Read Saluan YEREMIA 30 Bible Online

YEREMIA 30 - Saluan bible

YEREMIA 30

¹Tumpu, Tumpu Allah Israel,

²notataemo mae hi belengku, “Tulis i uno nu sa'angu' na kitab iwi-iwi' na anu pinoto'ing-Kumo hi beleyum.

³Kalana tokaje mae na tempo'nyo po ule'mo Ku poko ima'i na kantumuu'an nu mian anu palesayamo hi beleng-Ku, Israel tiba Yehuda. Po ule'mo Ku boa na aha ilipu' anu binee'-Kumo hi mompolee' nu aha. Lipu' aijo' po ule' nu ala nu aha.”

⁴Tumpu notataemo hi aha mian nu Israel tiba Yehuda,

⁵“Ihongong-Kumo na kihis nu mian anu ilakatnyomo kihis nu mian anu nabuhukmo anu madi'mo kinokadamean.

⁶Soba ahi' potutugakon ka' selidiki! Te toho' mule' mo'ane mohampeakon bungamea'? Yo de sumo aijo', kadaka' Ku toa na to momo'ane toto samian ohupnyo talalomo ahi' ine'es ka' nu toongi nu limanyo na kompongnyo sumomo boune anu kahanda'mo mompohampe anak?

⁷Sinaa anu okabuhuk hondo tokamo mae, sinaa anu madi' hondo-hondo ko gampanyo. Kona hi aha mian anu palesayamo hi beleng-Ku aijo'mo na sinaa anu okabuhuk hondo: panyo aha na Ku posalamatmo ahi.”

⁸Tumpu Anu Mahakuasa po ule' mule' notatae mae hi mian anu palesayamo hi Ia, “De maluanyo tokamo mae na sinaa aijo' tokon anu pinokona itundun nu beleyum Ku pato'akonmo ka' anu bau pinompungu Ku bukaimo. Belemiu madi'mo daagi' timbali botuan hi aha mian anu isalipu'an.

⁹Belemiu palesayamo hi beleng-Ku, Tumpu Allah nu belemiu ka' hi samian te lee' mae i Daud anu Ku hangkatmo bau tomundo'.

¹⁰ Mian anu palesayamo hi beleng-Ku aha Israel, boli mabuhuk! Posaihon-Ku i Yakub boli langkakatan! Belemiu tiba lee' nu belemiu Ku posalamatmo lengkat mae ilipu' anu majo'on, tampat pinomboan belemiu. Belemiu minsusule'mo ka' jojoongmo ilipu' nu belemiu ka' madi'mo ko anu mompoposia. Belemiu tumuu'mo sanang; madi'mo daagi' ko anu okabuhuk nu belemiu.

¹¹Aku tokamo mae ka' belemiu Ku posalamatmo. Bansa-bansa, tampat pinongga'a-ga'atakonan-Ku belemiu iwi-iwi' Ku silakaimo, panyo belemiu na madi' ahi' Ku bau sumo aijo'. Memang belemiu madi' ahi' bebas ihukuman panyo hukuman anu Ku bee' hi belemiu na adin ahi' sosok tiba anu sahondo-hondonyo. Aku, Tumpu notataemo.”

¹²Tumpu notataemo hi aha mian anu palesayamo hi Ia; “Panyakit nu beleyum tinadokmo hondo, bela nu beleyum atina' madi'mo daagi'ko pakuli'nyo.

¹³Madi'mo daagi' ko anu sanang na kinyonyoanyo molioakon da beleyum ma'alin, madi'mo daagi' kopakuli'nyo na bisun nu beleyum haha atina' madi'mo daagi' otaha'imani na beleyum ma'alin.

¹⁴Iwi-iwi' na anu mongka'ima'i beleyum nongkolilimimo beleyum; aha madi'mo daagi' mompotutugakon beleyum. Susumo sampobali' tinumbuhan-Kumo ka' nohukumo belemiu pinosansala hondo. Kalana nanjoo'mo na dosa' nu belemiu ka' dinakamo hondo na kasala'an nu belemiu.

¹⁵Bolimo daagi' motusa' atina' i bela nu beleyum haha atina' kalana beleyum madi'mo daagi' otaha'imani timbali ma'alin. Belemiu ihukum-Kumo sumo atina' kalan dosa' nu belemiu nanjoo'mo ka' dinakamo na kasala'an nu belemiu.

¹⁶Panyo uuka aiya iwi-iwi' na anu nolonyomo beleyum suele olonyomo ka' iwi-iwi' na sampobali' nu beleyum oboamo itampat pompojoongan. Aku mombee'imo kasansala'an anu nombee'imo kasansala'an beleyum. Aku montololangimo anu nontololangimo beleyum.

¹⁷Maumo ahi' sampobali' nu beleyum notataemo, ‘Sion binaamo, ka' madi'mo ko anu nompalahatikan’ panyo belemiu na po ule'mo ahi' Ku pohoson da madi'mo masakit. Ka' bela nu belemiu haha atina' Ku pakuli'imo.”

¹⁸Tumpu po ule' mule' notatae; “Belemiu mian anu palesayamo hi beleng-Ku Ku kalibosimo ka' po ule'mo Ku pokopiani na kantumuu'an nu belemiu i tano' kinahampean nu belemiu. Yerusalem po ule'mo ahi' obau ka' laigannyo nu tomundo' opoko ima'imo.

¹⁹Mian anu jojoong ikiijo' mompuji'mo mae Aku nu nyanyian ka' montaligalaimo kalana lame'mo Ku pojadimo na aha da oholomati ka' madi'mo daagi sola' o'alu ka' konjoo'nyo nu aha mompaka pintuangmo.

²⁰Bansa nu belemiu Ku pojadimo talasanggo susumo naipuan mae, ka' po ule'mo tuminjo' salaku mian anu palesayamo hi beleng-Ku. Iwi-iwi' na anu nombee'imo kasansala'an Ku hukumo suele.

²¹Tomundo' anu mompalentah belemiu ohangkat anu atina posi bansa nu belemiu Bebas na ia mompaha sumbu' mae tiba Aku de maluanyo ia Ku lagamo, mangadap mae hi beleng-Ku Kalana ihe na baani moko ala mangadap mae hi beleng-Ku de ola posi pongka'oho'nyo? Belemiu timbalimo mian anu palesayamo hi beleng-Ku ka' Aku timbalimo Tumpu Allah nu belemiu. Aku, Tumpu na anu nontaeakonmo aijo'.”

²³Tambuha' nu Tumpu sumomo ahi' tombusisi', sumomo ahi' mombun anu makansang hondo anu nolitotosmo to mia-mian anu ma'idek na kinyonyoanyo, ka' madi'mo daagi' tolotutus de ma'isa pe'e iwi-iwi' na anu tinanga'an-Nyomo osidahimo obau. Imihinyo mae mian anu palesayamo hi Ia mangalati'je i han aijo'.