Read Saluan YEREMIA 20 Bible Online

YEREMIA 20 - Saluan bible

YEREMIA 20

¹I, Imam Pasyhur anak i Imer kapala nu anu monjagai Laigan nu Tumpu. Salatan ihongonyomo na aku nompoto'imo han aijo' iwi-iwi',

²pinalentahkonnyomo da aku opahanjagunakon ka' opanga' i Sabatan Daka' Benyamin, sabatan daka' sasu buannyo i Laigan nu Tumpu.

³Dodododopnyo salatan i Pasyhur nompolapasmo aku madi'mo pinanga' tinaloakonkumo hi ia, “Sanggo anu ponsanggohije nu Tumpu beleyum misa'mo i Pasyhur, panyo ‘i Terormo mau pa' iyaya mae’.

⁴Posi Tumpu nompoto'imo, ‘Beleyum Ku pojadimo teror kona iposi butong nu beleyum ka' mule' kona hi to sanga-sangalu nu beleyum. Nu toaje nu beleyum na aha nu patei nu sampobali' nu aha. Iwi-iwi' na aha mian nu Yehuda Ku pojohokmo da nu kuasai nu tomundo' Babel; sambagian na aha nu atomo salaku mian anu ihakop binoa i Babel, ka' tuha'nyo opateimo.

⁵Sampobali' nu aha Ku pojohokmo da mompahuhuakon ka' mongatomo oboa i Babel iwi-iwi' na kakaya'an anu ikota' aiya, ka' mule' ingko-ingkot na halata' nu aha, ka' mule' santo paka-pakakas pusaka' nu to tomu-tomundo' Yehuda.

⁶Ka' mule' beleyum Pasyhur tiba iwi-iwi' na to utu-utus nu beleyum suele ohakopmo ahi' ka' oboamo i Babel. Ikiijo' mae beleyum saidi' mae silakamo ka' olamunmo; sumo aijo' mule' na sangalu nu beleyum iwi-iwi' anu nontulutimo sinin na kabaleko'an nu beleyum'.’ ”

⁷O Tumpu, Belento pagalamo nonsale'i aku ka' tinulutankumo. Belento na mohungku'i kahosonanku ka' nohungku'imo aku. Aku sola'mo kinokojoan nu to mia-mian pinopo ambangmo lengkat pe'e daagi' subu sangkutnyo sampe mamalom.

⁸Setiap aku motataemo, tionyo ahi' ku loboo'akon hoso-hoson, “Balaa'! Anu taha-tahahumo tokame mae!” O Tumpu aku lewa' okokojoi ka' opopo ambang sansina-sinaa kalana saja' monsisikakon potuunon nu Belento.

⁹Panyo de ikinyonyoangku montaloakonmo na aku, “Sahanyo ku kolilimimo ahi' na Tumpu, bolimo daagi' aku motatae momboa atas sanggo-Nyo,” saba' potuunon nu Belento sumomo ahi' apu anu ningobamo ikinyonyoangku. Pinisobangkumo na nongintim, panyo madi' ahi' ku poko ala.

¹⁰Ihongomo na mian momo oyong iyaya mae, “Mongoa'i buhuk nokeangmo iyaya mae! Imbo' da okalakmo na ia hi anu balakuasa!” Pakalaus mule' iwi-iwi' na sangalu anu mompahakona hondo aku mongindimo da aku silakamo. Aku nontaloakon, “Ugaat depagalamo osale'i, timbalimo ia opoko ala ohungku'into da opoko alantomo na mombalosakon hi ia ka'idekanto.”

¹¹Panyo Belento o Tumpu montinjohi mae aku, Belento mahoson hondo ka' baani. Aha anu mololoi' mae aku ka' saja' monsakisa aku saidi' mae tombahangkangmo ka' madi'mo daagi' moko ala mombau apa-apaa. Aha saidi' mae ma ambangmo sampe toka sidu-sidutu', madi'mo jadi iwi-iwi' na tanga'an nu aha. Ka' ambangan nu aha aijo' saja'mo bau ingatan.

¹²Panyo O Tumpu Anu Balakuasa, adin hondo na Belento nonguji'mo manusia; sinumbu'mo nu Belento na kinyonyoa tiba pikilan nu aha. Kalana aijo' situjui mae na aku montoa Belento mombalosakon palabuatan ma'idek nu sampobali' kalana hi Belentomo na ponsimpalakonankumo palakalangku.

¹³Onyanyiakon hi Tumpu ka' puji' na Ia kalana pinolapas-Nyomo na mian anu sinakisamo nu kakuasa'an nu mian anu palaganta.

¹⁴ Sahanyo kinutukan na sinaa kinahampeankumo! Pojohok da aku madi' ningkaliangan tempo'nyo aku pinohampemo nu tinangku.

¹⁵Sahanyo kinutukan na mian anu sola' mompolele anu nompojadimo tuumangku da ilame'mo hondo, salatan pinoto'imo hi ia, “Belento nohumpakmo samian na anak mo'ane!”

¹⁶Pojohok da mian anu momboa lele aijo' pokakanamo sumo kota-kota' anu ihansunanmo nu Tumpu madi'mo nonginau kalibosan. Pojohokmo da ia mohongo kihis nu mian kalana nalanitmo daagi' subu, tiba ais nu anu nahampatemo sonsu'un sinaa.

¹⁷Kalana ia madi' ahi' nompatei aku tempo'nyo aku daagi' pe'e i uno nu ma'alum, da aku tataap ahi' i uno nu ma'alum nu tinangku ka' ma'alumnyo aijo' sumomo ahi kubulanku.

¹⁸Kadaka' aku pinohampemo? Ola da monta'up kasansala'an tiba kasusa'an? Ka' mule' da kantumuu'anku mompala'i anu moko ambang samata-mata?