Read Saluan YEREMIA 1 Bible Online

YEREMIA 1 - Saluan bible

YEREMIA 1

¹Kitab aiya isinyo potatae i Yeremia anak i Hilkia, sala'samian na imam anu lengkat mae i kota' Anatot i uno nu daerah Benyamin.

² Tumpu notatae hi Yeremia itaun kinosampulu'nyomo ka' totolu' nu i Yosia nompalentah anak i Amon tomundo' nu aha Yehuda.

³ Lapas aijo' Tumpu saja'mo notatae hi ia, lengkat pe'e tempo'nyo i Yoyakim anak i Yosia nompalentah sampe tinoka itaun kinosampulu'nyomo ka' sa'angu' na i Zedekia anak i Yosia nompalentah. Itaunmo aijo' bitu'onnyo anu kino olima'nyomo na mian anu jojoong i Yerusalem binoamo itampat pinompojoongan.

⁴Tumpu notataemo mae hi belengku,

⁵“Ma'isa pe'e Aku nontali' beleyum i uno nu ma'alum nu tina nu beleyum, ka' ma'isa pe'e beleyum ihampe, pinile'an-Kumo ka' ihangkat-Kumo na beleyum da bau nabi nu to bansa-bansa.”

⁶Aku nontaamimo, “O Tumpu Anu Matangkas Na Kuasanyo, aku madi' peletan na motatae kalana aku daagi' anak.”

⁷Panyo tinaaman nu Tumpu, “Boli otaloakon beleyum daagi' anak. De Aku na monsai beleyum maumo pa' hihe na kalambanan, beleyum tionyo ahi' mamba ka' iwi-iwi' na anu Ku palentahkon tionyo ahi' nu poto'i nu beleyum hi aha.

⁸Boli mabuhuk hi aha, kalana Ku sangalui ka' Ku jagai na beleyum. Aku, Tumpu notataemo!”

⁹Lapas aijo' tinajuakonmo mae nu Tumpu na lima-Nyo ka' nongkanyangmo mae nganga'ku lantas notataemo, “Potombihing mae ka' bebakon na potatae anu Ku taloakon aiya.

¹⁰Sinaa aiya Ku bee'mo hi beleyum na kusa da mongkuasai bansa-bansa tiba kalaja'an-kalaja'an — kuasa da timbali montua'akon ka' timbali mohobo'akon, da timbali mompobahangkang ka' da timbali monsilakai, da timbali mompotinjo, ka'da timbali monsu'an.”

¹¹Tumpu nompokilawamo mae hi belengku, “Apaa na anu tinoamo nu beleyum, Yeremia?” Aku nontaamimo, “Panga' nu kau' badam, o, Tumpu.”

¹²“Totu'u,” na koonyo nu Tumpu, “Ku jagai da iwi-iwi' na anu Ku taloakon kobukuti'nyo.”

¹³Lantas po ule' mule' pinokilawa mae nu Tumpu hi belengku, “Apaa na anu tinoamo nu beleyum mule'?” Aku nontaamimo, “Isasu utara aku nontoamo kuhon te isinyo ilumua'mo ka me sangkiding tinombulokmo no uuka mae.”

¹⁴Tumpu notataemo, “Lengkat mae i sasu utara balaa' tombulokmo mae mongkona iwi-iwi' mian anu jojoong ilipu' aiya.

¹⁵Ku palentahmo mae na bansa iwi-iwi' anu isasu utara da tokamo mae mongkuasai Yerusalem. Pagan mesen haha aiya anu montikubi kota' aiya ka' mule' sabatan toto daka-daka' tiba iwi-iwi' na kota' nu Yehuda nu alamo nu aha.

¹⁶Ku hukumo na mian anu palesayamo hi beleng-Ku, kalana aha binaladosa'mo ka' nohikumo mae Aku. Aha nonsombahkonmo koloban hi pilogot nu aha ka' lewa'mo nombau patong ka' sinombahmo nu aha.

¹⁷Balasadiamo, Yeremia! Lako'mo ka' poto'imo hi aha, iwi-iwi' na anu pinalentahkon-Kumo hi beleyum. Boli mabuhuk hi aha da beleyum boli mule' Ku pojadi lebe mabuhuk de mompaha ahopmo tiba aha.

¹⁸Potombihing mae! Beleyum nu ka'idekimo nu mian anu jojoong ilipu' aiya, aijo'mo to tomu-tomundo' nu aha Yehuda, to paga-pagawe nu pamalentah, to ima-imam, ka' suele aha mian daisan. Panyo sinaa aiya Ku bee'imo kahosonan na beleyum da moko ala mongewa aha. Beleyum timbalimo susumo kota' anu ko bentengnyo, pokakanamo susumo ohi' besak, ka' pagan mesen tambaga. Aha madi' moko ala mohungku'i beleyum, kalana Aku na monsangalui ka' monjagai beleyum. Aku, Tumpu notataemo.”