Read Saluan IMAMAT 24 Bible Online

IMAMAT 24 - Saluan bible

IMAMAT 24

¹Tumpu nompokaumo i Musa

²da mombee'i palentah haha aiya hi bansa Israel. Boamae na lanya' nu zaitun anu madi' ko galo'nyo ka' anu talalo hondo ma'ima' da opake i lampu nu Kemah nu Tumpu, da otutungi ka' saja' ia sabole-bole moak.

³I Harun tionyo ahi' mongkalesang lampu haha aijo' lengkat pe'e mamalom sangkutnyo toka subu i tampat katokaan nu Tumpu i sambiha' nu lalanse' anu mongkukubi Peti' Palajanjian i Salipi' anu Susi' hondo. Palentah aijo' tionyo ahi' obau sampe toka sidu-sidutu'.

⁴I Harun tionyo ahi' mongkalesang lampu' haha aijo' anu i tengkenyo nu lampu anu mosoni madi' ko galo'nyo na binau da tataap moak i uno nu Kemah nu Tumpu.

⁵ O'ala sampulu' ka' ohua' na kilogram na labu anu ma'ima' hondo ka' baumo sampulu' ka' ohua' na roti anu timpodon, toto sa'angu', sa'angu' na kilogram na labu'anu obau.

⁶Opotimpas na roti aijo' ohua' na susunannyo, toto anom na roti aijo' i meja' anu i lapisan nu mosoni' anu madi' ko galo'nyo anu inguna' i uno nu Kemah nu Tumpu.

⁷O'una'i kamangian anu madi' ko galo'nyo hi toto sa'angu' na susunnyo da bau pontandai saba' roti aijo' koloban kaanon anu obee' hi Tumpu.

⁸De sinaamo nu Sabat tionyo ahi' ko roti anu osombahkon i uno nu Kemah nu Tumpu. Aijo'mo na anu saja' nubau nu aha bansa Israel sampe toka sidu-sidutu'.

⁹ Roti aijo' bau bagi i Harun ka' lee'nyo. Tionyo ahi' nukaan nu aha i tampat anu susi', kalana roti aijo' sumo-sumomo bahagian anu talalo hondo susi', anu o ala i koloban kaanon anu osombahkon hi Tumpu bau bagi nu to ima-imam.

¹⁰I Kemah nu aha mian Israel daagi' ko samian na mo'ane. Tuumanyo mian nu Mesir ka' tinanyo mian nu Israel sanggonyo i Selomit, anak i Dibri nolengkat mae hi tulunan nu aha bansa Dan. Daagi' kino sansinaan mian aijo' pinainggagamo tiba samian aha mian nu Israel i kemah. Tempo'nyo pinainggaga, ia nontotobi'akonmo Tumpu Allah. Kalana aijo' aha mian nu Israel nomboamo ia nangadap hi Musa,

¹²ka' pinojoongmo na ia hau-haunyo daagi' montanda'i katantuan nu Tumpu pa' apaa na anu tionyo nubau nu aha hi ia.

¹³Tumpu notataemo hi Musa,

¹⁴“Boa na mian atina' i sambiha' nu kemah. Batu-batu mian anu nohongomo ia nontotobi'akon tionyo ahi' mompotudun limanyo i ubak nu mian aijo' da ponsumbu'an taalu' ia sinala'mo. Lantas iwi-iwi' na mian tionyo ahi' mompahambunu'akon ia nu batu sampe mate.

¹⁵Lapas aijo' bebakonmo na aiya hi bansa Israel. De ihe na montotobi'akon Tumpu Allah tionyo ahi' montalima apaa na anu jadi saidi' mae,

¹⁶ka' obee'i hukuman mate. Maumo ihe na montotobi'akon Tumpu tionyo ahi' opahambunu'akon nu batu sampe mate nu aha iwi-iwi' na jama'at. Hukuman aijo' opokona hi aha mian nu Israel ka' suele hi mian anu lengkat mae i salipu'an anu tinataapmo hi aha Israel.

¹⁷ De ihe na mompatei mian sangga'at tionyo ahi' obee' hukuman mate.

¹⁸De ihe na mompatei binatang nu mian sangga'at, ia tionyo ahi' mombolosi. Atulannyo 'nyawa obolosi nu nyawa.'

¹⁹De ko mian nompoposiamo mian sangga'at lantas pinisala'onmo maumo pa' apaa na anu binaunyomo, tionyo ahi' obau suele hi ia.

²⁰ De ia nompato'mo bukunyo, saba' bukunyo suele na opato'akon. De ia nompisokimo mata sambiha' nu mian, mata sambiha suele na opisoki. De ia nonjagunmo mian sangga'at sampe notipu na bese'nyo saba' bese'nyo suele tionyo ahi' otipuakon. Maumo pa' apaa na anu binaunyomo sahingga mian sangga'at pinisala'onmo, tionyo ahi' suele obau hi ia salaku bau pombolosi.

²¹De ihe na nompateimo binatang tionyo ahi' mombolosi, panyo de ihe na nompateimo manusia tionyo ahi' obee'i hukuman mate.

²² Hukuman aijo' kona hi belemiu iwi-iwi' ka' suele hi mian anu lengkat mae i salipu'an anu tataapmo atina' hi belemiu, kalana Akumo na Tumpu, Tumpu Allah nu belemiu.”

²³Noko lapas na i Musa nompotokakon potatae aijo' hi bansa Israel, aha nomboamo mian anu nontotobi'akonmo Tumpu Allah aijo' i sambiha'nyo nu kemah lantas pinahambunu'akonmo na ia nu batu sampe i nate. Tiba jalan anu sumo aijo' bansa Israel nombaumo apaa na anu pinalentakonmo nu Tumpu hi Musa.