Read Saluan YEREMIA 11 Bible Online

YEREMIA 11 - Saluan bible

YEREMIA 11

¹Tumpu notataemo mae hi belengku,

²“Palahatikan na atulannyo na palajanjian anu binaung-Kumo hi aha mian anu palesayamo hi beleng-Ku. Poto'i hi aha mian nu Yehuda tiba hi aha mian anu jojoong i Yerusalem taalu',

³Aku, Tumpu Allah nu Israel, mongkutukimo ihehe na madi' montuluti atulan nu palajanjian-Ku aijo'.

⁴Palajanjian-Ku aijo' binaung-Kumo tiba mompolee' nu aha salatan pe'e aha binoang-Kumo nosabat lengkat i Mesir lipu' anu susumo nalaka hi aha. Pinalentah-ngKumo na aha da montuluti Aku ka' mombau sinin na anu pinalentahkon-Kumo. Uuka aiya suele pinoto'ing-Kumo hi aha mian nu Yehuda tiba hi aha mian anu jojoong i Yerusalem taalu' de aha montuluti Aku aha timbalimo mian anu palesayamo hi belengku ka' Akumo ahi' na Tumpu Allah nu aha.

⁵De nu baumo nu aha na aijo' iwi-iwi' saba' Kuganapimo ahi' na palajanjian-Ku anu bibinaung-Kumo hi mompolee' nu aha aijo'mo lipu' anu ma'omuk hondo ka' manjoo' na isinyo anu tempo' uuka aiya jinojoonganmo nu aha aijo' Ku bee'mo hi aha.” Aku nontaami, “Ma'ima'mo, Tumpu.”

⁶Lantas Tumpu notataemo mae hi belengku, “Lako mamba ikota-kota' nu Yehuda tiba ijalan-jalan nu Yerusalem. Poto'iakon na potuunon-Ku aiya hi aha to mia-mian anu kiijo' mae. Poto'i hi aha da mompalahatikan ka' montuluti atulan nu palajanjian-Ku.

⁷Tempo'nyo Aku nomboamo mompolee' nu aha nosabat lengkat i Mesir, pinokeman-Ku mo na nompokinde'i aha da montuluti Aku. Sampe sinaa uuka mule' Aku daagi' saja' mompokinde'i mian anu palesayamo hi beleng-Ku mongkona han aijo',

⁸ka' mompalentah da aha montuluti palajanjian-Ku aijo', panyo aha madi' ahi' mohongo-hongo ka' madi' mongka'oho' montuluti. Ola mule' ahi' aha tataap panggaga balabuat ma'idek susumo naipuan mae. Kalana aijo' iwi-iwi' na hukuman anu tuli-tulis kiijo' i palajanjian aijo' Ku nabu'akonmo hi aha.”

⁹Lapas aijo' Tumpu notatae mule mae hi belengku, “Aha mian nu Yehuda tiba mian anu jojoong i Yerusalem sinangaja'mo madi'mo mompajuli mae Aku.

¹⁰Aha nombaumo dosa' bibinaunyo nu mompolee' nu aha kalana madi'mo nontuluti Aku, aha nonsombahmo pilogot sangga'at ka' madi'mo ka'oho' montuluti palentah-ngKu. Mau Israel kabai Yehuda nolanggaimo palajanjian anu binaung-Kumo tiba mompolee' nu aha.

¹¹Kalana aijo' Aku, Tumpu mompokinde'imo saba' Aku mompotokamo mae balaa' hi aha ka' madi'mo nu poko ala nu goliliakon nu aha da madi' nu kona. De aha motatae mae daka-daka' momoita tulung hi beleng-Ku, Aku madi'mo mohongo-hongo.

¹²Lantas mian nu Yehuda tiba mian anu jojoong i Yerusalem mambamo momoita tulung hi to pilo-pilogot sangga'at anu nu sombah nu aha nu palasombahan koloban. Pilogot haha aijo' madi' ahi' moko ala momposalamat aha de balaa' aijo' tokamo mae.

¹³Pilogot nu aha Yehuda manjoo' hondo, sumo konjoo'nyo nu kota' nu aha. Mian anu jojoong i Yerusalem nompotinjomo mezbah-mezbah sumo konjoo'nyo nu jalan ikota' Yerusalem da bau ponsombahkonan koloban hi Pilogot Baal.

¹⁴Kalana aijo' Yeremia bolimo mondo'akon aha kabai momoita tulung hi beleng-Ku da otulungi na aha! De aha nutokaimo nu kasusa'an ka' momoitamo mae tulung hi beleng-Ku, saba' Aku madi'mo ahi' mohongo-hongo aha.”

¹⁵Tumpu notatae, “Mian anu palesayamo hi beleng-Ku anu Kukalibosi nombaumo hahan anu ma'idek. Aha madi'mo ko hak jojoong i Laigan-Ku. Nu sangka nu aha saba' de mombaumo palajanjian-palajanjian ka' monsombahkonmo binatang aha moko alamo montewa' balaa' da bolimo toka mae. Pa' ugat tiba jalan anu sumo aijo' aha timbalimo sanang?

¹⁶Toho'mo ingombeng-Ku na aha kau' zaitun anu tambok hondo na honnyo, mahampe na bua'nyo anu toto ima-ima'. Panyo uuka aiya tiba potatae anu polintup taha-tahahumo Ku papuimo na honnyo haha aijo' ka' mule' Ku paha pato'imo na panga'nyo iwi-iwi.

¹⁷Akumo na nompotinjo Israel tiba Yehuda, Aku, Tumpu Anu Mahakuasa. Panyo uuka aiya Aku ko kahanda'mo mompotoka mae balaa' hi aha. Posi ahamo ahi' iwi-iwi' na nonsaduakon aijo', kalana aha nombaumo palabuatan anu ma'idek, aijo'mo nonsombahkonmo koloban hi Baal sahingga Aku pinusamo.”

¹⁸Tumpu nompoto'imo mae hi belengku tanga'an ma'idek nu aha anu mongka'ideki mae aku.

¹⁹Aku sumomo ahi' domba anu madi' ko sangka'an apa-apaa binoamo itampat pompateian. Aku madi' monsumbu-sumbu' tanga'an ma'idek aijo' montanga'imo mompatei mae aku na aha. Aha notatae, “Imbo' da otaa'mo na kau' aiya hau-haunyo ia daagi' nimbua'; opateintomo na ia da sanggonyo nu kolilimimo nu mian.”

²⁰Lantas aku binalado'amo, “O Tumpu Anu Mahakuasa, Belento mian kopian anu adin hondo; Belento na monguji' pikilan ka' kinyonyoa nu mian. Palakalangku aiya nu asanakonmo hi Belento. Ku amalakon da aku daagi' ahi' monsakisi'i Belento mombalosakon palabuatan nu mian haha aijo'.”

²¹Aha to mia-mian nu Anatot mongkahanda'imo da beleyum silakamo. Aha notatae, “De beleyum me saja' mompoto'i mae potuunon nu Tumpu hi kami, beleyum opateimo mami.”

²²Kalana aijo' Tumpu Anu Balakuasa hondo notataemo mae, “Ku hukumo na aha! Aha to oli-olitau silakamo i uno nu pahampatean, to ana-anak nu aha silakamo nu ohop.

²³Aku nontantukanmo tempo'nyo bau pompotokan mae balaa' hi aha mian nu Anatot, ka' de tempo'nyomo nu hukuman anu onabu'akon hi aha aijo' tokamo, madi' daagi' ko samian na anu madi' nu kona nu balaa'.”