Read Saluan YEREMIA 3 Bible Online

YEREMIA 3 - Saluan bible

YEREMIA 3

¹Tumpu notatae, “De samian na bengkele' gina'atakonmo nu langkai'nyo, lantas boune aijo' timbalimo bengkele' nu mian sangga'at, saba' langkai'nyo anu momona aijo' madi'mo timbali po ule' mongala bau bengkele'nyo kalana aijo' timbali mongidei lipu' aiya. Beleyum Israel nanjoo'mo hondo na sindua'an nu beleyum, kadaka' uuka aiya beleyum kahanda' mule' minsusule' mae hi beleng-Ku!

²Soba tanggalakon mokiita' ibawo nu to puge-puge'nyo! Tampat iya na anu ma'isa toho' kinalambanan nu beleyum nasala'? Susumo aha mian nu Arab ipadang tampat anu mateges, sumo aijo'mo na beleyum sumuhang isohipi' nu jalan montanda'i mian anu kahanda' bakusinta. Beleyum nohenyuimo lipu' aiya nu palabuatan masala' tiba palabuatan nu beleyum ma'i-ma'idek.

³Aijo' na sababnyo uee anu lengkat mae i langit tinatahanmo ka' mule' ujan ilonu nu pimbuhakan nu kau' madi'mo daagi' ti nudun mae. Beleyum momoho'mo susumo mian anu saja' masala' ka' madi'mo nonsumbu' ambang.

⁴De beleyum nu tokaimo nu kasusa'an beleyum motataemo mae hi belengku, kooyum Aku tuuma nu beleyum, kooyum Aku mongkalibosi beleyum daagi' pe'e beleyum ise-ise'.

⁵Beleyum mule' notatae, kooyum Aku madi' mule' saja'mo montambuha'i beleyum. Sumo aijo' na anu tinaloakonmo nu beleyum, o Israel, panyo hau-haunyo aijo' saja' ahi' nu bau na palabuatan iwi-iwi' anu timbali nu poko ala nu bau.”

⁶ Tempo'nyo i Tomundo' Yosia nompalentah, Tumpu notataemo mae hi belengku sumo uuka; “Pa' tinoamo nu beleyum apaa na anu binaumo nu aha Israel, boune anu madi' tulu-tulutan aijo'? Ia nompala'imo Aku ka' nombaumo palabuatan masala' aita' mae itoto sa'angu' na puge'nyo anu matunjo ka' mule' ipatuu nu kau toto sangkau anu tambok na honnyo.

⁷Aku monsangka de ia moko baumo iwi-iwi' aijo' tantu ia po ule'mo mae minsusule' hi beleng-Ku. Panyo ia madi'mo ahi' ninsusule' mae ola mule' ahi' nompaka lambamo nasala'. Mokonyo aijo' gina'atakon-Kumo ka' nolaa'mo ia. Yehuda utus i Israel anu madi'mo tinulu-tulutan aijo' nontoamo iwi-iwi' aijo'. Panyo ia madi' ahi' nabuhuk. Ia ola mule' ahi' suele nasala'mo,

⁹ka' madi' hondo-hondo mongoa'i ambang. Ia nasala' kalana nonsombahmo batu tiba kau'sahingga lipu' aiya nahumimi'mo.

¹⁰Salatan nombaumo iwi-iwi' aijo' Yehuda anu madi'mo tinulu-tulutan aijo' ninsusule'mo mae hi beleng-Ku, panyo ola ahi' nimpula-pula kalana kinyonyoanyo madi' ahi' sahondo-hondonyo. Aku, Tumpu notataemo.”

¹¹Lapas aijo' pinoto'imo mae nu Tumpu hi belengku, koo-Nyo maunyo ahi' Israel nohikumo Ia, panyo taalu' Israel ahi' na lebe ma'ima' nu lingkudui na Yehuda anu madi tulu-tulutan aijo'.

¹²Tumpu nompalentahmo mae aku da mamba mompoto'i han aiya hi aha Israel: “O Israel anu madi' tulu-tulutan, pinsusule'mo mae hi beleng-Ku! Aku talalo hondo mongkalibosi ka' madi' saja'mo montambuha'i beleyum.

¹³Akuimo taalu' beleyum sinala'mo ka' notomuhukmo hi Tumpu, Tumpu Allah nu belemiu. Akuimo taalu' ipatuu nu kau' toto sangkau anu honnyo tambok beleyum talalomo hondo nongka'ima'i to pilo-pilogot nu bansa sangga'at ka' madi'mo nontuluti sinin na palentahng-Ku. Aku, Tumpu notataemo.”

¹⁴Tumpu notatae, “O mian anu madi' tulu-tulutan pinsusule'mo mae hi beleng-Ku! Belemiu Akumo na tumpunyo. Aku mongalamo belemiu toto samian isa'angu' na kota' ka' mule' toto ua'aha isa'angu' na tulunan nu bansa ka' po ule'mo momboa belemiu i Puge'nyo nu Sion.

¹⁵Aku mombee'imo belemiu to pola-polaya' anu tulu-tulutan hi beleng-Ku. Ahamo na mompalentah belemiu ka' ia pande ka' mangalati' hondo.

¹⁶Lantas de belemiu mompaka panjoo'mo ilipu' aiya, mian madi'mo daagi' mombisalakon Peti' Palajanjian-Ku. Aha madi'mo daagi' mompopikilakon kabai daagi' monginau', pakalaus aha madi'mo daagi' mompalalui ia kabai mombaumo Peti' Palajanjian sangga'at.

¹⁷Tempo'nyo aijo' kota' Yerusalem osanggohimo ‘Kajojoongan nu Tumpu'’, ka' iwi-iwi' na bansa sihukmo ikota' aijo' monsombah Aku. Aha madi'mo daagi' montuluti pongka'oho' nu kinyonyoa nu aha anu panggaga ka' ma'idek aijo'.

¹⁸Israel mosa'angu'mo tiba Yehuda ka' hingga-hinggatmo mae toka lengkat ilipu' pinomboan isasu utara. Aha minsusule'mo mae ilipu' anu binee'-Kumo salaku tano' pusaka' hi aha lee' nu belemiu.”

¹⁹Tumpu notatae, “O Israel, Aku kahanda'mo montalima beleyum salaku anak-Ku, ka' mombee'imo beleyum lipu' anu oka'ima'i nu kinyonyoa, lipu' anu ma'ima' hondo idunia aiya songko-songko. Ku kahanda'i da beleyum monsanggo Aku tuuma nu beleyum, ka' madi'mo daagi' mompala'i Aku.

²⁰Panyo susumo bengkele' anu madi' tulu-tulutan beleyum suele ahi' madi'mo tulu-tulutan hi beleng-Ku. Aku, Tumpu notataemo.”

²¹Aita' mae ibawo nu to bungku-bungkutnyo ihongomo na potatae anu ihengge'mo; aijo' potatae nu aha mian Israel anu ihumangmo ka' lewa' mongkakase, kalana aha binaladosa'mo ka' nongkolilimimo Tumpu Allah nu aha.

²²O belemiu iwi-iwi' anu nompala'imo Tumpu, pinsusule'mo mae! Ia mompo alinmo belemiu ka' mompotimbalimo belemiu tulu-tulutan. Belemiu notatae, “Ii', uuka aiya kami tokamo mae hi Tumpu, kalana Ia Tumpu Allah mami.

²³Ola palasuma na kami balame-lame monsombah pilogot aita' mae ibawo nu to bungku-bungkutnyo! Anu montulungi Israel olanyomo ahi' anu toka mae lengkat hi Tumpu Allah mami.

²⁴Sola' monsombah Baal, pilogot anu moko ambang aijo' ola ahi' da nonsaduakonmo kami da madi'mo kino to ana-anak mami ka' mule' potuu'on sapi' tiba domba, iwi-iwi' aijo' anu ingusahakonmo nu mompolee' mami salatanmo pe'e naipuan mae.

²⁵Jadi bakasmo da otanggungmo mami na ambang ka' bakasmo na kami da madi'mo kino angga'nyo. Kalana, kami tiba mompolee' mami binaladosa'mo hi Tumpu Allah mami, ka' madi'mo toho' tinulu-tulutan hi iwi-iwi' na palentah-Nyo.”