Read Saluan YEREMIA 13 Bible Online

YEREMIA 13 - Saluan bible

YEREMIA 13

¹Tumpu nompalentahmo mae aku mamba mongoli lipa' kodo' hude lenan na binau ka' opake, panyo madi' timbali ku polobong i uee.

²Jadi aku nambamo nongoli lipa' kodo' aijo' lantas pinakengkumo.

³Lapas aijo' po ule' mule' Tumpu notatae mae hi belengku, Ia notatae,

⁴“Lako'mo mamba i Kaunyo nu Efrat, ka' posuluk na lipa' kodo'-kodo' aijo' i olot nu batu.”

⁵Jadi susumo koo-Nyo nu palentah nu Tumpu, aku nambamo ka' nomposulukmo lipa' kodo-kodo' aijo' koko Kaunyo nu Efrat.

⁶Madi' pinin pinalentahmo nu Tumpu na aku da po ule' mamba i Kaunyo nu Efrat mongala lipa' kodo-kodo' aijo'.

⁷Sahingga nambamo na aku, ka' nonsabatakonmo mae lipa' kodo-kodo' aijo' itampat pinomposulukanku. Pada han lipa' kodo-kodo' aijo' inahu'mo ka' madi'mo ahi' daagi' ko gunanyo.

⁸Lantas notatae mule' mae na Tumpu hi belengku, Ia notatae,

⁹“Sumo aijo' na pombaung-Ku aha mian nu Yehuda tiba mian anu jojoong i Yerusalem. Ku hansunimo na katabuulan nu aha anu taha-tahahumo aijo'.

¹⁰Bansa anu ma'idek na palabuatan nu aha aijo' talalo ahi' panggaga ka' madi'mo mae tulu-tulutan hi beleng-Ku. Aha monsombah ka' palesaya hi to pilo-pilogot sangga'at. Mokonyo aijo' aha montihomo lipa' kodo-kodo' aijo' anu madi'mo daagi' ko gunanyo.

¹¹Susumo lipa' kodo-kodo' sasa-sasa' hoso-hoson ilampeokan nu anu nompake ia, sumo aijo'mo na tanga'an-Ku da mian nu Israel tiba Yehuda sabole-bole ahi' totoong hoso-hoson mae hi beleng-Ku. Tiba jalan anu sumo aijo' aha timbalimo mian anu palesayamo hi beleng-Ku anu mohangkatmo sanggong-Ku da opuji' ka' oholomat. Panyo aha madi'mo ahi' mongka'oho' montuluti Aku.”

¹²Tumpu Allah notatae mae hi belengku, “O Yeremia, poto'iakon na potuunon-Ku aiya hi aha mian nu Israel, taalu' toto sa'angu' na gumbang ise-ise' tampat nu anggur tionyo ahi' o isii buke-buke' nu anggur. Nu taamije mae nu aha, ‘Te toho' mule' madi' osumbu' mami na gumbang toto ise-ise' tionyo ahi' opobuke'i nu anggur?’

¹³Jadi poto'imo hi aha taalu' aha to mia-mian anu ilipu' aiya, to tomu-tomundo' lee' mae i Daud, to ima-imam, to nabi-nabi tiba ingko-ingkot na mian anu jojoong i Yerusalem Ku isiimo nu anggur sampe malangu'.

¹⁴Lantas aha Ku podukumo hi samian ka' hi samian. Mian anu tu'amo tiba mian anu ma'isa tu'nyo Ku baumo susumo aijo madi'mo daagi' ko ampunnyo. Aha Ku silakaimo madi'mo daagi' mongkalibosi kabai mongkanonongi. Aku, Tumpu, notataemo.”

¹⁵O mian nu Israel, Tumpu notataemo! Boli buulon potombihing na Ia!

¹⁶Tumpu Allah nu belemiu tionyo ahi' opopodaka' nu belemiu ma'isa pe'e Ia mompotoka mae kapintungan, ka' tengke nu belemiu tosumpunmo aita' mae ibungkutnyo, ma'isa pe'e jingka anu nu taha'imani Nu bali'imo timbali kapintungan.

¹⁷De belemiu madi' mongka'oho' mompotombihing saba' ku haangimo hoko-hokot. Tiba kinyonyoa anu malibos hondo ku haangimo na buulon nu belemiu ati-atina'. Lolu'ku jumujumo kalana mian anu palasayamo hi Tumpu oboamo salaku mian anu ihakopmo.

¹⁸Tumpu notataemo mae hi belengku, “Palentah na i tomundo' tiba bengkele'nyo da mintatau'mo mae ikadelanyo, kalana makota'nyo anu ma'ima' aijo' nanabu'mo mae madi'mo ko anu atina' i ubak nyo.

¹⁹Sinin na kota' nu Yehuda anu ibahagian salatan hau-haunyomo tinumbuhan, ka' madi'mo daagi' ko anu noko ala nopalai aha tinumbuhan aijo'. Iwi-iwi' na aha mian nu Yehuda binoamo itampat pinompojoongan.”

²⁰Tumpu notataemo hi aha anu jojoong i Yerusalem, “Palahatikan! Iwi-iwi' na sampobali' nu belemiu hau-haunyomo mae tinoka lengkat mae isasu utara! Iyamo mae na to mia-mian anu tionyo ahi' ojagai nu belemiu ka' anu ahi' talalo takabunakon nu belemiu aijo'.

²¹Daagi' apaa na anu otaloakon nu belemiu, de to mia-mian anu binaumo nu belemiu salaku sangalu nu belemiu, mompatundu'mo ka' mongkuasaimo belemiu? Memang belemiu mongoa'imo sakit susumo boune anu mohampeakon anak.

²²Ugat opokilawamo nu belemiu kadaka' iwi-iwi aijo' nongkonamo mae butong nu belemiu, kadaka' baju' nu belemiu bineakmo ka' belemiu pinakisamo na nompatiduhusi. Da osumbu' nu belemiu saba' aijo' jinadimo kalana dosa' nu belemiu dinaka'mo hondo.

²³Te toho' mule' mian anu mo itom timbali mombali'i buhit nu kilitnyo, kabai harimau moko ala mongalini belongka'nyo? Tantu madi' ahi'! Sumo aijo'mo na belemiu anu biasamo mombau palabuatan anu ma'idek, susa'mo hondo na mombau palabuatan anu ma'ima'.

²⁴Ku ga'a-ga'atakonmo na belemiu susumo ota' nu tilabakonmo nu mombun anu lengkat mae ipadang tampat anu mateges.

²⁵Sumo aijo'mo na uki' nu belemiu anu tinantukan-Kumo kalana belemiu nongkolilimimo mae Aku, ka' pinalesayamo hi to pilo-pilot anu madi' totu'u.

²⁶Akumo ahi' na mombeak baju' anu atina' i butong nu belemiu da belemiu langgo'mo ka' mule' ma'ambangmo.

²⁷Tinoang-Kumo na belemiu nombau hahan anu Ku ka'ideki. Tinoang-Kumo na belemiu nololoi' to pilo-pilogot sangga'at ipuge'nyo tiba i ale', sumomo ahi' samian na mo'ane anu nongka'ima'imo bengkele' nu mian sangga'at kabai sumomo ahi' ajahan tinokamo na napisunyo hi ajahan behenyo. O mian anu jojoong i Yerusalem, silakamo na belemiu! Hipianje na belemiu madi'mo mombau palabuatan iwi-iwi' anu ma'idek?”