Read Saluan IMAMAT 7 Bible Online

IMAMAT 7 - Saluan bible

IMAMAT 7

¹Aiyamo na to atu-atulannyo mongkona koloban bau polugi'i. Koloban aijo' talalo hondo susi'.

²Binatang anu okolobanakon tionyo ahi' o kolot i tampat pongkolotan binatang koloban anu opotunu, lantas baso'nyo odudu'akon i opa-opat na sulapa'nyo nu mezbah.

³Imam tionyo ahi' monsombahkon i mezbah iwi-iwi' na lompo'nyo nu binatang aijo', aijo'mo: Ikunyo anu ko lompo'nyo, tohitisnyo anu monsalaputi isi nu kompongnyo, dampilannyo tiba lompo'nyo ka' bahagian anu talalo hondo ma'ima' i atenyo.

⁵Iwi-iwi' aijo' tionyo ahi' opotunu i mezbah salaku koloban kaanon anu osombahkon hi Tumpu. Koloban aijo' bau koloban polugi'i.

⁶Batu-batu mo'ane anu i uno nu auwan nu to ima-imam timbali mongkaan antoknyo nu koloban aijo' panyo aha tionyo ahi' mongkaan i tampat anu samata-mata bau pongkaanan, kalana koloban aijo' susi' hondo.

⁷Koloban anu bau pongampuni dosa' ka' koloban bau polugi'i atulannyo anu opake pokakana, aijo'mo; Antoknyo nu potuu'on anu okolobanakon aijo' bagi nu imam anu monsombahkon.

⁸Kilitnyo suele nu potuu'on aijo' bagi nu imam.

⁹Batu-batu koloban kaanon anu osombahkon ka' opotunu i pompotunuan kabai o unjang i pamutu' kabai otapa'i, baumo bagi nu imam anu monsombahkon.

¹⁰Panyo koloban kaanon anu osombahkon anu madi' o unjang, mau anu ogalo'i nu lanya' kabai anu tinapa'anmo, iwi-iwi' baumo bagi nu to ima-imam, lee' i Harun, ka' tionyo ahi' obagi pokakana nu aha.

¹¹Aiya na to atu-atulannyo mongkona koloban bau pompodame anu osombahkon hi Tumpu.

¹²De koloban aijo' osombahkon bau pontalima kase, saba' tiba binatang aijo' tionyo ahi' okolobanakon suele na roti anu madi' ogalo'i ragi. Roti aijo' timbali opodaka' na mongkompon labu tiba lanya' zaitun, kabai roti anu ise' pinanggang anu osapui nu lanya', kabai labu na obau kukis ogalo'i nu lanya' nu zaitun.

¹³Ka' sangga'at mule' anu tionyo ahi' osombahkon, roti anu ogalo'i ragi.

¹⁴Toto sangahan na roti sambahagian na tionyo ahi' osombahkon hi Tumpu ka' aijo' anumo nu imam anu nongala baso' nu binatang aijo' ka' nondudu'akon i mezbah bau koloban pompodame.

¹⁵Antoknyo aijo' tionyo ahi' okaanmo i sinaanyo binatang aijo' sinombahkon, anu sangkiding madi' timbali opotuha' toka dodop subu.

¹⁶De ko mian momboa koloban bau pompodame mongganapi niatnyo, kabai bau koloban kasanangan nu kinyonyoa, madi' palalu okaan iwi-iwi' i sinaa aijo'. Labinyo timbali okaanje dodop.

¹⁷De tokamo i ko itolunnyo daagi' ko labinyo, antoknyo aijo' tionyo ahi' opotunu ingko-ingkot.

¹⁸Panyo de toka i ko itolunnyo antoknyo aijo' sabole-bole ahi' okaan, saba' koloban aijo' madi'mo nutalima ka' madi'mo ko balakatnyo hi mian aijo', pakalaus timbalimo anu madi' pantas okaan. Mian anu mongkaan mohumpakmo kasala'an ka' montanggungmo kasala'annyo.

¹⁹Antoknyo anu nukonamo nu han anu mahumimi' tionyo ahi' opotunu iwi-iwi' ka' madi'mo timbali okaan. Antoknyo nu koloban anu bau pompodame anu timbali mongkaan ola mian anu madi' mahumimi'.

²⁰De mian mongkaan antoknyo aijo' hau-haunyo ia mahumimi' ia madi'mo oposoop mian anu pinalesayamo hi Tumpu Allah.

²¹De ko mian mongkaan antoknyo nu koloban aijo' padahan ia nongkanyangmo anu mahumimi', mau anu lengkat hi manusia mau pe'e lengkat i binatang, ia suele madi'mo oposoop mian anu pinalesayamo hi Tumpu Allah.

²²Tumpu nombee'mo hi Musa atulan haha aiya,

²³kona hi bansa Israel. Lompo'nyo nu sapi', domba kabai mee' madi' timbali okaan.

²⁴Lompo'nyo nu binatang anu nosi pate kabai anu sina'u nu binatang mahangas anu mongkaan sangko binatangnyo madi' timbali okaan panyo timbali opake i kapalaluan sangga'at.

²⁵Mian anu mongkaan lompo'nyo nu binatang anu timbali osombahkon bau koloban kaanon hi Tumpu Allah, madi'mo daagi' oposoop mian anu pinalesayamo hi Tumpu Allah.

²⁶ Mian nu Israel, maumo pa' iyamo mae na kajojoongannyo madi' timbali mongkaan baso' nu tomonsi' kabai baso' nu binatang sangga'at.

²⁷Ihe na molanggai atulan aijo' madi'mo timbali oposoop mian anu pinalesayamo hi Tumpu Allah.

²⁸Tumpu nombee'mo hi Musa atulan haha aiya,

²⁹kona hi bansa Israel. Ihe na momboa koloban bau pompodame tionyo ahi' mompo'iwi' sambahagian anu osombahkon samata-mata hi Tumpu.

³⁰Posi ia na tionyo ahi' momboa koloban kaanon aijo'. Lompo'nyo ka' saha'annyo nu binatang aijo' tionyo ahi' osombahkon salaku anu oboa i ahop nu Tumpu.

³¹Imam tionyo ahi' mompotunu lompo'nyo nu binatang aijo' i mezbah, panyo saha'annyo baumo bagi nu to ima-imam.

³²Pa'anyo koanan tionyo ahi' obee' salaku samata-mata bau pontulungi,

³³hi imam anu monsombahkon baso' ka' lompo'nyo nu koloban bau pompodame aijo'.

³⁴Saha'an ka' pa'anyo koanan anu binoa sinombahkonmo nu bansa Israel ingalamo nu Tumpu ka' binee'nyomo samata-mata hi to ima-imam. Aijo'mo na pontulungi nu bansa Israel hi to ima-imam sampetoka sidu-sidutu'.

³⁵Kaanon anu sinombahkonmo hi Tumpu, aijo' na bahagian anu obee' hi Harun ka' hi to ana-anaknyo i sinaa aha binalakatanmo timbali imam.

³⁶I sinaa aijo' Tumpu nompalentahmo bansa Israel da anu nusombahkonmo nu aha obee'mo hi to ima-imam. Atulan aijo' tionyo ahi' otuluti nu bansa Israel sampe toka sidu-sidutu'.

³⁷Sumo aijo' na to atu-atulannyo mongkona koloban anu opotunu, koloban kaanon anu osombahkon, koloban bau pongampuni dosa', kolobau bau polugi'i, koloban pombalakatian ka' koloban bau pompodame.

³⁸Tumpu nombee'mo palentah haha aijo' hi Musa i Bungkutnyo nu Sinai tempo'nyo la nompokaumo bansa Israel monsombahkon koloban i padang bola Sinai.