Read Saluan IMAMAT 2 Bible Online

IMAMAT 2 - Saluan bible

IMAMAT 2

¹De komian momboa koloban kaanon anu osombahkon hi Tumpu, koloban aijo' tionyo ahi' labu anu ma'ima' hondo, anu odudu'i nu lanya' nu zaitun ka' okakambuhi nu kamangian.

²Ia tionyo ahi' momboa hi to ima-imam lee' i Harun. Imam anu mokalaja tionyo ahi' mongala sangkakup na labu aijo' tiba lanya' nu zaitun ka' iwi-iwi' na kamangiannyo, lantas nu potunumo i mezbah salaku tanda saba' iwi-iwi' aijo' sinombahkonmo hi Tumpu. Nohongo nu koloban anu okaan aijo' momposanangmo kinyonyoa nu Tumpu.

³Labihnyo nu koloban anu sinombahkonmo baumo bagi nu to ima-imam. Koloban aijo' susi' hondo kalana ingala i kaanon anu sinombahkonmo hi Tumpu.

⁴De anu osombahkon aijo' roti anu tinunu i pontunuan, roti aijo' obau boli ogalo'i nu ragi. Roti aijo' timbali opodaka', labu anu ma'ima' hondo na o adon tiba lanya' nu zaitun, kabai yo kukis anu ola osauti nu lanya' nu zaitun.

⁵De anu osombahkon aijo' roti anu opanggang i tampat pompanggangan, roti aijo' tionyo ahi' labu anu ma'ima' hondo na obau tiba lanya' nu zaitun panyo madi' timbali ogalo'i ragi.

⁶Roti anu osombahkon aijo' tionyo ahi' o taya-tayap lantas odudu'i mo nu lanya' nu zaitun.

⁷De anu osombahkon aijo' roti anu o unjang i pamutu', roti aijo' tionyo ahi' labu anu ma'ima' hondo na obau ka' lanya' nu zaitun.

⁸Roti anu obau sumo aijo' tionyo ahi' osombahkon hi Tumpu ka' obee' hi imam anu momboa mokiijo' i mezbah.

⁹Roti aijo' sambagian nu ala nu Imam lantas opotunumo i mezbah salaku tanda saba' iwi-iwi' sinombahkonmo hi Tumpu. Nohongnyo momposanangmo kinyonyoa nu Tumpu.

¹⁰Labihnyo baumo bagi nu to ima-imam. Roti aijo' susi' hondo kalana ingala i kaanon anu sinombahkonmo hi Tumpu.

¹¹Koloban kaanon anu osombahkon hi Tumpu madi' timbali ogalo'i nu juu' nu uani', kabai ragi, kalana juu' nu uani' kabai ragi madi' timbali opotunu ka' osombahkon hi Tumpu.

¹²Isi nu ale' anu momonanyo o ala i taun aijo, sambahagian tionyo ahi' osombahkon hi Tumpu, panyo madi' timbali opotunu i mezbah.

¹³Batu-batu koloban kaanon anu osombahkon tionyo ahi' otimusoni, kalana timuson salaku tanda palajanjian nu Tumpu Allah hi belemiu. Jadi iwi-iwi' na anu osombahkon tionyo ahi' otimusoni.

¹⁴De belemiu monsombahkonmo hi Tumpu gandum anu momona pinadak miu, boa na gandum anu bu'ou anu inguja'mo binau labu kabai anu pinanggangmo.

¹⁵Gandum aijo' tionyo ahi' odudu'i nu lanya' nu zaitun ka' okakambuhi nu kamangian.

¹⁶Imam tionyo ahi' mompotunu sambagian na gandum aijo' tiba lanya' ka' iwi-iwi' na kamangiannyo salaku bau pontandai saba' iwi-iwi' aijo' sinombahkonmo hi Tumpu.