Read Saluan IMAMAT 19 Bible Online

IMAMAT 19 - Saluan bible

IMAMAT 19

¹Tumpu nompokaumo i Musa,

² da mompotoka hi bansa Israel palentah aiya, “Tionyo ahi' belemiu susi', kalana Aku Tumpu Allah nu belemiu susi'.

³ Toto samian tionyo ahi' mongadati tuuma ka' tinanyo ka' molame'akon sinaa nu Sabat susumo anu pinalentahkon-Kumo. Akumo na Tumpu Allah nu belemiu.

⁴ Boli monsombah pilogot. Boli mongala besak mosoni', tambaga, salaka obau patong ka' osombah na ia. Akumo na Tumpu Allah nu belemiu.

⁵De komiu monsombahkon binatang bau koloban pompodame, batuki na to atu-atulan anu binee'-Kumo da koloban aijo' Ku ala.

⁶Antoknyo tionyo ahi' okaanmo i sinaanyo pinongkolotanmo binatang aijo' kabai dodop sinaa. Antoknyo anu daagi' tinontuha' i sinaa ko itolunnyomo tionyo ahi' opotunumo iwi-iwi',

⁷kalana antoknyo aijo' madi'mo timbali okaan. De antoknyo aijo' sabole-bole okaan, koloban aijo' madi' Ku ala.

⁸De ihe na mongkaan antoknyo aijo' mohumpak kasala'an kalana madi' mongadati anu samata-mata binee'mo mae hi belengku. Mian aijo' madi'mo Ku posoop mian anu pinalesayamo hi beleng-Ku.

⁹ De belemiu mompadakmo, bolimo mompadak gandum anu tumuu' i duhu-duhuk nu ale' nu belemiu, ka' bolimo molimu' gandum anu pinala'ianmo salatan belemiu noko padakmo.

¹⁰Bolimo mompinsusule'i ale' nu anggur nu belemiu kahanda' molimu' bua' nu anggur anu tinontuha' salatan belemiu nontampu'unimo nompadak bua'nyo. Ka' mule' bua'nyo anu manabu'mo bolimo o ala nu belemiu. Bakasmo na aijo' baumo bagi nu to mia-mian kasiasi ka' mian anu lengkat mae i salipu'an. Akumo na Tumpu Allah nu belemiu.

¹¹ Boli mombuling, mongakali kabai baleko'.

¹² Boli balajanji' ototoangakon hi sanggong-Ku de belemiu madi' ko kahanda' mongganapi janji' aijo', kalana tiba jalan anu sumo aijo' belemiu mongambangimo sanggong-Ku. Akumo na Tumpu Allah nu belemiu.

¹³ Boli mongala anu nu sangalu nu belemiu, kabai mongagoi balangnyo. Tambonyo nu mian anu mokalaja hi belemiu sabole-bole ahi' obee' nu belemiu, boli montahan mau ola sampahu.

¹⁴ Boli montotobi'akon mian anu mabongon ka' boli mompotimpas batu, da bau tosumpunan nu mian mapisok hau-haunyo lumajang. Tionyo ahi' belemiu mongadati ka' okabuhuk na Aku, kalana Akumo na Tumpu Allah nu belemiu.

¹⁵ Belemiu tionyo ahi' boli tageo' de momputusi palakala, boli monsangaja'i mian anu kasiasi ka' boli mabuhuk hi mian anu kaya.

¹⁶Boli lewa' mombebakon sisik anu madi' totu'u hi to mia-mian sangko bansa nu belemiu, da belemiu boli monsaduakon kapatean hi bubuu' belemiu manusia. Akumo na Tumpu.

¹⁷ Boli lewa' mongingu mau mule' pa' ihe. Sampa baladame tiba maumo pa' ihe na mian anu nompaha sala'mo belemiu, da belemiu madi' baladosa' nusaduakon nu mian sangga'at.

¹⁸ Boli mombalosi kasala'an nu mian ka' boli mongka'ideki mian sangga'at, panyo kanonongi na sangko mian susumo belemiu mongkanonongi posi butong nu belemiu! Akumo na Tumpu.

¹⁹ Otuluti na palentah-ngKu haha aiya. Boli mompo'osoakon potuu'on anu misa' gampanyo. Boli mosu'an ohua' na ngahan nu anu osu'an i sa'angu' na ale'. Boli mompusok baju' anu tinonun ohua' na ngahan nu banang.

²⁰De samian na mo'ane balajanji', ia mompobalukmo botuannyo boune hi mo'ane sangga'at da bau ambahue'nyo ka' mian anu mongoli aijo' ma'isa nombayan, lantas tumpunyo anu momona mompaninduhusimo botuan aijo' ua-ua'aha tionyo ahi' o hukum, panyo madi' timbali o hukum mate, kalana mau mule' mosiamo boune aijo' daagi' botuannyo.

²¹Mo'ane aijo' tionyo ahi' momboa sa'angu' na domba lakinyo i ahop nu sabatan nu Kemah-Ku bau koloban polugi'i.

²²Imam tionyo ahi' mongkolobanakon domba aijo' bau pomposusi' da dosa' nu mian aijo' o ampuni. Sahingga Aku Tumpu Allah mongampunimo.

²³De belemiu minsoopmo i lipu' nu Kana'an ka' mosu'anmo ngangahan nu kau' anu okaan na bua'nyo kiijo' mae, saba' totolu' na taun na kopinnyo bua'nyo anu momona tionyo ahi' o anggap nu belemiu anu madi' timbali okaan nu belemiu.

²⁴I taun ko opatnyomo iwi-iwi' na bua'nyo tionyo ahi' osombahkonmo bau pontalima kase nu belemiu hi beleng-Ku, Tumpu.

²⁵I taun ko olima'nyoje atinaje' ka' bua'nyo timbalimo okaan. De atulan aijo' obau nu belemiu iwi-iwi', kau' anu okaan na bua'nyo aijo' mompaka pahampemo. Akumo na Tumpu Allah nu belemiu.

²⁶ Boli mongkaan baso'. Boli mompake pangatahuan.

²⁷ Boli monggunting ubak i habis nu belemiu, kabai mongkis jangkut nu belemiu.

²⁸Boli momboyo-boyot kilit nu belemiu kahanda' bau pontandai kabai mombelai butong nu belemiu salaku tanda sinusa'mo kalana ko anumo sinilaka. Akumo na Tumpu.

²⁹ Boli mongambangi anak nu belemiu boune kalana lako'mo opotimbali na aha anak masala' i laigan ponsomban pilogot. Mombau anu sumo aijo' alati'nyo belemiu mombusikimo lipu' nu belemiu, ka' palabuatan haha aijo' anu madi' talakana' molelemo ikiijo'.

³⁰ Lame'akon na sinaa nu Sabat ka' o adati na tampat anu tinantukanmo samata-mata bau ponsomban Aku. Akumo na Tumpu.

³¹ Boli belemiu mamba mompoita pikilan hi to sandosando anu saja' montunde santu' nu mian anu sinilakamo. De obaumo nu belemiu na aijo' belemiu mahumimi'mo. Akumo na Tumpu Allah nu belemiu.

³²O angga'i ka' o adati na to mia-mian anu motu'amo. Tionyo ahi' belemiu mongadati ka' okabuhuk na Aku, kalana Akumo na Tumpu.

³³ Boli opoposia na mian anu lengkat mae i Salipu'an anu jinojoongmo i lipu' nu belemiu.

³⁴Opalentah na aha susumo belemiu mompalentah to mia-mian anu bubuu' bansa nu belemiu ka' okanonongi na aha susumo belemiu mongkanonongi posi butong nu belemiu. Inau' saba' belemiu suele toho'mo jinojoong salaku mian anu lengkat mae i salipu'an tempo'nyo kiijo' mae i Mesir. Akumo na Tumpu Allah nu belemiu.

³⁵ Boli mongakali mian sangga'at mompakemo sukatan pontimbangan kabai pontakalan anu madi' totu'u.

³⁶Pake na meten, pontimbangan ka' pontakalan anu totu'u. Akumo na Tumpu Allah nu belemiu, ka' binoang-Kumo mae na belemiu nosabat lengkat mae i Mesir.

³⁷Otuluti iwi-iwi' na atulan ka' palentah-ngKu. Akumo na Tumpu.”