Read Saluan IMAMAT 8 Bible Online

IMAMAT 8 - Saluan bible

IMAMAT 8

¹Tumpu notatae hi Musa,

²“Laga na i Harun tiba to ana-anaknyo ka' boa na baju' nu imam, lanya' anu opake mombalakati, sa'angu' na sapi' lakinyo anu daagi' bata'nyo da bau koloban pongampuni dosa', ohua' na domba lakinyo ka' sa'angu' na loyang na roti anu madi' ko raginyo.

³Lantas pokau iwi-iwi' na mian nu Israel sihuk mae i ahop nu sabatan nu Kemah-Ku.”

⁴I Musa nombaumo apaa na anu pinalentahkonmo nu Tumpu. Salatan iwi-iwi' na mian sinihukmo i tampat aijo',

⁵i Musa notataemo hi aha, “Anu ku bau uuka aiya te palentah nu Tumpu.”

⁶Lantas ia nompokaumo i Harun tiba to ana-anaknyo da mambamo mokiita' i ahop ka' mompobelesi'mo butong.

⁷Lapas aijo' ia nompopusokmo baju' nu imam hi Harun; kameja', pombutu' ka' juba'. Ka' suele efod anu oposegot i lampeokan nu ponsegotnyo hude ma'ima' na binau.

⁸Lantas pinokonanyomo na pongkukubi saha'an hi Harun, ka' i uno nu pongkulubi saha'an aijo' pinosoopnyomo na Urim ka' Tumim,

⁹Lantas pinosongko'nyomo na suluban hi Harun, ka' i suluban aijo' pinosamatnyomo na mainan mosoni', salaku bau pontandai saba' i Harun anumo nu Tumpu. Iwi-iwi' aijo' binaumo i Musa susumo anu pinalentahkonmo nu Tumpu hi ia.

¹⁰Lantas i Musa nongalamo lanya' anu opake mombalakati ka' monsapuakonmo i Kemah nu Tumpu ka' iwi-iwi' na posadiaonnyo. Tiba jalan anu sumo aijo' saba' iwi-iwi' aijo' samata-matamo anumo nu Tumpu.

¹¹Lanya' aijo' ingalanyo sangkiding ka' pinipi'akonnyo pinimpitun i mezbah ka' iwi-iwi' na posadiaonnyo, ka' suele i tampat pongisian uee ka' paningkokoannyo. Tiba jalan anu sumo aijo' saba' iwi-iwi' aijo' samata-matamo anumo nu Tumpu.

¹²Lapas aijo' i Musa nombalakatimo i Harun, ia nondudu'akonmo sangkiding na lanya' anu opake mombalakati i ubaknyo.

¹³Lantas ia nompokaumo to ana-anak i Harun mokiita' i ahop. Pinopusoknyomo hi aha na kameja' ka' pombutu'. Lantas pinosongko'nyomo na suluban hi aha susumo anu pinalentahkonmo nu Tumpu hi ia.

¹⁴Lapas aijo' i Musa nongalamo sa'angu' na sapi' lakinyo anu daagi' bata'nyo bau koloban pongampuni dosa'. I Harun tiba to ana-anaknyo nompotiikmo lima nu aha i ubak nu binatang aijo'.

¹⁵Lantas kinolotmo i Musa ka' nongala sambahagian na baso'nyo. Baso'nyo aijo' sinapuakonnyo nu kangkam nu limanyo i tanduk haha aijo' anu pinokona i pasu'nyo nu mezbah, da mezbah aijo' baumo samata-mata anumo nu Tumpu Allah. Labinyo nu baso' dinudu'akonnyomo i paningkokoan nu mezbah. Sumo aijo' na mombau mezbah aijo' da oposusi' ka' samata-matamo anumo nu Tumpu.

¹⁶Sapi' anu sala'je kinolot aijo', ingalamo i Musa na tohitisnyo iwi-iwi' anu monsalaputi isi nu kompongnyo, dampilannyo tiba lompo'nyo ka' bahagian nu atenyo anu talalo hondo ma'ima'. Iwi-iwi' aijo' pinotununyomo i mezbah.

¹⁷Panyo antoknyo nu sapi' aijo', kilitnyo, isi nu kompongnyo iwi-iwi' tibamo kompong ninisnyo, jadi iwi-iwi' na sapi' aijo' sangadinyo bahagian anu pinosi po'iwi'mo pinotununyomo i sambiha' na Kemah susumo anu pinalentahkonmo nu Tumpu.

¹⁸Lapas aijo' i Musa nongalamo domba lakinyo bau koloban anu opotunu, lantas i Harun tiba to ana-anaknyo nompotiikmo lima nu aha i ubak nu domba aijo'.

¹⁹Domba aijo' nu kolotmo i Musa ka' baso'nyo odudu'akonmo i sulapa'nyo opa-opat nu mezbah.

²⁰Lantas binatang aijo' nu pado-padotmo ka' isi nu kompongnyo tiba tengkenyo nu baso'imo nu uee. Ubaknyo, lompo'nyo ka' iwi-iwi' na antoknyo nu domba lakinyo aijo' nu potunumo bau koloban anu opotunu i mezbah susumo anu pinalentahkonmo nu Tumpu hi ia. Hongohisnyo nu koloban anu okaan aijo' momposanangmo kinyonyoa nu Tumpu.

²²Lantas i Musa po'ule' mule' nongala domba lakinyo sa'angu' bau koloban mombalakati imam. I Harun tiba to ana-anaknyo nompotiikmo lima nu aha i ubak nu domba aijo',

²³lantas nu kolotmo i Musa. Lapas aijo' nu alamo na sangkiding na baso' nu binatang aijo' ka' nu sapuakonmo i bihingnyo anu i sasu koanan i Harun, i kanumpunyo nu limanyo koanan ka' i kanumpu nu tengkenyo koanan.

²⁴Lapas aijo' pinokaunyomo na to ana-anak i Harun mati ohani lantas sinapuakonnyomo sangkiding suele na baso' i bihingnyo nu aha sasu koanan, i kanumpu nu lima nu aha koanan tiba i kanumpu nu tengke koanan koanan nu aha. Labi nu baso'nyo odudu'akon i opa-opat na sulapa'nyo nu mezbah,

²⁵I Musa nongalamo lompo'nyo nu domba aijo', ikunyo anu ko lompo'nyo, iwi-iwi' na tohitisnyo anu monsalaputi isi nu kompongnyo, bahagian nu atenyo anu talalo hondo ma'ima', dampilannyo tiba lompo'nyo ka' tengkenyo koanan.

²⁶I loyang anu ko isinyo roti anu madi' ko raginyo anu sinombahkonmo hi Tumpu, ingala i Musa sa'angu' na roti anu daka' anu binau ginalo'an lanya' ka' sa'angu' na roti ise-ise'. Roti aijo' pinotimpasnyomo i lompo'nyo ka' pa'anyo koanan nu domba aijo'.

²⁷Iwi-iwi' binee'nyomo hi Harun tiba to ana-anaknyo, lantas sinombahkonmo nu aha salaku palasombahan anu obee' hi Tumpu.

²⁸Lapas aijo' i Musa nongalamo kaanon aijo' hi aha ka' nompotunumo i mezbah, hingga-hinggat tiba koloban anu opotunu salaku koloban kalana binalakanmo. Hongohisnyo nu koloban anu okaan aijo' momposanangmo kinyonyoa nu Tumpu.

²⁹Lantas I Musa nongalamo saha'annyo nu domba aijo' ka' nonsombahkonmo salaku palasombahan anu obee' hi Tumpu. Aijo'mo na bau bagi i Musa anu o'ala i domba lakinyo anu kinolobanakonmo nombalakati imam. Iwi-iwi' aijo' binaumo i Musa susumo anu pinalentahkonmo nu Tumpu hi ia.

³⁰Lapas aijo' i Musa nongalamo sambagian na lanya' anu opake' mombalakati ka' sambagian na baso' anu aijo' i mezbah lantas pinipi'akonnyomo hi Harun ka' i to ana-anaknyo tiba baju' nu aha. Tiba jalan anu sumo aijo' i Musa nompotantumo aha ka' baju' nu aha samata-mata anumo nu Tumpu.

³¹Lapas aijo' i Musa notataemo hi Harun ka' hi to ana-anaknyo, “Unjangmo na antoknyo nu koloban aijo' i ahop nu sabatan nu Kemah nu Tumpu. Koonyo nu palentah nu Tumpu, belemiu tionyo ahi' mongkaan itina' tiba roti anu kinolobanakonmo nombalakati anu itina' i loyang.

³²Antoknyo anu ingunjangmo ka' roti labinyo tionyo ahi opotunu nu belemiu iwi-iwi'.

³³Pitun sinaa na kopinnyo belemiu madi' timbali mompala'i Kemah nu Tumpu, sailapa-lapasje na mombalakati beleyum.

³⁴Tumpu nompalentahkonmo da apaa na anu obaunto sinaa aiya suele saja' obau aiya mae i ahop. Tiba jalan anu sumo aijo' to dosa-dosa' nu belemiu o ampunimo.

³⁵Pitun sinaa na kopinnyo sinaa ka' pihi, belemiu tionyo ahi' sabole-bole jojoong i ahop nu sabatan nu Kemah mombau apaa na anu pinalentahkonmo nu Tumpu. De belemiu madi' mombau, belemiu matemo. Aijo'mo na pinalentahkon nu Tumpu hi belengku.”

³⁶Lantas i Harun tiba to ana-anaknyo nombaumo iwi-iwi' apaa na anu pinalentahkonmo nu Tumpu hi Musa.