Read Saluan YEREMIA 17 Bible Online

YEREMIA 17 - Saluan bible

YEREMIA 17

¹Tumpu notatae, “O bansa Yehuda, dosa' nu belemiu tinulismo ikinyonyoa nu belemiu ka' isongko-songko na pasu'nyo nu mezbah nu belemiu iwi-iwi', pena besak na pinontulis ka' matanyo nu pena aijo' intan.

²Belemiu mian monsombah aijo' i mezbah-mezbah tiba ohii' nu bapilogotan anu pinotinjomo ponsomban Pilogot boune Asyera itoto sa'angu' na kau' anu tambok na honnyo, ka' mule' aita' mae ibawo nu puge'nyo iwi-iwi',

³ka' mule' ibawo nu bungkutnyo iwi-iwi' anu isambiha' nu kota'. Kalana iwi-iwi' na tampat anu ponsomban pilogot anu pipinotinjomo nu belemiu isongko-songko na lipu' ka' mule' kalana iwi-iwi' na dosa' anu bibinaumo nu belemiu, sahingga Ku posidamo na sampobali' nu belemiu da mongatomo sinin na halata' tiba kakaya'an nu belemiu.

⁴Belemiu saidi' mae talapakisamo mombee' tano' nu belemiu anu binee'-Kumo hi belemiu, ka' Ku pojadimo na belemiu da tulutmo hi sampobali' nu belemiu ilipu' anu madi' hondo-hondo osumbu' nu belemiu. Ku baumo na aijo' iwi-iwi' kalana tambuha'-Ku talalomo kosuhu-suhut susumo apu anu noakmo ka' madi'mo opoko ala opatei.”

⁵Tumpu notatae, “De mian mompala'imo Aku, Tumpunyo, ka' montaha'imanimo manusia ka' mule' montaha'imanimo kahosonannyo, saba' Ku hukumo na ia.

⁶Ia sumomo ahi' sosu'anon anu tumuu' ipadang tampat anu loas, itano' anu kuunmo, ka' iliingmo ka' nintimusonmo madi'mo toho' nongoa'i ka'ima'an.

⁷Panyo mian anu montaha'imani Aku na saja' ahi' Ku balakati.

⁸ Ia sumomo ahi' kau' isonibi nu kaunyo anu mo'ili, bakatnyo mo insu'mo toka-tokamo mokiijo' i uee. Ia na madi' ahi' mongkabuhuk tempo' nu posinaa, honnyo saja' molunou. Maumo ahi' lipu' nu tokaimo mae nu posinaa, ia na madi' ahi' mangada' kalana ia na saja' ahi' mimbua'.

⁹Kinyonyoa nu manusia na madi' ahi' opoko ala osumbu-sumbu' pande hondo, nu lingkudui na sinin na apaa ka' talalo ahi' tadok na belanyo.

¹⁰ Aku, Tumpu monselidiki kinyonyoa kinyonyoa nu manusia Ku uji'. Batu-batu mian Ku balosakon sitimbang tiba kalakuannyo, ka' Ku bee'i hukuman sitimbang tiba palabuatannyo.”

¹¹Sumomo ahi' tomonsi' mongokobi anu misa' nggalau'nyo, sumo aijo'mo na mian anu tageo' na kinyonyoanyo nohumpak halata'nyo. Toka ipohintonga'anmo nu umunnyo mingkotmo na halata'nyo aijo' iwi-iwi'. Ipupuusnyomo nu kantumuu'annyo, onyata'je taalu' ia mian anu ponga' ahi' hondo.

¹²Laigan nu Tumpunto sumomo kajojoongan nu tomundo' anu talasanggo hondo aita' ibungkutnyo anu matangkas salatanmo pe'e momonanyo mae.

¹³O Tumpu, Belentomo na bau kataha'imanan nu Israel, mian anu palesayamo hi Belento; iwi-iwi' na anu nompala'imo Belento saidi' mae ma ambangmo. Aha saidi' mae mingkotmo madi'mo ko anu idunia aiya ka' mambamo idunia nu mian anu sinilakamo. Kalana, Belento pipinolengkatan mae nu uee anu bau kantumuu'an pinala'ianmo nu aha, o Tumpu.

¹⁴O Tumpu popa alin mae na aku, da aku mahosonmo. Posalamatakon mae na aku, da aku salamatmo. Olanyomo ahi' belento na anu Ku holomati hondo!

¹⁵Mian notataemo mae hi belengku, “Iyamo mae na tambuha' iwi-iwi' nu Tumpu aijo'? Sahanyo uukamo mae ahi' na pompotudunan!”

¹⁶Panyo, o Tumpu, madi' toho' aku nonsekeli da Belento mompotudunmo mae balaa' hi aha. Aku madi' mule' ahi' mongkahanda'i da aha nu tokaimo mae nu balaa'. Sinumbu'mo nu Belento na aijo', o Tumpu. Nu sumbu' nu Belento apaa na anu tinaloakonkumo.

¹⁷Boli mae Belento timbali susumo anu mompopobuhuk mae kinyonyoangku. Belentomo ahi' na tampat popalaianku de nutokaimo mae nu kasusa'an.

¹⁸O'amalakon da anu mololoi' mae ka' anu momposansala' mae aku, nu popo ambangmo nu Belento ka' nu popo buhukmo hondo nu Belento. Panyo boli ahi' mombau sumo aijo' hi belengku, o Tumpu. Potokamo mae na balaa' hi aha sampe aha hansunmo ahi' silaka iwi-iwi.

¹⁹Tumpu notataemo mae hi belengku, “O Yeremia lako' mamba i Sabatan Daka' nu mian Da'isan anu nutului nu to tomu-tomundo' Yehuda de aha mosabat kabai minsoop ikota'. Lako' mule' suele isabatan daka' sangga'at i Yerusalem.

²⁰Potokakon na potuunon-Ku hi to tomu-tomundo' ka' iwi-iwi' na aha mian nu Yehuda ka' mule' hi iwi-iwi' na mian anu jojoong i Yerusalem anu motulu isabatan haha aijo'.

²¹ Poto'i sumo uuka: ‘De belemiu madi', mongka'ima'i silaka bolipe'e mongato balang isinaa nu Sabat, kabai momboa oposoop montulu sabatan daka' haha aijo' i Yerusalem.

²² Boli mokalaja kabai momboa balang maumo pa' apaa kahanda' osabatakonmo lengkat ilaigan nu belemiu i sinaa nu Sabat. Tungka'akonmo samata-mata na sinaa aijo' hi beleng-Ku susumo anu pinalentahkon-Kumo hi mompolee' nu belemiu.

²³Panyo mompolee' nu belemiu madi' mongka'oho mohongo-hongo kabai mompalahatikan apaa na anu tinaloakon-Kumo. Aha panggaga hondo ka' madi' mongka'oho' montuluti kabai opokinde'i.

²⁴Otuluti iwi-iwi' na palentah-ngKu. Boli mongato maumo pa' balang apaa montulu sabatan daka' ikota' aiya kakona isinaa nu Sabat. Tungka'akonmo samata-mata na sinaa nu Sabat bau bahagian-Ku, ka' mombau apa-apaa isinaa aijo'.

²⁵De belemiu totu-totu'u ahi' montuluti sinin na palentah-ngKu aijo', saba' to tomu-tomundo' tiba anu singkap ko pangkatnyo mompalentah susumo i Daud na minsoop isabatan daka' nu kota' Yerusalem. Aha tiba mian nu Yehuda ka' mule' mian anu jojoong i Yerusalem saidi' mae monsake'imo kareta nunu hela' nu ajahan sahingga kota' Yerusalem jadimo lame' hondo.

²⁶To mia-mian tokamo mae lengkat ikota-kota' Yehuda, ka' mule' lengkat mae ikampung toto ise-ise' i Yerusalem; aha tokamo mae lengkat ida'erah Benyamin, lengkat mae ida'erah tengke nu puge'nyo, lengkat mae ida'erah nu bungkutnyo, ka' mule' lengkat mae i Yehuda bahagian salatan. Aha momboamo mae i Laigan-Ku binatang-binatang anu okolobanakon, mau anu opotuno mau anu madi' opo tunu, ka' mule' gandum anu osombahkon tiba kamangian ka' palasombahan anu bau pontalima kaseh.

²⁷Iwi-iwi' aijo' bisa timbali de belemiu montuluti Aku ka' montungka'akonmo samata-mata sinaa nu Sabat baumo bahagian-Ku. Boli mongato balang maumo pa' apaa montulu sabatan daka' haha aijo' i Yerusalem isinaa aijo'. De olanggaimo nu belemiu na palentah-ngKu haha aijo', saba' sabatan toto daka-daka' i Yerusalem tibamo laigan iwi-iwi' nu tomundo' Ku papuimo ingko-ingkot ka' mule' apunyo aijo' madi'mo daagi' opoko ala opatei'.’ ”