Read Saluan YEREMIA 26 Bible Online

YEREMIA 26 - Saluan bible

YEREMIA 26

¹ Lia-lia' salatan i Yoyakim anak momo'ane i Yosia tinimbalimo tomundo' nu Yehuda,

²Tumpu notataemo mae hi belengku, “Lako mamba tuminjo' ipopasan nu Laigan-Ku ka' potataemo hi aha mian anu jojoong Yehuda anu toka mae monsombah ikiijo'. Poto'i hi aha iwi-iwi' na anu Ku palentahkon hi beleyum da opoto'iakon hi aha. Boli oga'ai mau ola sangkiding.

³Ihe na monsumbu' bansa aijo' mongka'oho' ahi' mompotombihing, lantas madi'mo mombau anu ma'idek sahingga Ku intimo na niat-Ku monsilakai aha sitimbang tiba palabuatan nu aha ma'i-ma'idek aijo'.”

⁴Tumpu nompalentahmo mae aku mompoto'i sumo uuka hi aha. “Aku, Tumpu nompalentahmo da belemiu tulu-tulutan hi beleng-Ku ka' mompojalan atulan-atulan anu binee'-Kumo hi beleyum.

⁵Belemiu tionyo mule' ahi' mompotombihing apaa na anu nu poto'i nu posaihon-Ku, to nabi-nabi anu sabole-bole saja' Ku palentah mamba hi belemiu. Panyo belemiu madi' ka'oho' mompotombihing aha.

⁶ Panyo de belemiu tataap panggaga, laigan anu bau ponsomban aiya Ku pojadimo susumo Silo, sahingga sinin na bansa idunia aiya mompakemo sanggo nu kota' Yerusalem aiya salaku bau pongkutuki.”

⁷Iwi-iwi' na anu ku poto'i Laigan nu Tumpu aijo' ihongomo nu to ima-imam, to nabi-nabi tiba aha mian da'isan.

⁸Lia-lia' salatan pinokopoto'ingkumo na potuunon nu Tumpu susumo anu pinalentahkon-Nyomo, aha nohakopmo mae aku ka' noloboo'mo, “Beleyum matemo!

⁹Baano hondo na beleyum montaloakon mompake atas sanggo nu Tumpu kooyum Laigan-Nyo aiya opojadimo susumo Silo ka' mule' kota' aiya ohansunimo ka' timbalimo tampat anu madi'mo daagi' ojoongi.” Lantas aku tinikubanmo nu aha mian, da'isan hondo.

¹⁰Salatan to mia-mian anu toto tangka-tangkas na pangkatnyo i uno nu pamalentahan Yehuda nohongomo apaa na anu jinadimo aijo', aha sampamo mae nosabat aijo' iLaigan nu tomundo' lantas nambamo iLaigan nu Tumpu, ka' sinumuhangmo i Sabatan Daka' anu salaje' Binau.

¹¹To ima-imam tiba to nabi-nabi notataemo hi aha to mia-mian anu toto tangka-tangkas na pangkatnyo haha aijo' ka' hi aha mian da'isan, “Mian aiya patutmo ohukum mate kalana ia nontaloakonmo potatae, anu mongka'ideki kota'to aiya. Belemiu suele nohongomo ahi'.”

¹²Lantas aku notataemo, “Tumpu na nompalentahmo mae aku da mompoto'i potuunon mongka'ideki Laigan nu Tumpu tiba kota' aiya susumo anu ihongomo nu belemiu.

¹³Kalana aijo' bali'imo na jalan nu kantumuu'an nu belemiu tiba palabuatan-palabuatan nu belemiu; tuluti na Tumpu Allah nu belemiu da Nu intim pe'e na niat-Nyo monsilakai belemiu.

¹⁴Mongkona butongku aiya, memang i unomo nu kakuasa'an nu belemiu da mombaumo maumo ahi' pa' apaa na anu nu kahanda'i nu belemiu.

¹⁵Panyo jaga ahi', de belemiu mompateimo mae aku, belemiu tiba mian anu jojoong ikota' aiya montanggungimo kasala'an kalana nompateimo mian anu madi' ko sala'nyo. Kalana Tumpu ahi' na nonsaimo mae aku da mompokinde'i belemiu.”

¹⁶Sahingga to mia-mian anu toto tangka-tangkas na pangkatnyo i uno nu pamalentahan tiba aha mian daisan notataemo hi to ima-imam ka' hi to nabi-nabi haha aijo', “Mian aiya motatae mompake atas sanggo nu Tumpunto; madi' pantas na ia ohukum mate.”

¹⁷Lapas aijo' pa' aha sangkuka na to pola-polaya' nu bansa tinuminjomo i ahop nu mian da'isan ka' notataemo hi aha to mia-mian anu sinihukmo ikiijo'.

¹⁸ “Tempo'nyo i Hizkia tinimbalimo tomundo' nu Yehuda, i Nabi Mikha anu lengkat mae i Moresyet nompoto'imo hi aha mian da'isan potatae sumo uutu, lengkat mae hi Tumpu Anu Mahakuasa, ‘Sion opajekomo susumo ale' Yerusalem timbalimo tambulan nu anu na'idekmo, tiba puge'nyo nu Laigan nu Tumpu timbalimo alas.’

¹⁹Panyo i Tomundo' Hizkia tiba aha mian nu Yehuda madi' nompatei i Mikha. Ola ahi' i Hizkia nabuhukmo hi Tumpu ka' nongkakasemo da okalibosi. Sahingga Tumpu madi'mo nonsidahi niat-Nyo mompateimo aha. Ka' uuka aiya, me ise-ise' kita nompotokamo mae balaa' anu daka' hondo iposi butongto.”

²⁰Daagi' toho' suele kino samian notatae mongka'ideki kota' tiba bansa aiya nompake atas sanggo nu Tumpu, susumo anu binaungkumo aiya. Mian aijo' sanggonyo i Uria anak i Semaya anu lengkat mae i Kiryat-Yearim.

²¹Salatan i Tomundo' Yoyakim tiba to sulu-suludadu anu toto tangka-tangkas na pangkatnyo ka' mule' to mia-mian anu tota tangkas-tangkas na pangkatnyo i pamalentahan nohongomo anu tinaloakon i Uria, i tomundo' kinogau'mo da opateimo na ia. Panyo salatan ihongomo i Uria na han aijo' ia nabuhukmo ka' nopalaimo namba i Mesir.

²²Panyo pinalentahmo i Tomundo' Yoyakim na i Elnatan anak i Akhbor tiba mian sangga'at pa' aha sangkuka da mamba i Mesir ka' mompoboa mae i Uria.

²³Lantas binoamo mae nu aha na ia hi Tomundo' Yoyakim. Lapas aijo' pinalentahmo i tomundo'da opateimo na ia, ka' bangke'nyo mamba o alin itampat polamunan nu aha mian da'isan.

²⁴Panyo uuka aiya kalana balakat tinulunganmo mae i Ahikam anak i Safan, aku i Yeremia madi'mo binee' hi aha mian da'isan da pinatean.