Read Saluan YEREMIA 27 Bible Online

YEREMIA 27 - Saluan bible

YEREMIA 27

¹ Madi' pinin salatan i Zedekia anak momo ane i Yosia tinimbalimo tomundo' nu Yehuda, pinalentahmo nu Tumpu na aku,

²da mombau kahohon te kilit na obau tiba tokon te kau na obau, ka' opokona itundunku.

³Ia mule' ahi' nompalentahmo mae aku da mompoto'i potuunon-Nyo hi aha tomundo' nu Edom, Moab, Amon, Tirus, tiba Sidon, han aijo' pinoto'inyo hi mian haha aijo' anu sinai mae nu aha titinokamo i Yerusalem mamba mae molenga i Tomundo' Zedekia.

⁴Tionyo ahi' ku poto'i hi aha taalu' Tumpu Anu Balakuasa hondo, Tumpu Allah nu Israel nompoto'imo,

⁵“Tiba kakuasa'anKu anu daka' hondo ka' mule' tiba kahosonan-Ku, Aku noko alamo nompojadi' tano' tiba manusia ka' mule' sinin na binatang, ka' timbali Ku bee' na aijo' maumo pa' hihe na mian anu Ku kahanda'i.

⁶Akumo na anu nombee'mo iwi-iwi' na bansa aiya i uno nu kakuasa'an nu posaihon-Ku, i Nebukadnezar tomundo' nu aha Babel. Ka' mule' binatang suele ahi' binee'-Kumo hi ia da nu kuasaimo.

⁷Iwi-iwi' na bansa tundu'mo hi ia, hi anaknyo momo'ane tiba hi makumpunyo sampe tokaje na tempo'nyo negaranyo aijo' madi'mo balakuasa. Toka itempo'nyo aijo' bansa Babel tundu'mo hi bansa-bansa sangga'at anu mahason ka mule' to tomu-tomundo'nyo anu daka na kakuasa'annyo.

⁸Bansa kabai kalaja'an anu madi' ka'oho tondu' hi Nebukadnezar saidi' mae Ku hukumo nu pahampatean, kasusa'an i anu okaan, tiba panyakit anu molele, sampe bansa aijo' ahennyo tondu'mo hi ia.

⁹Boli mompotombihing aha to nabi-nabi kabai maumo ahi' pa' ihe na anu montewa belemiu tundu' hi tomundo' Babel, maumo ahi' aha mangaku nontalimamo pokinde' anu pino ipi mae, nu to roh-roh anu madi' otoa-toa, kabai kalana nompakemo kahosonan nu pangatahuan.

¹⁰Aha mongakalimo belemiu sahingga belemiu oboamo jo'o-j'on opala'imo na lipu' nu belemiu. Ku laa'mo na belemiu da madi'mo jojoong ilipu' nu belemiu, ka' belemiu silakamo.

¹¹Panyo bansa anu mongka'oho' ahi' tundu' ka' mongka'oho' ahi' tulut hi tomundo' Babel na Ku pobee' ahi' jojoong itano' kinahampean nu aha, ka' mongale' ikiijo'. Aku, Tumpu notataemo.”

¹²Padon hi Zedekia tomundo' nu Yehuda, aku i Yeremia, suele ahi' nompoto'imo sumo aijo'. Pinoto'ingku, “Paninta'alukmo hi tomundo' Babel. Tulutimo na ia ka' suele hi bansanyo da belento Tomundo' salamat.

¹³Tumpu nompoto'imo, koo-Nyo bansa anu madi' tundu' hi tomundo' Babel saidi' mae silakamo nu pahampatean, kasusa'an i anu okaan, kabai panyakit anu molele. Kadaka' belento Tomundo' tiba mian da'isan mongka'oho'mo silaka susumo aijo'?

¹⁴Boli mompotombihing to nabi-nabi anu montewa belento Tomundo' tundu' hi tomundo' nu Babel, kalana aha mongakalimo belento Tomundo'.

¹⁵Aha nompoto'i tukoonyo nu aha, aha binasisik nompake atas sanggo nu Tumpu, panyo aha baleko'. Posi Tumpu ahi' na nontaloakon tukoo-Nyo Ia madi' ahi' nonsai mae aha. Kalana aijo' Nu ga'a-ga'atakonmo ka' mompateimo i Tomundo' tiba to nabi-nabi anu binaleko'mo hi Tomundo'.”

¹⁶Lapas aijo' ku poto'imo hi to ima-imam ka' hi iwi-iwi' na mian da'isan tukoongku Tumpu notataemo mae sumo uuka, “Boli mompotombihing to nabi-nabi anu nompoto'i tukoonyo nu aha madi'mo daagi' pin to bala-balang anu i uno nu LaiganKu po ule'mo mae osule'akon lengkat mae i Babel. Aha baleko'.

¹⁷Boli mompotombihing aha! Tundu'mo ahi' hi tomundo' nu Babel, da belemiu salamat. Apaa na gunanyo na kota' aiya hansun?

¹⁸De memang ahi' aha totu'u nabi, ka' nontalimamo potuunon lengkat hi beleng-Ku, tantu aha uuka aiya nomoitamo mae hi beleng-Ku, Tumpu Anu Mahakuasa da to bala-balang anu daagi' i uno nu Laigan-Ku tiba anu daagi' i laigan nu tomundo' i Yerusalem madi' binoa i Babel.

¹⁹Kalana Aku, Tumpu Anu Mahakuasa, Tumpu Allah Israel nontantukanmo balang haha aijo' iwi-iwi' o atomo oboa i Babel, ka' tataapmo kiijo' mae sampeje poule'mo Ku kanonongi na aha. Toka itempo'nyo aijo' po ule'je Ku sule'akon mae na aha itampat aiya. Aku, Tumpu notataemo.” To bala-balang anu daagi' i Laigan nu Tumpu aijo' atina'mo: sinin na ohi' nu kemah, kuhon tambaga, kareta-kareta, ka' mule' to pia-piangkuka na balang sangga'at anu pino una' i Laigan nu Tumpu. Balang haha aijo' madi' binoa i Babel, tempo'nyo i Yoyakhin anak momo'ane i Yoyakim tomundo' nu Yehuda ka' mule' to tu'a-tu'anyo nu kampung i daerah Yehuda tiba Yerusalem binoamo itomundo' Nebukadnezar namba i Babel.