Read Saluan YEREMIA 23 Bible Online

YEREMIA 23 - Saluan bible

YEREMIA 23

¹Tumpu Allah nu Israel notataemo, “Silakamo na belemiu o to pola-polaya' anu nonsilakaimo ka' nongga'a-ga'atakonmo mian anu palesayamo hi beleng-Ku! Belemiu sabenannyo ahi' monjagai mian anu palesayamo hi beleng-Ku, panyo madi' ahi' binau nu belemiu; belemiu nompojohokmo nosungkehet ka' nalaimo. Uuka aiya Ku hukumo na belemiu kalana belemiu nombaumo palabuatan anu ma'idek.

³Panyo tuha' nu mian anu palesayamo hi beleng-Ku po ule'mo Ku posihuk lengkat mae ilipu-lipu' anu pinomboan-Ku aha. Aha po ule'mo Ku sule'akon itano' kinahampean nu aha ka' lee' nu aha mompaka panjoo'mo.

⁴Aku mohangkatmo polaya' da monjagai aha. Mian anu palesayamo hi beleng-Ku madi'mo daagi' mabuhuk ka' madi'mo daagi' saja' nu lakat; madi'mo daagi' maga'a na mian anu aijo' hi aha. Aku, Tumpu notataemo.”

⁵ Tumpu notatae, “Tokaje mae na tempo'nyo, Ku hangkatje na tomundo' samian anu adil lee' mae i Daud. Tomundo' aijo' saidi' mae pande na mompalentah ka' apa-apaa na obau saja' adin ka' saja' totu'u isongko-songko na lipu'.

⁶De ia na mompalentah, mian nu Yehuda salamatmo ka' mule' mian nu Israel tumuu'mo madi'mo ko anu mompoposia. Tomundo' aijo' osanggohimo ‘Tumpu anu momposalamat Kita’.

⁷Tokaje mae na tempo'nyo, mian madi'mo daagi' basumpa' atas sanggong-Ku, Tumpu Allah anu tumuu' nonomboamo mian nu Israel nosabat lengkat i Mesir,

⁸panyo atasmo sanggong-Ku, Tumpu Allah anu tumuu' nonomboamo mian Israel nosabat lengkat mae isa'angu' na lipu' anu isasu utara ka' mule' lengkat mae isongko-songko na lipu' sangga'at anu pinongga'a-ga'atakonan-Kumo aha. Aha po ule'mo jojoong iposi tano' kinahampeannyo.”

⁹Sumo uuka na potuunonku hi aha to nabi-nabi: Kinyonyoangku nalibosmo hondo ka' aku ilakatnyomo. Tumpu tiba potatae-Nyo anu susi' nompolonguimo mae aku susumo anu nanjoo'mo na nonginum anggur.

¹⁰Lipu'to aiya nobuke'mo nu mian anu madi' tulu-tulutan hi Tumpu. Kantumuu'an nu aha saja'mo mombau anu ma'idek ka' sinala'mo na monggunakon kakuasa'an nu aha. Kalana kutuk nu Tumpu, sahingga hemput ipadang anu mateges nanggasmo ka' songko-songko na lipu' ihumangmo.

¹¹Tumpu notatae, “Nabi tiba imam madi'mo mongka'oho' tulu-tulutan hi beleng-Ku. Pakalaus mule' i uno nu Laigan-Ku ihumpak-Kumo na aha nombaumo palabuatan anu ma'idek.

¹²Kalana aijo' jalan nu aha malondomo ka' pintungmo sahingga aha tosumpunmo ka' tombahangkangmo. Ku potokamo mae na balaa' hi aha de tokamo mae na tempo'nyo pohukumanmo aha. Aku, Tumpu notataemo.

¹³Dosa' nu to nabi-nabi nu aha Samaria tinoang-Kumo. Aha motatae mompake atas sanggo nu Baal ka' nompotageo'mo pikilan nu Israel, mian anu palesayamo hi beleng-Ku.

¹⁴ Panyo mule' ahi' i Yerusalem tinoang-Ku to nabi-nabi nombaumo palabuatan anu lebe ma'idek mule'. Aha binaleko'mo ka' nasala'mo ka' mule' nonsangaja'imo mian anu mombau palabuatan anu ma'idek sahingga madi'mo daagi' ko samian na kahanda' balatobat. Ku anggap na aha iwi-iwi' na'idekmo susumo mian anu jojoong i Sodom tiba i Gomora.”

¹⁵Tumpu Anu Mahakuasa notatae, “Saidi' mae Ku bee'mo hi to nabi-nabi anu jojoong i Yerusalem aijo' sosu'anon anu mapakat da okaan tiba lasung anu o inum kalana aha nonsaduakonmo to mia-mian isongko-songko na lipu' madi'mo noholomati mae Aku.”

¹⁶Kona hi aha mian anu jojoong i Yerusalem, Tumpu Anu Balakuasa notataemo, “Boli mompotombihing potatae nu to nabi-nabi anu ola mompoto'i hahan anu otaha'imani padahan ola lekos. Aha ola mompoto'i posi pikilan anu nu potutugakon nu aha misa' ahi' potuunon-Ku.

¹⁷Kona hi to mia-mian anu madi' ka'oho' mompotombihing potataeng-Ku, aha saja' montaloakon, ‘Belemiu salamatmo.’ Ka' hi toto samian anu panggaga hondo aha montaloakon, ‘Beleyum madi' mule' mohumpak balaa'.’ ”

¹⁸Aku motatae, “Madi' kosamian pe'e na nabi haha aijo' monsumbu' apaa na anu i uno nu pikilan nu Tumpu. Madi' ko anu aijo' hi aha toho'mo nohongo ka' mangalati' apa-apaa na anu tinanga'an-Nyomo; madi' mule' ahi' ko anu mompalahatikan kabai mompajuli potatae-Nyo.

¹⁹Tambuha' nu Tumpu sumomo ahi' antong anu nonsantipmo to mia-mian anu ko palabuatannyo ma'idek.

²⁰Tambuha'-Nyo madi' momohokot de ma'isa pe'e iwi-iwi' jadi na anu tinanga'an-Nyomo. Saidi' mae imihinyo mian anu palesayamo hi Tumpu mangalati'je totu-totu'u han aijo'.”

²¹Tumpu notatae, “Makeke hondo na nabi haha aijo', padahan Aku madi' nompokau aha. Aha mompake atas sanggong-Ku na mompoto'i kaleba padahan madi' ko potuunon anu pinoto'ing-Ku hi aha.

²²De bisuanyo nu sumbu' nu aha apaa an anu uutu i uno nu pikilan-Ku, tantu pinoto'imo nu aha hi mian anu palesayamo hi beleng-Ku sinin na anu tinaloakon-Kumo. Sahingga mian anu palesayamo hi beleng-Ku tantu balatobatmo madi'mo daagi' mombau ka' mule' madi'mo mombau kalakuan nu aha anu ma'idek.

²³Aku, Tumpu Allah anu daagi' iyaya mae na tampat, misa' ola isa'angu' na tampat.

²⁴Madi' ko samian na moko ala momposuluk butongnyo da madi' Ku toa, kalana Aku daagi' iyaya mae na tampat: kiita' isuluga' ka' aiya idunia.

²⁵Iwi-iwi' na anu pinoto'imo nu nabi haha aijo' sinumbu'-Kumo. Nompakemo atas sanggong-Ku na aha nombaleko'i tukoonyo nu aha potuunon-Ku tinalimamo nu aha pino ipi mae.

²⁶Sampe toka hipian na nabi haha aijo' mompotalas pikilan nu mian anu palesayamo hi beleng-Ku mompotokamo kaleba anu ola nu posi kuku nu aha ipala?

²⁷Tantu nu tutugi nu aha tiba ipion haha aijo' anu nu sisikakon nu aha mian anu palesayamo hi beleng-Ku timbalimo mongkolilimi mae Aku susumo mompolee' nu aha nongkolilimimo mae Aku ka' nonsombahmo Baal.

²⁸Nabi anu nongipimo sabenannyo ahi' mompoto'i, ‘Aiya ola anu ingipi.’ Panyo nabi anu nohumpakmo potuunon lengkat mae hi beleng-Ku na tionyo ahi' mompoto'i potuunon aijo' tiba sahondo-hondonyo. Gandum madi' timbali opokakanakon tiba hatinyo.

²⁹Potataeng-Ku sumo apu, ka' mule' sumo pombaan anu mohansuni batu!

³⁰Ku ewamo na to nabi-nabi anu mompoto'i potuunon anu lengkat mae hi bubu' aha sangalunyo lantas osisik tukoonyo aijo' lengkat mae hi beleng-Ku.

³¹Aku mule' suele mongewamo to nabi-nabi anu mompoto'i posi potataenyo lantas osisik tukoonyo aijo' lengkat mae hi beleng-Ku.

³²Aku, Tumpu, mongewamo nabi haha aijo' anu mompoto'i ipionnyo haha aijo' anu baleko' ahi' hondo-hondo aijo'. Aha nompotalasmo pikilan nu mian anu palesayamo hi beleng-Ku nu kabaleko'an tiba sisik-sisik anu bulon aijo' hi aha. Aku madi' nompalentah nabi haha aijo'. Aha madi' hondo-hondo ko gunanyo hi aha mian anu palesayamo hi beleng-Ku. Aku, Tumpu, notataemo.”

³³Tuhan notatae, “O Yeremia, de daagi' ko sala' samian na mian anu palesayamo hi beleng-Ku, kabai samian na nabi kabai imam mompokilawa hi beleyum, ‘Apaa na anu pinotuun mae nu Tumpu?’, tionyo ahi' nu taami nu beleyum, ‘Beleyumo na tanggungan aijo' anu nu bee' nu Tumpu; kalana aijo' beleyum oboamo’.

³⁴De daagi' ko sala' samian na mian anu palesayamo hi beleng-Ku kabai nabi kabai imam poule' motatae, mongkona ‘tanggungan anu nu bee' nu Tumpu’, saba' ia aijo' tiba to utu-utusnyo mae Ku bee'imo hukuman.

³⁵Panyo mule' ahi', batu-batu mian tionyo ahi' mompokilawa hi sangalunyo tiba hi' to utu-utusnyo, ‘Pa' apaa na pinontaami mae nu Tumpu?’ kabai ‘Apaa na koonyo nu Tumpu?’

³⁶Aha madi'mo timbali daagi' monggunakon potatae, ‘tanggungan anu nu bee' nu Tumpu’. De daagi' ko mian anu monggunakon potatae aijo', saba' Ku pojadimo na potuunon-Ku totu-totu'u da baumo tanggungan anu obee'mo hi ia. Mian anu montaloakon ‘tanggungan anu nu bee' nu Tumpu'’ ola kalana monggeo-geo'akon potataeng-Ku, Tumpu Allah nu aha, Tumpu Allah anu tumuu', Tumpu Anu Mahakuasa.

³⁷Aha ola ahi' mompoto'i sabenanyo hi aha to nabi-nabi, ‘Apaa na pinontaami nu Tumpu hi beleyum? Apaa na koonyo nu Tumpu?’

³⁸De daagi' ko anu madi' tulu-tulutan hi palentah-ngKu aijo' ka' daagi' mompake potatae, ‘tanggungan anu nu bee' nu Tumpu’,

³⁹saba' Ku tolukmo na aha ka' o'alinmo jo'o-jo'on, maumo aha maumo kota' anu binee'-Kumo hi aha tiba mompolee' nu aha.

⁴⁰Ku pojadimo na aha da ma'ambangmo ka' madi'mo kohalaga'nyo sampe toka sidu-sidutu' ka' mule' uki' nu aha madi'mo nu kolilimi nu mian.”