Read Saluan YEREMIA 25 Bible Online

YEREMIA 25 - Saluan bible

YEREMIA 25

¹ Itaun kino opatnyomo salatan i Yoyakin anak momo'ane i Yosia tinimbalimo tomundo' nu aha Yehuda, aku nohumpakmo potuunon lengkat mae hi Tumpu mongkona iwi-iwi' na bansa Yehuda. Tempo'nyo aijo' tahunmo palatamanyo na i Nebukadnezar tinimbali tomundo nompalentah i Babel.

²Ku poto'i hi aha songko-songko na bansa Yehuda tiba hi aha mian anu jojoong i Yerusalem.

³“Inguampulu' ka' totolu' na taun na kinopinnyo, salatanmo pe'e itaun kinosampulu'nyomo ka' totolu' na i Yosia nompalentah Yehuda anak momo'ane i Amon sampe tinoka isinaa aiya Tumpu notataemo mae hi belengku ka' madi' toho' madi' pinoto'ingku hi belemiu apaa na anu pinoto'i-Nyomo mae. Panyo madi' ahi' pinajulian nu belemiu.

⁴Tumpu mule' ahi' saja'mo nonsai namba hi belemiu to nabi-nabi salaku to posa-posaihon-Nyo, panyo belemiu madi' ahi' mongka'oho' mompotombihing ka' mompalahatikan aha.

⁵Aha nompalentahmo belemiu da mompala'imo palabuatan nu belemiu anu ma'idek atina' ka' saja-saja'mo mombau dosa', da belemiu tataapmo jojoong ilipu' aiya anu binee'mo nu Tumpu hi belemiu ka' hi mompolee' nu belemiu salaku bau pusaka' nu belemiu.

⁶Nabi haha aijo' nontewa'mo belemiu da bolimo monsombah ka' palesaya hi to pilo-pilogot sangga'at. Aha nontewa'mo belemiu monsombah pilogot anu oposi bau nu belemiu, kalana aijo' monsaduakonmo da Tumpu motambuha'. De otulutimo na palentah nu Tumpu aijo' Ia madi'mo mohukum belemiu.

⁷Panyo Tumpu nontaloakonmo tukoo-Nyo belemiu madi' mohongo hongo Ia. Belemiu ola mule' ahi' mompaka bau da Ia motambuha', kalana pilogot nu belemiu haha atina'. Posi belemiumo na mohukum butong nu belemiu atina'.

⁸Kalana belemiu madi' mongka'oho' mompotombihing potatae-Nyo, sahingga Tumpu Anu Mahakuasa nompoto'imo,

⁹‘Ku lagamo mae na bansa iwi-iwi' anu lengkat mae isasu utara, tiba suele i Nebukadnezar posaihon-Ku tomundo' nu aha Babel. Aha Ku palentahmo da mompahampateakonmo mongewa Yehuda tiba anu jojoong kiijo' ka' mule' sinin na bansa anu mompaha ohani. Bansa Yehuda tibamo bansa-bansa sangga'at anu mompaha ohani Ku silakaimo ka' mule' Ku pojohokmo da hansunmo sampe toka sidu-sidutu'. To mia-mian anu montoa ia tolokengkengmo ka' mule' mabuhukmo. Aku, Tumpu notataemo.

¹⁰ Onyi' nu kalame'an anu taha-tahaumo lame' na aha ka' kalame'an nu bau-bauon anu mo'osoa Ku pobelentimo. Aha madi'mo mohumpak lanya' anu otutungi bau sulu' tiba gandum nu aha mingkotmo.

¹¹ Songko-songko na lipu' aiya Ku pojohokmo da hansunmo ka' liingmo. Bansa-bansa anu mompaha ohani saidi' mae tulutmo hi tomundo' Babel pitumpulu' na taun na kopinnyo.

¹²Lapas aijo' Ku hukumo na bansa Babel tiba tomundo'nyo kalana dosa' nu aha. Lipu' nu Babel Ku hobo'akonmo ka' Ku hansunimo sampe toka sidu-sidutu'.

¹³Babel Kuhukumo nu balaa' manjoo' hondo anu pinotutugakon-Kumo pohukum bansa-bansa tiba hi aha anu pinoto'ing-Kumo hi Yeremia ka' pinoto'inyomo hi aha aijo'mo iwi-iwi' na balaa' anu tinulismo ikitab aiya.

¹⁴Iwi-iwi' na palabuatan nu aha mian nu Babel Ku balosimo; aha nu botuanimo nu to tomu-tomundo' toto daka-daka' na kakuasa'annyo ka' mule' manjoo' na to bansa-bansa anu mombotuani'.’ ”

¹⁵Tumpu, Tumpu Allah nu aha Israel, notataemo mae hi belengku, “Ala na galas nu anggur aiya anu ingisian-Kumo nu anggur tambuha'-Ku. Boamo hi iwi-iwi' na bansa pa' iya na kalambanan ponsaian-Ku beleyum mamba, ka' pokau na aha da monginum anggur aiya.

¹⁶De nu inumo nu aha, aha mahasungonanmo ka' lipunmo na pikilan kalana pahampatean anu Ku potokamo hi aha.”

¹⁷Sahingga ingalang-Kumo na galas aijo' hi lima nu Tumpu dan nambamo hi sinin na bansa anu pinonsaian nu Tumpu kalambananku, lantas ingusahakonkumo da nu inum nu aha na anggur aijo'.

¹⁸Yerusalem tiba iwi-iwi' na kota' nu Yehuda tiba to tomu-tomundo' ka' mian anu ko pangkatnyo pino inumankumo anggur aijo', sahingga aha jinadimo susumo padang tampat anu kinunmo ka' okabuhukmo. Sampe toka sinaa uuka sanggo nu aha opakemo bau pongkutuki.

¹⁹Aiya na daputan nu to mia-mian sangga'at anu tionyo ahi' monginum anggur igalas nu Tumpu aijo': tomundo' nu Mesir tiba to mia-mian anu ko pangkatnyo tiba anu toto pangka-pangkat matangkas; iwi-iwi' na aha mian nu Mesir tiba mian anu lengkat mae isalipu'an anu jojoong i Mesir; iwi-iwi' na tomundo' ilipu' Us; iwi-iwi' na tomundo' nu kota' Filistin, anu jojoong i Askelon, i Gaza, i Eskron; iwi-iwi' na mian anu daagi' tumuu' i Asdod; iwi-iwi' na aha mian nu Edom, Moab tiba Amon; iwi-iwi' na tomundo' nu aha Tirus tiba Sodom; iwi-iwi' na tomundo' nu daerah sonibi nu Ambai anu i Totonga'nyo kota-kota' nu Dedan, Tema, tiba Bus; iwi-iwi' na mian anu mongkodo'imo ubaknyo na monggunting; iwi-iwi' na tomundo' nu aha Arab; iwi-iwi' na tomundo' nu tulunan nu bansa anu nogogalo'anmo anu jojoong ipadang tampat anu mateges; iwi-iwi' na tomundo' nu aha Zimri, Elam, tiba Madai; iwi-iwi' na tomundo' anu isasu utara, maumo ahi' ma'jo'on ka(...)

²⁷Lantas Tumpu notataemo mae hi belengku, “Poto'i hi aha mian haha aijo' taalu' Aku, Tumpu Anu Balakuasa Tumpu Allah Israel mompalentah aha da monginum sampe malangu ka' sola' molua'i. Ku usahakon na aha da tombahangkang ka' madi'mo daagi' po ule' mobula kalana pahampatean anu Ku potokamo mae hi aha.

²⁸Ka' de aha madi' mongka oho' montalima galas anu atina' hi lima nu beleyum da o inum na anggurnyo, poto'i taalu' Tumpu Anu Balakuasa nompalentahkonmo mae han aijo'.

²⁹Ku tampu'unimo na mohansuni lengkat pe'e iposi kota'-Ku. Dumo nu sangka nu aha au' aitu aha na madi' ahi' ohukum. Aha na memang ahi' ohukumo kalana Aku mompotokamo mae pahampatean hi iwi-iwi' na bansa anu isongko-songko na dunia aiya. Aku, Tumpu Anu Balakuasa, notataemo.

³⁰Iwi-iwi' na anu pinoto'ing-Kumo hi beleyum, o Yeremia, tionyo ahi' nu poto'i nu beleyum. Poto'i hi aha, ‘Potatae nu Tumpu pinobehengkatmo mae lengkat i suluga'; lengkat mae itampat-Nyo anu susi'. Ia binuhokanmo mae susumo gohung mongewa mian anu palesayamo hi Ia. Songko-songko na mian anu jojoong idunia aiya mohongomo Ia molo ais sumomo to mia-mian anu mokalaja mompao' anggur itampat pompetian anggur.

³¹Toka-toka ipuus nu tano' na loung nu potatae-Nyo; Tumpu nahampalakalamo tiba to bansa-bansa. Iwi-iwi' na mian oputusimo na palakalanyo ka' anu ma'idek na palabuatannyo obee'imo hukuman mate.’ ”

³²Tumpu Anu Balakuasa notatae, “Lengkat mae ipuus nu tano' antong daka' binuhokanmo mae susumo gohung; balaa' nontuda'mo mae bansa-bansa toto sa'angu'.”

³³Toka isinaa aijo' bangke' nu to mia-mian anu pinateanmo nu Tumpu motanatamo isongko-songko na dunia. Aha madi'mo ohangi ka' mule' madi'mo o ato da olamun, panyo olamo ahi' opojohok itano' susumo tambulan nu duhehe.

³⁴O to pola-polaya', o to pola-polaya' nu mian anu palesayamo hi Tumpu! Haangmo hoso-hoson! Pingkaleade'mo i abu', kalana tinokamo na tempo'nyo belemiu opateimo, ka' anu madi' opatei oga'a-ga'atakonmo mamba iyaya mae. Belemiu sumomo ahi' kuhon anu mahan na olinyo nanabu'mo ka' noposo'mo.

³⁵Belemiu memang madi'mo daagi' moko ala mopalai.

³⁶Belemiu mompele-pele'mo ka' humangmo kalana susa'mo kalana Tumpu notambuha'mo hondo na Ia nompateimo bansa nu belemiu ka' nohansunimo lipu' nu belemiu anu lame' hondo aijo'.

³⁸Susumo singa nosabatmo mae lengkat i liangnyo, sumo aijo'mo na Tumpu nosabatmo mae da mohukumo mian anu palesayamo hi Ia. Kasinggian nu pahampatean tiba tambuha' nu Tumpu nongabali'mo lipu' aiya sahingga tinimbalimo padang tampat anu mateges.