i ubak nu mee' aijo' ka' mongakui iwi-iwi' na kasala'an, dosa' ka' anu i langgaanmo nu bansa Israel. Tiba jalan anu sumo aijo' iwi-iwi' na kasala'an nu bansa Israel i lalinmo nokiijo' i ubak nu mee' aijo'. Lantas samian na anu pinalentahmo da molaa'mo mee' aijo' da mambamo i padang bola.

²²Mee' aijo' nomboamo iwi-iwi' na dosa' nu bansa Israel i daerah anu mateges anu madi' ojoongi ka' tionyo ahi' opolapas na ia i padang bola aijo'.

²³ Lapas aijo' i Harun tionyo ahi' minsoopmo i uno nu Kemah mongukatmo baju' nu imam anu pinusoknyo minsoop i Salipi' anu Susi' hondo ka' mompo'una' baju' aijo' ikiijo'.

²⁴Lantas ia tionyo ahi' mindi'mo i sa'angu' na tampat anu samata-mata tinantukanmo bau pindi'annyo ka' mompusokmo posi baju'nyo ahi'. Lapas aijo' tionyo ahi' ia mosabatmo ka' monsombahkon koloban anu opotunu bau pongampuni dosa'nyo ka' dosa' nu bansa Israel.

²⁵Lompo'nyo nu binatang anu bau koloban pongampuni dosa' tionyo ahi' opotunu i mezbah.

²⁶Mian anu mompolapas mee' anu bau bagi' nu Azazel i padang bola tionyo ahi' mombaso'i baju'nyo ka' mindi' pe'e minsusule'je i kemah.

²⁷ Sapi' lakinyo ka' mee' bau koloban pongampuni dosa' anu baso'nyo oboa i uno nu Salipi' anu Susi' hondo bau pongampuni dosa', tionyo ahi' oboa i sambiha'nyo nu Kemah ka' opotunu. Kilit, antoknyo ka' isi nu kompongnyo ohu-ohua' na binatang aijo' tionyo ahi' opotunu iwi-iwi'.

²⁸Mian anu nompotunu tionyo ahi' mombaso'i baju'nyo ka' mindi' pe'e atina'je ka' minsusule' i Kemah.

²⁹ Atulan haha aiya tionyo ahi' otuluti sampe toka sidu-sidutu'. Toka i tanggal sampulu' bitu'on ko popitu'nyo aha mian nu Israel ka' aha mian anu lengkat mae i salipu'an anu jinojoongmo aijo' hi aha tionyo ahi' bapuasa' ka' madi'mo timbali mokalaja, kalana sinaa aiya, sinaa anu susi' hondo. I sinaa aijo' tionyo ahi' mombau anu bau pomposusi' bansa Israel i dosa nu aha da aha belesi'mo.

³²Imam Daka' anu binalakatanmo da samata-mata mokalaja hi Tumpu Allah anu nombolosimo tuumanyo tionyo ahi' mombaumo anu bau pomposusi' aijo'. Ia tionyo ahi' mompusok baju' anu opusok samata-mata mombau aijo',

³³lantas mombaumo anu bau pomposusi' Salipi' anu Susi' hondo, ka' bahagiannyo sangga'at i Kemah nu Tumpu, mezbah, to ima-imam ka' iwi-iwi' na bansa nu aha Israel.

³⁴Han anu obau aijo' tionyo ahi' obau sataun minsan bau pomposusi' aha bansa Israel i dosa' nu aha iwi-iwi'. Aijo'mo na atulannyo iwi-iwi' anu tionyo ahi' otuluti sampe toka sidu-sidutu'. I Musa nombaumo susumo anu pinalentahkonmo nu Tumpu hi ia.