Read Saluan IMAMAT 25 Bible Online

IMAMAT 25 - Saluan bible

IMAMAT 25

¹ Aita' i Bungkutnyo nu Sinai Tumpu notataemo hi Musa ka' nonsaimo ia

²da mompotokakon atulan haha aiya hi bansa Israel. De belemiu minsoopmo i lipu' anu nubee'je nu Tumpu hi belemiu, belemiu tionyo ahi' mongadati Tumpu, sumo uuka na obau. De taunmo ko popitu'nyo belemiu madi'mo timbali mombau ale' ka' mosu'an apa-apaa.

³Anom na taun na kopinnyo belemiu tionyo ahi' monsu'ani ale' nu belemiu ka' montumpo'i anggur nu belemiu, i ale' nu belemiu ka' mule' mongala isi nu ale' nu belemiu.

⁴Panyo de taun ko popitu'nyomo aijo' samata-mata anumo nu Tumpu. Jadi i uno nu sataun aijo' tano' aijo' tionyo ahi' opojohokmo ka' madi'mo timbali okalaja. Bolimo monsu'ani ale' ka' bolimo montumpo'i anggur nu belemiu.

⁵Ka' mule' gandum anu nosi tumuu' kabai bua' nu anggur aijo' anu i anggur nu belemiu anu madi' tinumpo'an, madi' timbali o ala ka' opo'una' nu belemiu, kalana taunmo aijo' na taun pilawean nu tano' aijo'.

⁶Maumo sumo aijo', tano' aijo' ko hasinnyo ahi' da timbali kaanon nu belemiu, to botu-botuan, to mia-mian anu mongala tambo hi belemiu ka' to mia-mian anu lengkat mae i salipu'an anu jojoong tiba belemiu.

⁷Ka' suele da nu otot nu to potu-potuu'on nu belemiu ka' to bina-binatang anu ma'ela' i lipu' nu belemiu. Iwi-iwi' na isi nu tano' aijo' timbali okaan.

⁸Obilang pimpitun lipat na taun konjoo'nyo patompulu' ka' osio' na taun.

⁹Lantas tanggan sampulu' bitu'on ko popitu'nyomo, aijo'mo na sinaa pongampunian dosa', pokaumo na mian mompo'onyi' tolompet iyaya mae songko-songko na lipu'.

¹⁰Belemiu tionyo ahi' montantukanmo samata-mata taun ko limampulu'nyo, ka' mombebakonmo kabebasan hi iwi-iwi' na mian anu jojoong i lipu' nu belemiu. I uno nu taun aijo' iwi-iwi' na halata' anu pinobalukmo tionyo ahi' osule'akonmo hi tumpunyo anu momona kabai hi lee'nyo mae. Ihe na anu pinobalukmo salaku botuan tionyo ahi' osule'akonmo hi to utu-utusnyo.

¹¹Boli monsu'ani ale' nu belemiu. Gandum anu nosi tumuu' kabai bua' nu anggur i ale' nu anggur anu itina' hi belemiu anu madi' tinumpo'an, madi' timbali o ala nu belemiu ka' opo'una'!

¹²Taun aijo' salakumo taun anu susi' hi belemiu. Belemiu ola timbali mongkaan apaa na anu nosi tumuu' i ale'nu belemiu.

¹³I uno nu taun aijo' iwi-iwi' na tano' anu pinobalukmo tionyo ahi' osule'akonmo hi tumpunyo anu momona.

¹⁴Jadi de belemiu mompobaluk tano' hi bubu' belemiu mian Israel, kabai mongoli tano' hi ia, boli mompaha poba-pobaluki padahan kinyonyoanyo tageo'.

¹⁵Oli nu tano' aijo' tionyo ahi' opotataap susumo konjoo'nyo nu taun tano' aijo' daagi' mohasinakon sampe toka i Taun Ponsule'akonanmo anu aiya mae i ahop.

¹⁶De konjoo'nyo nu taun aijo' manjoo', oli nu tano' aijo' mahanmo. Panyo de konjoo'nyo nu taun aijo' sangkiding olinyo tionyo ahi' dengke, kalana anu opobaluk aijo', te hasin nu anu opadak pa' sangkuka na konjoo'nyo.

¹⁷Boli mongakali bubu' belemiu mian nu Israel, panyo tionyo ahi' belemiu mabuhuk hi Tumpu, Tumpu Allah nu belemiu.

¹⁸Otuluti iwi-iwi' na atulan ka' palentah nu Tumpu da belemiu tumuu' madi' ko anu mompoposia i lipu' aijo'.

¹⁹Tano' nu lipu' aijo' ko hasinnyoje sahingga belemiu ko kaanonmo anu sukup ka' jojoongmo kiijo' mae sanangmo.

²⁰Panyo ugaat daagi' ko anu mompokilawa pa' apaa na anu okaan popitu' na taun na kopinnyo de tano' madi'mo osu'ani ka' hasinnyo madi'mo ko anu o ala.

²¹I taun ko anomnyo Tumpu mombalakatije tano' sahingga hasinnyo nu sukupi totolu' na taun.

²²Ka' de belemiu monsu'animo ale' nu belemiu i taun ko ialunnyomo, anu pinadak i taun ko anomnyo daagi' ko anu okaan miu. Aitu pe'e kaanon anu pinosadiamo nu belemiu timbali nu sukupi toka i tempo'nyo de belemiu mongalamo hasin nu taun aijo'.

²³Tano' nu belemiu madi' timbali opobaluk sidu-sidutu'mo kalana tano' aijo' misa' belemiu na tumpunyo panyo anu nu Tumpu Allah. Belemiu ola susumo mian anu lengkat mae i salipu'an anu pinoloasmo da mompake tano' aijo'.

²⁴De santake na tano' opobalukmo, tionyo ahi' o akui na hak nu tumpunyo anu momona, anu po'ule' mololo'i tano' aijo'.

²⁵De samian na aha mian Israel kinasiasimo sahingga ia mompobalukmo tano'nyo, anu daagi' hondo ohani na moto utus na tionyo mololo'i tano' aijo'.

²⁶De madi' ko mian anu mololo'i panyo tumpunyo aijo' saidi' mae moko alamo ka' sukupmo na doinyo mololo'i tano' aijo',

²⁷sahingga ia tionyo ahi' mombayan hi mian anu mongolimo tano'nyo, angga'nyo sumo hasin nu ale'nyo aijo' i taun-taun aiya mae i ahop, sangkutnyo toka i Taun Ponsule'akonanmo. Atina'je ka' po'ule' nuhumpak na tano'nyo.

²⁸Panyo de ia madi' moko ala mololo'i tano'nyo, mian anu nongolimo tataap mongkuasai tano' aijo' sampe toka i Taun Ponsule'akonanmo aiya mae i ahop. Toka i taun aijo' tano' aijo' tionyo ahi' usule'akonmo hi tumpunyo anu momona.

²⁹De ko mian mompobaluk sa'angu' na laigan i uno nu kota anu ko pagannyo mesen, saba' ia ko hak mololo'i laigannyo i uno nu tempo' sa'angu' na taun olekeng lengkat pe'e i tanggan pinompobalukan.

³⁰Panyo de laigan aijo' madi'mo nu lolo'i i uno nu tempo' sataun, aba' madi'mo daagi' ko haknyo na mololo'i. Laigan aijo' tataapmo tumpunyo mianmo anu nongolimo ka' lee'nyo. I uno nu Taun Ponsule'akonanmo, Laigan aijo' madi'mo daagi' osule'akon.

³¹De laigan i kampung ise' anu madi' ko pagannyo mesen, daagi' ko atulannyo pokakana susumo oli nu tano'; tumpunyo anu momona ko hak mololo'i ka' laigan aijo' tionyo ahi' osule'akon i Taun Ponsule'akonanmo.

³²Panyo aha mian Lewi ko hak maumo pa' tempo' apaa na mololo'i halata' nu aha i to kota-kota anu tinantukanmo hi aha.

³³De ko samian na aha mian nu Lewi mompobaluk laigannyo i sala' sa'angu' na kota aijo' ka' ia madi' mololo'i, laigan aijo' tionyo ahi' osule'akon hi ia i Taun Ponsule'akonanmo. Kalana laigan nu aha mian nu Lewi i kota nu aha haha aijo' aha na tumpunyo, anu tataapmo hi aha bansa Israel.

³⁴Panyo hemput padang anu ohani i kota nu aha tulunan bansa Lewi madi' timbali opobaluk. Aijo' aha mian nu Lewi na tumpunyo sampe toka sidu-sidutu'.

³⁵ De mian sangko bansa nu belemiu anu atina' hi belemiu kasiasimo ka' madi'mo moko ala molio bau kantumuu'annyo, belemiu tionyo ahi' montulungimo ia sumo samian anu lengkat mae i salipu'an kabai mian anu lengkat mae i lipu' sangga'at da ia moko ala tumuu' atina' hi belemiu.

³⁶ Boli momoita sabonnyo i anu pinosabonmo hi ia panyo tionyo ahi okabuhuk nu belemiu na Tumpu Allah nu belemiu, ka' pobee' na mian aijo' jojoong atina' hi belemiu. Boli mongala ka'untungan i kaanon anu opobaluk nu belemiu hi ia.

³⁷

³⁸Aijo'mo na palentah nu Tumpu Allah nu belemiu anu nomboamo belemiu nosabat mae lengkat i Mesir ka' nombee'mo lipu' nu Kana'an hi belemiu da ia timbalimo Tumpu Allah nu belemiu.

³⁹ De mian anu sangko bansa nu belemiu anu atina' hi belemiu kinasiasimo sahingga pinobaluknyomo na butongnyo salaku botuan hi belemiu, mian aijo' madi' timbali opokau nu belemiu mokalaja susumo samian na botuan.

⁴⁰Ia tionyo ahi' jojoong hi belemiu susumo samian anu ola mongala tambo ka' mokalaja hi belemiu sampe toka i Taun Ponsule'akonan.

⁴¹Tempo'nyo aitu ia ka' to ana-anaknyo timbalimo mompala'i laigan nu belemiu ka' minsusule'mo hi to utu-utusnyo ka' i tano' nu mompolee'nyo.

⁴²Mian nu Israel to posa-posaihon nu Tumpu; Iamo na anu nomboa mae aha nosabat lengkat mae i Mesir kalana aijo' aha madi' timbali opobaluk salaku botuan,

⁴³Jadi mian nu Israel anu nompobalukmo butongnyo hi belemiu madi' timbali osigohi nu belemiu. Tionyo ahi' belemiu mabuhuk hi Tumpu Allah nu belemiu.

⁴⁴De belemiu mompalalui botuan, belemiu timbali mongoli hi to bansa-bansa anu atina' hi belemiu.

⁴⁵Belemiu timbali suele mongoli to ana-anak nu mian anu lengkat mae i salipu'an anu tinataapmo atina' hi belemiu. To ana-anak nu mian anu lengkat mae i salipu'an anu i hampe i lipu' nu belemiu timbali o ala nu belemiu

⁴⁶ka' timbali mule' obee' nu belemiu hi to ana-anak nu belemiu da bau botuan nu aha sampe toka sidu-sidutu'. Panyo bubu' belemiu mian nu Israel madi' timbali osigohi nu belemiu.

⁴⁷De ko samian anu lengkat mae i salipu'an anu atina' hi belemiu kinayamo ka' daagi' ko anu bubu' belemiu mian nu Israel kinasiasimo sahingga ia nompobalukmo butongnyo da timbali botuan hi mian anu lengkat mae i salipu'an aijo' kabai hi to utu-utusnyo,

⁴⁸mian nu Israel aijo' tataap ko hak da ololo'i. Samian na utusnyo mo'ane,

⁴⁹kabai babo'nyo, kabai tominsannyo, kabai mian sangga'at sangalunyo anu mompaha sumbu' hondo, timbali mololo'i ia. Kabai de ia na saidi' mae moko alamo mololo'i, ia timbali mololo'i butongnyo.

⁵⁰Botuan aijo' tionyo ahi' basale' tiba mian anu nongolimo ia. Aha tionyo ahi' molekeng konjoo'nyo nu taun salatanmo pe'e butongnyo pinobaluk salaku botuan tinoka i Taun Ponsule'akonnanmo anu aiya mae i ahop, lantas otantukanmo na olinyo bau pololo'i ia. Olinyo aijo' tionyo ahi' otantukan susumo molekeng tambo anu obee' hi mian anu molio tambo.

⁵¹Botuan aijo' tionyo ahi' monsule'akon angga'nyo anu pinongoli butongnyo konjoo'nyo sumo tambo nu samian anu nongalamo tambo kopinnyo sumo konjoo'nyo nu taun anu ma'isa ia nokalaja

⁵²

⁵³susumo ia nokalaja mo salaku mian anu nongala tambo anu otamboije de sataunmo. Tuannyo madi' timbali masigo hi ia.

⁵⁴De ia madi' opoko ala ololo'i susumo sala'sa'angu' na jalan aijo', ia ka' to ana-anaknyo tionyo ahi' opobebasmo i Taun Ponsule'akonan anu aiya mae i ahop.

⁵⁵Samian na mian nu Israel madi' timbali bau botuan sampe toka sidu-sidutu'mo i kantumuu'annyo, kalana bansa nu Israel to posa-posaihon nu Tumpu. Tumpu na nomboa mae aha nosabat lengkat mae i Mesir. Iamo na Tumpu, Tumpu Allah nu aha.