Read Saluan IMAMAT 23 Bible Online

IMAMAT 23 - Saluan bible

IMAMAT 23

¹Tumpu nombee'mo hi Musa

²mosia na atulannyo molame'akon agama, anu tionyo obebakon salaku sinaa anu Olame'akon monsombah Tumpu.

³ Anom sinaa na mokalaja, panyo sinaa ko ipitunnyo sinaamo nu Sabat, atina' sinaamo nu pilawean anu obee'mo samata-mata sinaa monsombah Tumpu, ka' sinaa aijo' belemiu tionyo ahi' sihukmo da monsombahmo ka' madi'mo timbali mokalaja.

⁴Aiyamo na sinaa anu olame'akon anu pinotataapmo nu Tumpu ka' tionyo ahi' obebakon i tempo'nyo anu tinantukanmo.

⁵ Sinaa Lamean nu Paskah anu olame'akon aijo' bau pongadati Tumpu, otampu'uni salatan sinaa makakinsapmo i tanggan sampulu' ka' opat bitu'on momonanyo.

⁶ Dodopnyo sinaa tangganmo sampulu' ka' olima', montampu'unimo Molame'akon Roti anu madi' ko Raginyo ka' kopinnyo pitun sinaa aijo' belemiu madi' timbali mongkaan roti anu binau ko raginyo.

⁷Pitun sinaa na kopinnyo belemiu tionyo ahi' monsombahkon koloban kaanon hi Tumpu. I sinaa momonanyo ka' ko ipitunnyomo na molame'akon aijo' belemiu tionyo ahi' sihukmo da monsombahmo ka' madi'mo timbali mombau kalaja anu maboat.

⁹De belemiu tokamo i lipu' anu binee'mo nu Tumpu hi belemiu, ka' molimu' hasin nu ale', timpannyo nu gandum anu momonamo tionyo ahi' oboa hi imam.

¹¹Toka i sinaa de lapasmo na sinaa nu Sabat, imam tionyo ahi' monsombahkonmo gandum aijo' salaku palasombahan anu oboa hi Tumpu da Tumpu sanangmo hi belemiu.

¹²Toka i sinaanyo belemiu monsombahkonmo gandum aijo', belemiu suele tionyo ahi' monsombahkon koloban anu opotunu sa'angu' na anak nu domba lakinyo umunnyo sataunmo ka' madi' ko panyakitnyo.

¹³Koloban kaanon sombahkon ohua' na kilogram labu ogalo'i lanya' nu zaitun. Nohongnyo nu koloban aijo' momposanangmo kinyonyoa nu Tumpu. Hingga-hinggat tiba aijo' suele sombahkonmo sa'angu' na liter na anggur.

¹⁴Ma'isa pe'e momboa anu osombahkon aijo' hi Tumpu, belemiu madi' timbali mongkaan mau ola sangkiding na gandum anu bu'ou aijo', mau daagi' mata, pinanggang kabai tinunu binau roti. Atulan aijo' tionyo ahi' otuluti nu lee' nu belemiu iwi-iwi' sampe toka sidu-sidutu'.

¹⁵ Moko lapas na sinaa nu Sabat salatan belemiu monsombahkonmo hi Tumpu timpan nu gandum anu momona pinadak, belemiu tionyo ahi' mombilangi sampe sukup popitu' na duminggu.

¹⁶Toka i sinaa ko limampulu'nyo, salatan lapasmo na sinaa nu Sabat anu ko ipitunnyomo, belemiu tionyo ahi' momboamo koloban kaanon hi Tumpu.

¹⁷Toto sangauwan tionyo ahi' monsombahkon ohua' na roti bau palasombahan anu obee' hi Tumpu. Roti haha aijo' tionyo ahi' obau ohua' na kilogram na labu anu ma'ima' hondo ogalo'i ragi ka' tionyo ahi' obee' hi Tumpu salaku palasombahan hasin nu ale' anu momonanyo.

¹⁸Hingga-hinggat tiba roti aijo' aha bansa Israel tionyo ahi' monsombahkon popitu' na anak nu domba anu umunnyo sataunmo, sa'angu' na sapi' lakinyo anu daagi' bata'nyo ka' ohua' na mee'. Toto sa'angu' madi' timbali ko panyakitnyo ka' tionyo ahi' osombahkon bau koloban anu opotunu bau bagi nu Tumpu, tiba koloban anu okaan ka' koloban anggur. Hongohisnyo nu koloban aijo' momposanangmo kinyonyoa nu Tumpu.

¹⁹Osombahkon suele sa'angu' na mee' lakinyo bau koloban pongampuni dosa' ka' ohua' na domba lakinyo anu umunnyo sataunmo bau koloban pompodame.

²⁰Roti ka' ohua' na anak nu domba aijo' tionyo ahi' osombahkon nu imam salaku palasombahan anu obee' hi Tumpu, ka' aijo' baumo bagi' nu imam. Palasombahan haha aijo' susi'.

²¹Toka i sinaa aijo' belemiu tionyo ahi' sihukmo da monsombahmo Tumpu ka' madi'mo timbali mombau kalaja anu maboat. Atulan aijo' tionyo ahi' otuluti nu lee' nu belemiu sampe toka sidu-sidutu', maumo pa' iya mae na kajojoongan nu aha.

²² De belemiu mompadakmo, boli opadak na gandum anu tumuu' i habe' nu ale' nu belemiu ka' boli po'ule' mompinsusule'i gandum anu pinala'ianmo de lapasmo moko padak. Pojohokmo da nu ala nu mian kasiasi ka' mian anu lengkat mae i salipu'an. Tumpu atina'mo na Tumpu Allah nu belemiu.

²³Tanggan sa'angu' bitu'on ko popitu'nyo tionyo ahi' olame'akon salaku sinaa anu samata-mata pilaweanmo. Sinaa aijo' mompo'onyi'mo tolompet salaku bau tanda da belemiu tionyo ahi' sihukmo da monsombahmo.

²⁵Osombahkon na koloban kaanon hi Tumpu ka' madi'mo timbali mombau kalaja anu maboat i sinaa aijo'.

²⁶ Tanggan sampulu' bitu'on ko popitu'nyo aijo'mo na sinaa anu saja' olabot sataun toka sataun bau pongampunian dosa' nu aha Israel. Toka i sinaa aijo' belemiu tionyo ahi' bapuasa' ka' sihukmo da monsombahmo ka' monsombahkonmo koloban kaanon hi Tumpu.

²⁸Boli mokalaja kalana sinaa ai-aijo'mo na sinaa pongampunian dosa', da belemiu o ampuni i ahop nu Tumpu Allah nu belemiu.

²⁹De ihe na mongkaan apa-apaa i sinaa aijo' madi'mo daagi' oposoop mian anu pinalesayamo hi Tumpu Allah.

³⁰Ka' ihe na mombau pakalajaan i sinaa aijo', nu hukumo nu Tumpu nu hukuman mate.

³¹Atulan aijo' opokona hi iwi-iwi' lee' nu belemiu maumo pa' iya mae na kajojoongan nu aha.

³²Salatan sinaa makakinsapmo i tanggan osio' i bitu'on aijo', sampe toka sinaa makakinsapmo i tanggan sampulu' tionyo ahi' belemiu molame'akonmo susumo sinaa nu Sabat, sinaa anu samata-mata bau pilawean. Belemiu tionyo ahi' puasa' i sinaa aijo'.

³³ Bau-bauon Tahop o atopi nu Hon nu kau' otampu'uni i tanggan sampulu' ka' olima' bitu'on ko popitu'nyo ka' kopinnyo pitun sinaa.

³⁵Kopinnyo pitun sinaa aijo', sansina-sinaa belemiu tionyo ahi' monsombahkon koloban kaanon. I sinaa momonanyo ka' ko ialunnyo belemiu tionyo ahi' sihukmo da monsombahmo ka' monsombahkonmo koloban kaanon hi Tumpu. Bolimo mombau kalaja anu maboat i sinaa aijo'.

³⁷Aijo'mo na sinaa molameanakon agama anu tinantukanmo nu Tumpu ka' anu tionyo ahi' obebakon nu belemiu. I sinaa molameanakon lamean aijo', belemiu tionyo ahi' mongadati Tumpu ka' sihukmo da monsombahmo ka' monsombahkonmo koloban kaanon, koloban anu opotunu, koloban anu obee' hi Tumpu, koloban binatang ka' koloban anggur konjoo'nyo sainsampa' anu opalalui sansina-sinaa.

³⁸Lamean haha aijo' salaku bau pontuangi sinaa nu Sabat anu bia-biasamo, jadi palasombahan haha aijo' suele mompaka tuangi anu bia-biasamo saja' obee' nu belemiu, i koloban nu belemiu pontobus anu jinanji'mo, kabai koloban kalana kasanangan nu kinyonyoa anu binee'mo nu belemiu hi Tumpu.

³⁹ De noko padakmo, otampu'uni i tanggan sampulu' ka' olima' bitu'on ko popitu'nyo, komiu tionyo ahi' molameanmo kopinnyo pitun sinaa. Sinaa momonanyo ka' ko ialunnyo atina'mo na sinaa anu samata-mata bau pilawean.

⁴⁰Sinaa momonanyo belemiu tionyo ahi' mongalamo to bua-bua' nu kau' anu talalo hondo ma'ima' i ale' nu belemiu, ka' suele to hohon nu palma ka' to panga-panga' nu kau' anu hoopo', lantas otampu'unimo na molameanakon salaku kabilahian bau pongadati Tumpu Allah nu belemiu.

⁴¹Lamean aijo' tionyo ahi' obau nu belemiu kopinnyo pitun sinaa. Atulan aijo' tionyo ahi' obau nu lee' nu belemiu sampe toka sidu-sidutu'.

⁴²Pitun sinaa na kopinnyo iwi-iwi' na bansa Israel tionyo ahi' jojoong i uno nu tahop anu o atopi nu hon nu kau',

⁴³da lee' nu belemiu monsumbu' taalu' Tumpu nonsaimo aha bansa Israel jojoong i uno nu to taho-tahop anu madi' talalo ma'ima', salatan Ia nonsabatakonmo aha lengkat mae i Mesir. Iamo na Tumpu Allah nu belemiu.

⁴⁴Sumo aijo' na i Musa nompotoka hi aha bansa Israel atulan haha aijo' mosia na molameanakon bau pongangga'i Tumpu.