Read Saluan YEREMIA 29 Bible Online

YEREMIA 29 - Saluan bible

YEREMIA 29

¹ Aku nontulismo surat namba hi to ima-imam, hi to nabi-nabi, hi to pola-polaya' nu bansa anu daagi' tutuu' ka' mule' toka hi mian sangga'at anu binoamo mae lengkat i Yerusalem namba i Babel binoa i Nebukadnezar.

²Sulat aijo' tinulisku salatan i Tomundo' Yoyakhin, tiba tinanyo, to mia-mian anu ko pangkatnyo ilaigan nu tomundo', tiba to mia-mian anu toto tangka-tangkas na pangkatnyo i pamalentahan Yehuda tiba i Yerusalem, to mia-mian anu monsumbu' pakalaja'an nu lima, to mia-mian anu pande mombau apa-apaa, binoamo itampat pinompojoongan.

³Aku nompakatumo sulat da binoakon i Elasa anak i Safan, tiba hi Gemarya anak i Hilkia anu sinai i Zedekia tomundo' nu Yehuda namba hi Nebukadnezar tomundo' nu Babel. Sulat aijo' onyi'nyo,

⁴“Sumo uuka na koo-Nyo nu Tumpu Anu Mahakuasa, Tumpu Allah nu aha Israel toka hi iwi-iwi' na mian anu binoa-Nyomo lengkat mae i Yerusalem namba i Babel;

⁵‘Tataapmo ikiijo' mae. Pombaumo laigan na belemiu. Pongale'mo ka' hakumo na isinyo nu ale'.

⁶Po osoamo da belemiu mohumpakmo anak, ka' suele to ana-anak nu belemiu po osoa suele da aha mohumpak anak. Konjoo'nyo nu belemiu tionyo ahi' ko pintu-pintuangnyo ka' madi' timbali maga'a.

⁷Bakalaja da kokabilahian ahi' na kota' tampat anu pinomboan-Ku belemiu. Balado'a mae hi beleng-Ku bau kapalaluan nu kota' nu belemiu haha atina', kalana de kota' haha itina ma'ima'mo na kantumuu'an nu aha, belemiu suele ma'ima'mo ahi' na kantumuu'an nu belemiu.

⁸Aku, Tumpu Anu Mahakuasa, Tumpu Allah nu aha Israel, nompokinde'imo belemiu da boli ahi' opopilaya na butong nu belemiu nu akali nu to nabi-nabi anu jojoong atina' hi belemiu kabai maumo ahi' pa' hihe anu suele notataemo tukoonyo nu aha, aha moko ala ahi' mongkila-kila apaa na anu jadi' aiya mae i ahop. Boli lewa' mompajuli anu lewa' nu ipi nu aha.

⁹Aha mompake atas sanggong-Ku na monsisik hi belemiu hahan anu madi' totu'u. Aku madi' nompokau aha. Aku, Tumpu notataemo'.’

¹⁰ Tumpu notatae, ‘De sampa'mo pitumpulu' na taun na kopinnyo na tempo' nu aha Babel mongala kasampatan, Aku po ule'mo mompalahatikan belemiu ka' Ku ganapimo na palajanjian-Ku po ule'mo momboa belemiu mo uuka mae itampat aiya.

¹¹Te misa' Ku posi sumbu'i ahi' na anu tinanga'an-Kumo mosia na belemiu atina'? Apaa na anu tinanga'an-Kumo aijo' misa' da monsilakai belemiu panyo da bau ka'ima'an nu kantumuu'an nu belemiu ka' mombee'i belemiu kasampatan anu lebe ma'ima' aiya mae i ahop.

¹²Sahingga belemiu momoitamo mae tulung hi beleng-Ku. Belemiu tokamo mae balado'a hi beleng-Ku ka' Ku taamimo na do'a nu belemiu.

¹³ Belemiu moliomo Aku ka' Aku ohumpakmo nu belemiu, kalana oliomo nu belemiu nu kinyonyoa anu totu-totu'u.

¹⁴Memang totu'u ohumpakmo nu belemiu na Aku. Belemiu Ku posihukmo lengkat mae hi iwi-iwi' na bansa ka' lengkat mae hi iwi-iwi' na lipu' tampat belemiu gina'a-ga'atakonmo ka' binoa. Belemiu po ule'mo Ku sule'akon mae ilipu' pinolengkatan nu belemiu aiya ka' mule' po ule'mo Ku bee' na kantumuu'an nu belemiu anu nai puan mae. Aku, Tumpu notataemo.’

¹⁵Koonyo nu belemiu, Tumpu nombee'imo belemiu to nabi-nabi kiijo' mae i Babel.

¹⁶Soba potombihing mae apaa na anu pinoto'imo nu Tumpu mongkona tomundo' anu nompalentahmo tempo' uuka aiya, aijo'mo tomundo' lee' mae i Daud ka' mule' mongkona mian anu jojoong ikota' aiya, aijo'mo to utu-utus nu belemiu anu madi' binoa tiba belemiu itampat pinompojoongan.

¹⁷Tumpu Anu Balakuasa hondo notataemo, ‘Ku potokamo mae na pahampatean, kasusa'an i anu okaan, tiba panyakit anu molele hi aha. Aha Ku pojadimo susumo bua' nu kau' ara anu nahutakmo hondo sahingga madi'mo timbali okaan.

¹⁸Aha Ku pototumputimo nu pahampatean, kasusa'an i anu okaan, tiba panyakit anu molele, sahingga songko-songko na bansa idunia aiya anu montoa aha mabuhukmo na montoa kantumuu'an nu aha. Maumo pa' iyaya mae na pongga'a-ga'atakonan-Ku aha mian mabuhukmo, ka' meatmo na montoa apaa na anu jinadimo aijo' hi aha. Aha sola'mo okokojoi ka' mule' sanggo nu aha opakemo salaku bau lewa' pongkutuki.

¹⁹Iwi-iwi' aijo' jinadimo hi aha, kalana aha madi' ahi' montuluti potuunon-Ku anu saja'mo Ku poto'i hi aha anu sola-sola' nu poto'i nu to nabi-nabi aijo'mo to posa-posaihon-Ku. Aha madi' mongka'oho' mompalahatikan potuunon-Ku aijo'.

²⁰Ka' mule' belemiu iwi-iwi' anu binoang-Kumo namba i Babel potombihing mae apaa na Aku Tumpu tinaeakon.’

²¹Tumpu Anu Mahakuasa, Tumpu Allah Israel nonsisikmo mongkona i Ahab anak momo'ane i Koloya ka' mongkona i Zedekia anak momo'ane i Maaseya anu nompakemo atas sanggo nu Tumpu na nompoto'i hi belemiu hahan anu madi' totu'u. Tumpu notataemo tukoo-Nyo Ia mombee'mo aha hi kakuasa'an i Nebukadnezar tomundo' nu aha Babel, anu saidi' mae mompateije aha i ahop nu mata nu belemiu.

²²Sahingga de bisuanyo aha mian anu binoamo lengkat mae i Yerusalem namba i Babel mongkutukimo ihehe na mian, aha motataemo, ‘O amalakon da Tumpu mombaumo beleyum susumo i Zedekia tiba i Ahab, anu pinapuanmo titu-tituu' nu tomundo' Babel’.

²³Sumo aijo'mo na uki' nu aha kalana nombaumo dosa' toto daka-daka' hi aha Israel: aha nasala'mo, ka' nompakemo sanggo nu Tumpu na monsisik hahan anu madi' totu'u. Han aijo' madi' sosok tiba tanga'an nu Tumpu. Nu sumbu' apaa na anu nu bau nu aha, ka' posi iamo ahi' na jadi sakisi mongewa aha. Tumpu notataemo.”

²⁴Tumpu Anu Mahakuasa, Tumpu Allah nu Israel nompotuunmo mae hi belengku da opotoka hi Semaya, mian nu Nehelam, kalana i Semaya nompakatumo sulat nompake atas sanggonyo hi aha songko-songko na mian anu jojoong i Yerusalem, hi Imam Zefanya anak i Maaseya ka' mule' hi aha iwi-iwi' na imam sangga'at. I uno nu sulat aijo' tinulis i Semaya sumo uuka toka hi Zefanya:

²⁶“Tumpu nohangkatmo beleyum tinimbali imam da mombolosakon i Yoyada, ka' uuka aiya beleyumo na pangkat anu matangkas hondo i uno nu Laigan nu Tumpu. Kalaja nu beleyum aijo'mo da mompalentah da supaya batu-batu mian anu ulawon, anu mongakui butongnyo nabi, ia otalungku'mo ka' olante'mo nu besak igogohongnyo.

²⁷Panyo kadaka' beleyum madi' nompoposia i Yeremia mian nu Anatot anu ninimbalu-balu'mo susumo nabi aiya hi bansanto?

²⁸Mian aijo' tionyo ahi' o'onsongimo na nganga'nyo, kalana ia nompoto'imo hi to mia-mian aiya hi kita i Babel koonyo aha daagi' pin na jojoong kiijo' mae. Kalana aijo' ia notatae, aha tionyo ahi' mombaumo laigan ka' mongkaengmo ale' ka' mohakumo isinyo nu ale'.”

²⁹Sulat aijo' binasa i Imam Zefanya pinohongonyo mae hi belengku.

³⁰Kalana aijo' pinalentahmo nu Tumpu na aku,

³¹mompolele mongkona i Semaya hi iwi-iwi' na mian nu Israel anu binoamo i Babel'. Sumo uuka na lele aijo', “I Semaya binasisikmo hi beleyum susumo au' aitu ia samian na nabi; padahan Aku, Tumpu na madi' nompalentah ia. Kalana ia nonsaduakonmo belemiu da pinalesaya i potate anu madi' totu'u,

³²ka' mule' kalana ia nompokaumo belemiu da madi' montuluti mae Aku, sahingga Ku hukumo na ia tiba lee'nyo. Madi' ko samian na anu aijo' hi aha na jojoong aiya hi kami da montoa hahan anu ma'ima' anu saidi' mae Ku bau hi aha ingko-ingkot na mian anu palesayamo hi beleng-Ku. Aku, Tumpu notataemo.”