Read Saluan IMAMAT 22 Bible Online

IMAMAT 22 - Saluan bible

IMAMAT 22

¹Tumpu nompokaumo i Musa,

²da mompotokakon palentah aiya hi Harun ka' hi to ana-anaknyo, “Obau ahi' susumo anu sapantasnyo apaa na anu nu sombahkon nu aha bansa Israel anu obee' samata-mata hi beleng-Ku, da boli mombusiki sanggong-Ku anu susi'. Akumo na Tumpu.

³De samian na lee' nu beleyum anu nahumimi'mo ka' mongohanimo palasombahan anu susi' anu samata-mata nubee' nu bansa Israel hi beleng-Ku, ia madi'mo timbali mombau kalaja apa-apaa i mezbah. Atulan aijo' opake sampe toka sidu-sidutu'. Akumo na Tumpu.

⁴Samian na lee' i Harun anu kinonamo nu panyakit kilit anu monsilakai kabai sakit anu kiijo' i ka'ambangan sahingga ko anumo mae lumene, opoliwa' na mongkaan palasombahan anu susi', de ia ma'isa pe'e opoto'i belesi'. Samian na imam nahumimi'mo de ia monsala' kanyangmo anu mahumimi' kalana nonsala' toongimo mayat. Ia suele mahumimi'mo de mosabatmo na hamane'nyo,

⁵kabai monsala' kanyangmo binatang kabai mian anu nahumimi'mo.

⁶Samian na imam maumo pa' apaa na monsaduakon sahingga mahumimi'mo, tataapmo mahumimi' sangkutnyo sinaa makakinsapmo. Ka' de sinaa moko pakakinsapmo ia ma'isa timbali mongkaan kaanon anu sinombahkonmo hi Tumpu de ia ma'isa pe'e mindii'.

⁷Moko pakakinsap na sinaa ia belesi'mo atina'je ka' timbalimo mongkaan, kalana aijo' kaanonnyo.

⁸Ia opoliwa' boli mongkaan antok nu binatang anu mosi pate kabai anu sina'u nu binatang anu mahangas. De nu kaanmo, ia timbalimo mahumimi'. Akumo na Tumpu.

⁹Iwi-iwi' na imam tionyo ahi' montuluti atulan haha aiya anu binee'-Kumo. De madi', aha sala'mo ka' matemo kalana molanggaimo atulan haha aijo' anu susi'. Akumo na Tumpu, ka' Akumo na nontantukan aha da samata-mata mombau anu Ku palentahkon.

¹⁰Palasombahan anu samata-mata obee' hi beleng-Ku ola aha sa'anakan i imam aijo' na timbali mongkaan; mian sangga'at madi' timbali mau mule' mian aijo' jojoong sa'a-sa'angu'mo na laigan tiba imam aijo' kabai mian anu mongala tambo hi ia.

¹¹Panyo to botu-botuan anu ingolimo nu imam aijo' nu posi doinyo kabai anu pinohampe i uno nu laigannyo, timbali mongkaan bahagian kaanon nu imam aijo'.

¹²Anak boune nu imam anu no'osoamo tiba samian anu misa' imam, madi' timbali mongkaan anu sinombahkonmo aijo'.

¹³Panyo anak boune nu imam anu binalumo kabai anu gina'atakonmo panyo madi' kino anak lantas ninsusule'mo i laigan nu tuumanyo ka' timbalimo tanggungannyo, timbalimo mongkaan bahagian nu tuumanyo. Ola posi aha sa'anakan i imam na timbali mongkaan anu sinombahkon aijo'.

¹⁴De samian na anu misa' sa'anakan i imam saintolo-tolo mongkaanmo kaanon anu sinombahkon hi Tumpu, ia tionyo ahi' mombolosi hi imam opaka tuangi uampulu' na palasen.

¹⁵To ima-imam madi' timbali mohumimi'i anu osombahkon samata-mata hi beleng-ku,

¹⁶ka' de mompojohokmo da okaan nu samian anu madi' ko hak mongkaan. Han aijo' monsaduakonmo mian aijo' mohumpakmo kasala'an ka' monsaduakonmo da mohumpak hukuman na ia. Akumo na Tumpu, ka' Akumo na momposusi' anu osombahkon aijo'.”

¹⁷Tumpu nompokaumo i Musa,

¹⁸da mombee' hi Harun, hi to ana-anaknyo ka' hi iwi-iwi' na aha bansa Israel atulan haha aiya. De samian aha Israel kabai samian anu lengkat mae i salipu'an anu tataapmo jojoong i Israel monsombahkonmo koloban anu opotunu da bau pombayan anu jinanji'nyomo kabai bau koloban anu lengkat i kasanangan nu kinyonyoa, binatang aijo' tionyo ahi' lakinyo ka' madi' ko panyakitnyo da timbali Nu talima.

²⁰ Boli monsombahkon binatang anu ko panyakitnyo kalana Tumpu madi' montalima.

²¹De ko samian anu monsombahkon hi Tumpu koloban anu bau pompodame da pombayan anu jinanji'nyomo kabai koloban anu lengkat i kasanangan nu kinyonyoa, binatang aijo' madi' timbali anu ko panyakitnyo da timbali Nu talima.

²²Boli monsombahkon hi Tumpu binatang anu napisokmo, anu nopato'mo na bukunyo, kabai anu belaon, ko bisunnyo ninana'mo anu kinonamo nu panyakit kilit kabai kumahut. Binatang anu sumo aijo' madi' timbali osombahkon bau koloban kaanon i mezbah.

²³Koloban anu lengkat i kasanangan nu kinyonyoa, belemiu timbali monsombahkon binatang anu madi' talalo ma'ima' na butongnyo, panyode bau pombayan anu jinanji'mo, binatang anu sumo aijo' madi' otalima.

²⁴Boli monsombahkon hi Tumpu binatang anu ontolunyo i madi'anmo kalana ingipidon, sinayu'akonmo, bela i unonyo kabai ingalinakonmo. Han anu sumo aijo' madi' timbali obau i lipu' nu belemiu.

²⁵Potuu'on anu i humpak hi mian anu lengkat mae i salipu'an madi' timbali osombahkon bau koloban kaanon. Binatang aijo' o anggap anu ko panyakitnyo madi' timbali otalima.

²⁶Anak nu sapi', anak nu domba kabai anak nu mee' anu sala'je inganakakon tionyo ahi' opobatuk hi tinanyo kopinnyo pitun sinaa. Lapas aijo' timbalije binatang aijo' otalima bau koloban kaanon.

²⁸Boli mongkolobanakon tinanyo nu sapi' kabai domba kabai mee' hingga-hinggat tiba anaknyo i sinaa anu pokakana.

²⁹De belemiu monsombahkon koloban bau pontalima kase hi Tumpu, bau na aijo' ka' batuki na atulannyo da koloban nu belemiu otalima.

³⁰Kaanmo na koloban aijo' i sinaamo ai-aijo', ka' boli daagi' ko anu o una' mau ola sangkiding da okaanje dodop sinaa.

³¹Tumpu notatae, “Otuluti na palentah-ngKu haha aiya, Akumo na Tumpu.

³²Boli mombusiki sanggong-Ku anu susi'. Iwi-iwi' na aha bansa Israel tionyo ahi' monsombah Aku salaku Anu Susi' hondo. Akumo na tumpu, ka' Akumo na mompotimbali belemiu susi'.

³³Aku nomboamo mae belemiu nosabat lengkat i Mesir ka' Aku timbalimo Tumpu Allah nu belemiu. Akumo na Tumpu.”