Read Saluan YEREMIA 19 Bible Online

YEREMIA 19 - Saluan bible

YEREMIA 19

¹Tumpu nompalentahmo aku namba nongoli selekan tano', ka' nonsale'imo pa' aha sanggkuka na to pola-polaya' nu bansa tiba pa' aha sangkuka na to ima-imam anu langkai'mo,

² da mamba hingga-hinggat tiba aha i Bangka'nyo nu Hinom montulu Sabatan Daka' Beling. Toka ikiijo' mae ku poto'imo apaa na anu pinotun-Nyomo mae hi belengku.

³Aku tionyo ahi' motatae sumo uuka, “O to tomu-tomundo nu Yehuda tiba mian anu jojoong i Yerusalem! Potombihing mae apaa na anu, Aku, Tumpu Anu Mahakuasa, Tumpu Allah nu Israel kahanda' mompoto'i hi belemiu. Ku potokamo mae na balaa' anu daka' hondo itampat aiya sahingga mian anu nohongomo tinolokengkengmo.

⁴Han aijo' Ku baumo kalana bansa aiya nompala'imo Aku. Aha nohumimi'imo tampat aiya kalana nonsombahkonmo koloban hi to pilo-pilogot anu madi' nu sumbu' nu aha, hi pompolee' nu aha ka' hi to tomu-tomundo' nu Yehuda. Aha mule' ahi' nongisiimo tampat aiya nu baso' nu to mia-mian anu madi' kokasala'annyo.

⁵ Ahanombauimo Baal mezbah da bau ponsombahkonan to ana-anak nu aha salaku koloban anu opotunu, padahan Aku madi' ahi' toho' nompalentah aha mombau han anu sumo aijo', pakalaus madi' ahi' toho' sininsumbu' i uno nu pikilan-Ku na tanga'an anu sumo aijo'.

⁶Kalana aijo' tokaje mae na tempo'nyo tampat aiya madi'mo daagi' osanggohi Tofet kabai Bangka'nyo nu Hinom, panyo osanggohimo Bangka'nyo nu Pompateian.

⁷Itampat aiya madi'mo Ku pojadi' na tanga'an iwi-iwi' nu aha mian Yehuda tiba mian anu jojoong i Yerusalem. Aha Ku popilayamo da nu patundu'mo nu to sampo-sampobali' nu aha ka' opateimo i uno nu pahampatean. Bangke' nu aha Ku pojohokmo da nu tolukmo nu to tomo-tomonsi' tiba binatang anu mahangas.

⁸Ku potudunmo hi aha na balaa' anu opalias hondo ikota' aiya sahingga batu-batu mian anu motulu ikiijo' tolokengkengmo ka' mabuhukmo.

⁹Sampobali' montumbuhimo mae kota' aiya, ka' bala usahamo mompatei miannyo anu jojoong ikiijo'. Nontumbuhi aijo' tinalalomo hondo na kino ideknyo, sahingga aha to mia-mian anu i uno nu kota' aiya nompaha kakaanmo sangalunyo ka' mule' ahi' posi to ana-anak nu aha suele.”

¹⁰Lapas aijo' Tumpu nompalentahmo aku da momposo'mo selekan tano' aijo' i ahop nu to mia-mian anu nombatukimo mae aku.

¹¹Aku tionyo ahi' mompoto'imo hi aha taalu' Tumpu Anu Mahakuasa nompoto'imo mae sumo uuka, “Bansa tiba kota' aiya Ku hansunimo sahingga timbalimo susumo selekan tano' anu noposo'mo aijo' anu madi'mo timbali daagi' opoko ima'i. Mian molamunmo bangke haha aijo' nu aha i Tofet, kalana madi'mo daagi' ko tampat polamunan sangga'at.

¹²Kota' aiya tibamo mian anu jojoong ikiijo' Ku potimbalimo susumo Tofet.

¹³Ingko-ingkot na laigan i Yerusalem ka' mule' ingko-ingkot na laigan nu to tomu-tomundo' i Yehuda timbalimo nahumimi' susumo Tofet; kalana aita' mae ibawo nu laigan haha aijo' pinompapuianmo nu mian kamangian anu sinombahkon hi to pilo-pilogot nu bagian langit, ka' mule' nonsombahkonmo anggur hi to pilo-pilogot sangga'at.”

¹⁴Lantas pinala'iankumo na Tofet tampat aku pinalentah da namba nokiijo' mompoto'i potuunon nu Tumpu. Aku nambamo ipopasan iLaigan nu Tumpu ka' tinuminjomo ikiijo' lantas pinoto'ingku hi iwi-iwi' na mian,

¹⁵koongku Tumpu Anu Mahakuasa Tumpu Allah nu Israel nompoto'imo mae sumo uuka, “Kalana belemiu panggaga hondo, ka' madi' mongka'oho' mohongo-hongo, saba' taalu' Ku potokamo mae ikota' aiya ka' hi iwi-iwi' na kampung anu toto ise-ise' anu minsoop daerah aiya, sinin na balaa' anu memang pinoto'ing-Kumo.”