Read Saluan YEREMIA 21 Bible Online

YEREMIA 21 - Saluan bible

YEREMIA 21

¹I Zedekia tomundo' nu Yehuda nonsaimo mae hi belengku i Imam Pasyhur anak i Malkia, tiba i Imam Zefanya anak i Maaseya. Ia nonsaimo mae aha da mompoto'i hi belengku poitaon sumo uuka,

² “Pompoita pokinde' hi Tumpu guna kapentinganto, kalana i Nebukadnezar tomundo' nu aha Babel tibamo suludadunyo hau-haunyomo mae montumbuhi kota'to. Ihe na monsumbu' pa' Tumpu timbali mombau mae hi kita han anu okabangangi ka' mompakisa i Nebukadnezar po ule' mompalentah suludadunyo minsusule'.”

³Lantas Tumpu notataemo mae hi belengku, sahingga sinaingkumo na to mia-mian anu sinai mae aijo'

⁴da mompoto'i hi Zedekia taalu' Tumpu, Tumpu Allah Israel nompoto'imo mae sumo uuka, “Zedekia, Ku patundu'mo na suludadu nu beleyum anu hau-haunyo nahampatemo nongewa tomundo' Babel tiba suludadunyo. Sinin na toongon bau pahampate nu suludadu nu beleyum Ku tambunmo itotonga' nu kota'.

⁵Akumo ahi' na mompahampateakon belemiu tiba kahosonan anu memang ahi' mahosonmo totu-totu'u, kalana tambuha' anu taha-tahahumo.

⁶Mian anu jojoong ikota' aiya Ku pateimo; maumo manusia kabai binatang matemo nu panyakit anu molele ka' okabuhuk hondo.

⁷Beleyum tiba aha mian anu kopangkatnyo ka' mule' anu madi' silaka i uno nu pahampatean, kasusa'an i anu okaan, tiba panyakit anu molele, iwi-iwi' Ku pojohokmo da nu hakop i Tomundo' Nebukadnezar tibamo sinin na sampobali' nu belemiu anu kahanda'mo mompatei belemiu. Nu pateimo i Nebukadnezar na belemiu iwi-iwi' madi'mo daagi' ko ampunnyo ka' mule' madi'mo daagi' kokalibosan. Aku, Tumpu notataemo.”

⁸Lantas pinalentahmo mae nu Tumpu na aku da mompoto'i sumo uuka hi mian anu palesayamo hi Ia, “Potombihing mae! Na Aku, Tumpu mombee'mo hi beleyum sa'angu' na han anu opile'i: jalan anu mompanjolongi kantumuu'an kabai jalan anu mompanjolongi kapatean.

⁹Batu-batu mian anu jojoong i uno nu kota' saidi' mae silakamo nu pahampatean, kasusa'an i anu okaan, kabai panyakit anu molele. Panyo aha anu mosabatmo mangakumo kalah hi aha mian nu Babel anu hau-haunyomo montumbuhi kota' aiya na tumuu' ahi' madi'mo opatei.

¹⁰Noko tantukan-Kumo da mohansunimo kota' aiya ka' madi'mo daagi' mongkalibosi ia. Kota' aiya obee'mo hi tomundo' Babel; da nu papuimo sampe motanggotmo ingko-ingkot. Aku, Tumpu, notataemo.”

¹¹Tumpu nompalentahmo mae aku da mompotoakon potuunon sumo uuka hi aha to utu-utus itomundo Yehuda, lee'mae i Daud: “Potombihing mae apaa na anu Ku poto'i Aku, Tumpu. Bala usaha da ka' adilan opojalan ahi' sansina-toka sansinaa. Lapasakonmo na mian anu sola' o akali na tenaganyo anu nu kuasaimo nu kakuasa'an nu mian anu saja' mongakali tenaga nu mian. De madi' saba' palabuatan ma'idek anu bibinaumo nu belemiu mompolubatmo mae tambuha'-Ku anu ko suhu-suhutmo susumo apu anu madi'mo opoko ala opatei.”

¹³Lapas aijo' Tumpu notataemo hi Yerusalem, “O Yerusalem! Tampat nu beleyum lebe matangkas molingkudui bangka'nyo-bangka'nyo anu atina' mompaha ohani beleyum. Beleyum sumomo ahi' puge'nyo nu batu anu matunjo ipadang tampat anu mahata, panyo Ku ewamo na beleyum. Beleyum notataemo kooyum madi' ko samian pe'e na anu moko ala montumbuhi beleyum kabai mohobo'akon benteng-benteng nu belemiu,

¹⁴panyo Ku hukumo na beleyum kalana palabuatan nu beleyum atina'. Laigan nu tomundo' nu belemiu Ku papumo, ka' sinin na apaa anu atina' ohani suele ahi' motoyo'mo. Aku, Tumpu notataemo.”