Read Saluan YEREMIA 14 Bible Online

YEREMIA 14 - Saluan bible

YEREMIA 14

¹Tumpu notataemo sumo uuka hi belengku mongkona tempo' nu posinaa anu tinahahumo hondo,

²“Yehuda sinusa'mo na kinyonyoanyo kota'nyo iwi-iwi' me sangkiding imadi'anmo. To mia-miannyo nale'mo itano' ka' sola'mo notusa' Yerusalem nolokihismo momoita tulung.

³To posa-posaihon nu mian kaya sinaimo mamba molio uee iyaya mae; Iwi-iwi' na bubung ilambananmo nu aha panyo ueenyo iningkotmo iwi-iwi'. Madi' mae kino isinyo na kendi anu po ule' mae binoa nu aha. Binimbangmo na aha ka' sinusa'mo na kinyonyoa nu aha ka' na ambangmo sahingga kinukumbunganmo nu aha na ohup nu aha.

⁴Ujan madi'mo tinudun ka' tano' notiismo ka' nobeka-beka'mo; mian anu mongale' nongkukumbungimo ohup nu aha kalana madi'mo daagi' koanu otaha'imani.

⁵Hemput imadi'anmo, kalana aijo' tinanyo nu jonga nambamo. Anaknyo anu salaje' pino anaknyo pinala'iannyomo ipadang tampat anu loas.

⁶Aita' mae ibawo nu bungkutnyo keledai anu ma'ela' memo ahi' saintinjo, matanyo ihuyu'mo kalana madi'mo ko hemputnyo; ia ihahunsa'anmo susumo serigala.

⁷Mian anu palesayamo hi beleng-Ku nomoitamo mae tulung, ‘O Tumpu, maumo ahi' dosa' mami montuukmo mae kami panyo paya' tulungiakon mae na kami susumo anu jinanji'mo nu Belento.

⁸Ola-olanyomo Belento na anu taha'imani nu Israel, anu nomposalamatmo kami da madi' silaka. Panyo kadaka' Belento sumomo mian anu isalipu'an mae aiya ilipu' mami, sumomo mian anu ilumambanan ola' sinso' male' sampahu lantas mambamo?

⁹Kadaka' Belento sumomo mian anu biningungmo; sumomo talenga' anu madi'mo moko ala montulungi? Panyo, memang tantu Belento aiya itotonga' mami, o Tumpu! Kami mian anu palesayamo hi Belento, boli ahi' nu pala'i nu Belento na kami!’ ”

¹⁰Mongkona bansa aijo', Tumpu notataemo, “Aku madi'mo sinanang hi mian haha aijo' anu saja' mopalai mompala'i Aku, ka' madi' mongka'oho' mongkuasai butong nu aha.”

¹¹Tumpu notataemo mae hi belengku, “Bolimo mae momoita hi belengku da otulungi na mian haha aijo'.

¹²Maumo ahi' aha bapuasa'mo, Aku madi'mo daagi' mompalahatikan poitaon nu aha moita tulung; ka' mule' maumo ahi' aha monsombahkonmo mae hi beleng-Ku koloban anu opotunu tiba koloban gandum, Aku madi'mo sinanang hi aha. Pakalaus mule' Kusilakaimo na aha nu pahampatean, kasusa'anmo i anu okaan, ka' panyakit anu molele.”

¹³Lantas aku notataemo, “O Tumpu Anu Matangkas Na Kuasanyo, Belento nonsumbu'mo nabi-nabi polo'mo notatae hi mian da'isan koonyo nu aha madi'mo daagi' ko pahampaten, kabai kasusa'an i anu okaan, kalana Belento binalajanji'mo koonto lipu' aiya saja'mo ko kadamean.”

¹⁴Panyo tinaaman nu Tumpu, “Nabi haha aijo' nompoto'imo anu madi' totu'u kalana notataemo nomboa mae atas sanggong-Ku; Aku na madi' ahi' nonsai mae aha ka' madi' mule' ahi' nombee'i mae palentah kabai nompoto'i hi aha. Apa-apaa na anu tinoamo nu aha sisinisikmo nu aha na misa'ahi' lengkat mae hi beleng-Ku; aha nongkila-kilamo hahan anu jadi aiya mae i ahop, aijo' anu madi' kokaliangannyo, ola anu pinosi kuku nu aha ipala.

¹⁵Aha nompoto'i aijo nompake atas sanggong-Ku, koonyo nu aha lipu' aiya madi'mo daagi' ko anu toka mae mompahampateakon kabai kasusa'an i anu okaan padahan madi' ahi' Aku nompalentah mae aha da opoto'i sumo aijo'. Aku, Tumpu mompoto'imo hi beleyum, o Yeremia apaa na anu Ku baumo saidi' mae hi aha nabi haha aijo' anu madi' pinalentah-ngKu mae aijo'. Ku pateimo na aha nu pahampatean tiba kasusa'an i anu okaan.

¹⁶To mia-mian anu nontalimamo kila-kila'an nu aha aijo' suele ahi' opateimo nu jalan anu sumo aijo'. Bangke' nu aha ola opahalumbu'akon itutus jalan kiijo' i Yerusalem madi'mo daagi' ko anu molamun. Sumo aijo'mo na uki' nu aha tiba anak ka' mule' bengkele' nu aha. Ku bau na aha da mongoa'i balosnyo nu palabuatan ma'idek anu binaumo nu aha.”

¹⁷Tumpu nompalentahmo mae aku da mompoto'i kasusa'an nu kinyonyoangku hi mian anu palesayamo hi Ia. Aku tionyo montaloakon sumo uuka, “Bakasmo da aku humang madi'mo kokamingkotannyo, sinaa tiba pihi sola'mo lolu'on na matangku. Kalana bansangku tinadokmo hondo na belanyo ka' talalomo ahi sinansala.

¹⁸De aku mamba i padang tampat anu loas, tinoangkumo na bangke' nu anu sinilakamo ipahampatean. I uno nu kota' tinoangkumo na kasansala'an, nu to mia-mian anu mompai patemo nu ohop. Nabi tiba imam mompojalan kawajibannyo madi' nu sumbu' pa apaa na anu nu bau.”

¹⁹O Tumpu, pa' memang Yehuda madi'mo tinalima nu Belento tiba mian anu jojoong i Sion kina'idekanmo nu Belento? Kadaka' talalomo nahoson na Belento nondoke mae kami sahingga kami madi'mo daagi' ma'alin? Ola palasuma na kami molio kadamean madi' kokaliangannyo na kami montaha'imani da ma'alin, kalana anu daagi' olanyomo ahi' kasinggian.

²⁰O Tumpu, ola-olanyomo ahi' hi Belento na kami binaladosa'mo. Kami mongakuimo posi dosa' mami tiba dosa' nu mompolee' mami

²¹Inau' na palajanjian nu Belento, boli mae o ambangi nu Belento na kami; palajanjian nu Belento tiba kami boli ahi' madi' opotimbali nu Belento. Yerusalem tampat kasuhangan nu Belento anu talasanggo hondo boli ahi' o ambangi nu Belento.

²²Pilogot nu to bansa-bansa madi' moko ala montudunakon ujan i tano'. Langit suele imadi' ahi' moko ala mombubusakon ujan nu posi kuasanyo. Ola-olanyomo ahi' Belento na anu otaha'imani mami. Belento na nombau aijo' iwi-iwi' sampe jinadi.