Read Saluan YEREMIA 31 Bible Online

YEREMIA 31 - Saluan bible

YEREMIA 31

¹Tumpu notatae, “Tokaje mae na tempo'nyo Aku timbalimo Tumpu Allah nu aha iwi-iwi' na tulunan nu bansa Israel ka' aha timbalimo mian anu palesayamo hi beleng-Ku.

²Ipadang tampat anu mapeges Ku potoaje na kalibosan-Ku hi aha anu madi' tinokan nu kasilaka'an. Tempo'nyo Israel noliomo kantumuu'an anu sanang

³itampat anu majo'on mae aku nompotoamo butong-Ku hi aha. O mian nu Israel, naipuan pe'e mae Aku memang ahi' mongkalibosi belemiu ka' memang Aku saja' ahi' sabole-bole mompotoa saba' Aku na saja' ahi' mongkalibosi belemiu.

⁴Bansa nu belemiu Ku pojadimo sanang na kantumuu'an susumo naipuan mae. Po ule' mule' belemiu mongala gandang ka' monsalelei lame'mo hondo.

⁵Belemiu po ule'mo mombau ale' nu anggur ibungkutnyo nu Samaria, ka' ihe na anu montugan saidi' mae ia na montipu bua'nyo.

⁶Memang totu'u tokaje mae na tempo'nyo to mia-mian anu monjaga kota' moloboo'akonje mokiita ibungkutnyo nu Efraim, ‘Imbo' kita mindakomo mokiita' i Sion, hi Tumpu Allah-nto'.’ ”

⁷Tumpu notatae, “Onyanyiakon lame-lame' na aha Israel, mian anu palesayamo hi beleng-Ku bansa anu penting hondo nulingkudui na bansa sangga'at. Nyanyiakon na nyanyian bau pompuji' ka' bebakonmo; ‘Tumpu nomposalamatmo mian anu palesayamo hi Ia anu dadaagi' tinontuha'.’

⁸Lengkat mae isasu utara sinule'akon-Kumo na aha Pinosihukumo na aha lengkat mae ipuus nu tano'. Mian anu napisokmo tiba mian anu kinapi'mo mambamo hingga-hinggat tiba aha, ka' suele boune anu sala'je nompohampe anak tiba anu poboa malia'mo monganak. Aha iwi-iwi' po ule'mo mae toka ka' manjoo'mo hondo na mamba mae ilipu' aiya.

⁹Aha lumajang humang Ku hase' ka' mule' Ku laya' na aha. Ku boa na aha montulu tampat-tampat anu manjoo' na ueenyo, montulu jalan daka' itampat nu aha lumajang aha madi' tosumpun. Kona hi aha Israel Aku sumomo ahi' tuuma nu aha; i Efraim aijo'mo na anak-Ku momo'ane anu tumpenyo.”

¹⁰Tumpu notatae, “Potombihing mae o to bansa-bansa! Poto'iakon na potuunon-Ku toka-toka isantoa nu ambai: Mian anu palesayamo hi beleng-Ku anu gina'a-ga'atakon-Kumo po ule'mo Ku posihuk ka' Ku potuu'mo susumo polaya' domba monjagai dombanyo.

¹¹Mian nu Israel pinosalamat-Kumo, ka' pinobebas-Kumo da madi'mo nu kuasai nu bansa anu mahoson.

¹²Mamba i Puge'nyo nu Sion aha tokamo mae lame'na ohup nu aha otoa ka' manyanyi lame' hondo. Kalana iwi-iwi' apaa na anu binee'-Kumo hi aha, aijo'mo, gandum, lanya', anggur, sapi' tiba domba. Aha sumomo ahi' sa'angu' na taman anu sukup na ueenyo, ka' madi' ko anu kulang apa-apaa.

¹³Toka itempo'nyo aijo' to lalangkoyang monsaleleimo ka' lame'mo na kinyonyoa. To tu'a-tu'anyo tiba to oli-olitau bubu'mo mongoa'i sanang na kantumuu'an, kalana Aku mohase'mo aha. Kasusa'an i uno nu kinyonyoa nu aha Ku bali'imo jadimo kalame'an kalibosan nu kinyonyoa Ku bali'imo jadimo sanang na kantumuu'an.

¹⁴To ima-imam Ku posukupakonmo na anu nu kaan nu aha ka' molabi-labimo; ka' iwi-iwi' na anu nu palalui nu mian anu palesayamo hi beleng-Ku Ku bee'mo Aku, Tumpu, na anu nontaeakonmo.”

¹⁵ Tumpu notatae, “Kiijo' i Rama ihongomo na anu ihumang, mososon ka' pompele-pele' bau nu kasusa' nu kinyonyoa. I Rahel nohangimo to ana-anaknyo, ia madi'mo montalima pohase' kalana aha imadi'anmo.

¹⁶Hokotmo bolimo humang ka' sapuimo na lolu' nu beleyum! Madi' ola palasuma na lawe nu belemiu nompalakai to ana-anak nu belemiu. Kona hi belemiu tantu ko hukuman anu obee' to ana-anak nu belemiu minsusule'mo mae lengkat i lipu' nu sampobali'.

¹⁷Ko anu otaha'imani nu belemiu aiya mae i ahop; to ana-anak nu belemiu minsusule'mo mae aiya ikampung kinahampean nu belemiu.

¹⁸Ihongong-Kumo na mian nu Israel notatae kahomo i uno nu kasusa'an na kinyonyoa, ‘O Tumpu, kami sumomo ahi' binatang anu ma'isa pininyaman panyo ingajan mo nu Belento na kami da tulu-tulutan, ka' uuka aiya kami kahanda'mo minsusule' mae hi Belento. Jadi, boamo mae na kami da minsusule'mo o Tumpu, Tumpu Allah mami.

¹⁹Belento ihukumo mami, panyo nompele-pele'mo na kami ipalabuatan aijo' Salatan Belento nohukumo kami, ubak mami tinolodukumo kalana sinusa'mo na kinyonyoa. Kami na ambangmo ka' madi'mo kino angga'nyo kalana binaladosa'mo tempo'nyo daagi' olitau'.’

²⁰O Israel beleyum anak anu Ku kanonongi hondo anak anu oka'ima'i hondo, saja' o inau' i uno nu kinyonyoang-Ku. De Aku montambuha'imo bele saja'mo Ku inau' na beleyum ka' molibosmo. Beleyum na Ku atun ahi' ima-ima' nu kalibosan.

²¹Pokonai tanda na jalan da osumbu' na kajalanan lio na jalan anu kinajalanan nu beleyum naipuan mae. O Israel, pinsusule'mo mae! Pinsusule'mo iposi kota' nu belemiu anu u'utu mae momona.

²²Sampe toka hipian na beleyum saja'mo bata-bata, o bansa anu madi' tulu-tulutan hi beleng-Ku? Aku nompotimbalimo apa-apaa anu sala'je jinadi' idunia aiya, apa-apaa na anu okahelani hondo, ma'isa toho' jinadi boune monjagai mo'ane.”

²³Tumpu Anu Mahakuasa, Tumpu Allah Israel notatae, “De maluanyo mian anu palesayamo hi beleng-Ku, Ku pojadimo ma'ima' na kantumuu'an nu aha susumo naipuan mae, sahingga ilipu' Yehuda tiba ikampungnyo anu toto ise-ise' ohongo mule' na mian motatae, ‘O amalakon da Tumpu mombalakati puge'nyo anu susi' i Yerusalem tampat samata-mata ola Ia na monjojoongi.’

²⁴Mian jojoongmo i Yehuda ka' ikampungnyo anu toto ise-ise'. Ikiijo' mae ko anumo mongale' ka' mompotuu' sapi' tiba domba.

²⁵Aha anu nalawemo Ku pohosonmo ka' anu ilundengmo kalana no'ohopmo Ku pobosumo.

²⁶Toka itempo'nyo aijo' mian motataemo, ‘Salatan binobogonmo na ihoyot ingoa'anku nahosonmo.’

²⁷Aku, Tumpu notataemo, tukoong-Ku tokaje mae na tempo'nyo lipu' nu Israel tiba Yehuda Ku pobuke'imo nu manusia tiba binatang.

²⁸Susumo naipuan mae Aku nonjagaimo aha da lapas mae Ku gautakonmo, Ku hobo'akonmo ka' Ku hansunimo na aha, sumo aijo'mo na Aku mule' monjagai aha, Ku pokododo ka' po ule' Ku bangonakon na aha.

²⁹ Toka itempo'nyo aijo' mian madi'mo daagi' motatae, ‘Tu'anyo mongkaan bua' nu kau' anu malosing, bese' nu anaknyo na mongoa'i mangilu'.’

³⁰Panyo ihe na mongkaan bua' nu kau' malo-malosing aijo' ia ahi' na mangilu' na bese'nyo. Batu-batu mian silakamo kalana posi dosa'nyo ahi'.”

³¹ Tumpu notatae, “Tokaje mae na tempo'nyo Ku bauje na palajanjian anu obauje mule' tiba mian nu Israel ka' Yehuda.

³²Panyo palajanjian aijo' misa' susumo palajanjian anu binaung-Kumo tiba mompolee' nu aha tempo'nyo aha ilaya'-Kumo namba nosabat lengkat mae i Mesir. Maunyomo ahi' Aku sumomo salaku langkai' nu aha, panyo aha madi' ahi' nontoongi palajanjian-Ku tiba aha.

³³ Sumo uuka na palajanjian anu Ku bauje tiba aha mian nu Israel; Atulan-atulan-Ku, Ku po una'mo i uno nu kinyonyoa nu aha, ka' mule' Ku tulismo i uno nu kinyonyoa nu aha. Aku timbalimo Tumpu Allah nu aha ka' mule' aha timbalimo mian anu palesayamo hi beleng-Ku.

³⁴ Madi'mo daagi' palalu maunyomo ola samian na bubu' aha mongajan sangalunyo da monsumbu' Tumpu. Kalana aha iwi-iwi' anu tu'amo kabai anu daagi' anak saidi' mae monsumbu'mo Aku. Kasala'an-kasala'an nu aha madi'mo lewa' Ku inau', to dosa-dosa' nu aha Ku ampunimo. Aku, Tumpu notataemo.”

³⁵Batu nu sinaa pinosadiamo nu Tumpu da monjingkai sinaa; bitu'on tiba to manda-mandala' da monjingkai pihi. Ambai kinula-Nyomo sahingga bokon jinadimo bokon daka', Tumpu Anu Mahakuasa aijo'mo na sanggo-Nyo.

³⁶Tumpu binalajanji'mo “De daagi' atulan nu dunia aiya ma'isa mongabali' saba' Israel suele daagi' ahi' sabole-bole tataap salaku bansa.

³⁷De maluanyo ka kaminsanannyo aita' langit timbali o ukun mokiita', ka' lananyo nu tano' opoko alamo oselidiki saba' tempo'nyoje ahi' aijo' na Israel madi'mo Ku ala. Kalana iwi-iwi' na palabuatan nu aha ma'i-ma'idek aijo'. Aku, Tumpu notataemo.”

³⁸Tumpu notatae, “Tokaje mae na tempo'nyo songko-songko na Israel po ule'mo obau salaku kota'-Ku lengkat pe'e mae hi Menara i Hananeel toka-toka i Sabatan Daka' anu i Pasu'nyo.

³⁹Lengkat ikiijo' batas nu potempasan nambamo isasu Bungkutnyo nu Gareb, lantas nonsiopo'akonmo namba isasu Goa.

⁴⁰Songko-songko na bangka'nyo aijo' anu pinakemo salaku lewa bau polamunan mian ka' bau tampat pongalinan duhehe ka' mule' iwi-iwi' na ale' isonibi nu Kaunyo Kidron toka-toka i Sabatan Daka' Ajahan namba isasu kabete'an aijo' binee'mo samata-mata bau kapentingan-Ku. Kota' Yerusalem madi'mo daagi' ohobo'akon kabai ohansuni.”