Read Saluan YEREMIA 32 Bible Online

YEREMIA 32 - Saluan bible

YEREMIA 32

¹ Kakona itaun kinosampulu'nyomo na Zedekia tomundo' nu Yehuda nompalentah kakona mule' itaunmo kinosampulu'nyomo ka' ualu' na i Nebukadnezar tomundo' nu Babel nompalentah, Tumpu notataemo mae hi belengku,

²Tempo'nyo aitu suludadu nu tomundo' Babel hau-haunyomo nontumbuhi Yerusalem. Aku tinahanmo ipopasan nu laigan

³nu tomundo' Zedekia kalana sinangkamo koonyo aku nombebakonmo Tumpu nompoto'i sumo uuka, “Tomundo' nu Babel Ku popilayamo da mompatundu'mo ka' monjojoongimo kota' aiya,

⁴ka' i Tomundo' Zedekia madi'mo daagi' luput. Ia obee'mo hi tomundo' Babel, ka' mangadapmo hi tomundo aijo' ka' mosi basale'mo tiba ia.

⁵Lapas mae i Zedekia oboamo i Babel ka' jojoongmo kiijo' mae sampe ia Ku hukumo. Maumo ahi' ia mahampatemo mongewa Babel ia madi' ahi' untung. Aku, Tumpu notataemo.”

⁶Tumpu notataemo mae hi belengku,

⁷koo-Nyo i Hanameel, anak momo'ane nu babo'-Ku i Salum tokaje mae mompoto'i da ku oli na tano'nyo anu kiijo' i Anatot i daerah nu aha Benyamin. Kalana, akumo na julunyo mae anu daagi' talalo ohani, anu kohak mongoli tano' aijo'.

⁸Lantas sosok hondo susumo anu pinoto'imo nu Tumpu tinokamo mae na i Hanameel hi belengku ipopasan nu laigan nu tomundo' ka' nompoto'i da mongoli tano'nyo. Kalana aijo' aku iyakinmo taalu' Tumpu totu-totu'u ahi' notataemo mae hi belengku.

⁹Sahingga ingolingkumo na tano' i Hanameel sampulu' ka' popitu' na doi salaka na angga'nyo. Aku nolagamo to saki-sakisi lantas i ahop nu aha tinandatanganankumo na sulat tanda ingolimo lantas pinokampitankumo segel, ka' tinimbangkumo na doinyo.

¹⁰

¹¹Lapas aijo' ingalangkumo na sulat tanda ingolimo anu pinokampitanmo segel ka' ingisianmo syarat-syarat tiba atulan-atulannyo. Ka' ingalangku mule' na saliannyo nu sulat aijo' anu madi'mo kino segelnyo.

¹²Ka' ohu-ohua' na sulat aijo' binee'kumo hi Barukh anak i Neria makumpu i Mahseya. Aku nombee' aijo' i ahop i Hanameel tiba sakisi-sakisi anu nontandatanganimo sulat haha aijo' ka' i ahop nu to mia-mian anu sika-sika suhang ipopasan aijo'.

¹³I ahop nu aha iwi-iwi' pinoto'ingkumo hi Barukh,

¹⁴“Tumpu Anu Mahakuasa, Tumpu Allah Israel nompalentahkonmo da beleyum mongalamo ohu-ohua' na sulat haha atina' mau anu aslinya maumo salinannyo ka' ingisinyomo i uno kuhon tano' tembikar da montahan pin.

¹⁵Tumpu Anu Mahakuasa, Tumpu Allah nu Israel notatae, tukoo-Nyo laigan, tano' tiba ale' nu anggur saidi' mae opaha pobalukmo mule' ilipu' aiya.”

¹⁶Salatan sulat haha aijo' salaku tanda ingolimo binee'-kumo hi Barukh, aku binalado'amo,

¹⁷“Tumpu Anu Matangkas na Kuasanyo, Belentomo na anu nompotimbalimo langit tiba tano' nu kuasa tiba kamampuan nu Belento anu daka' hondo. Madi' ko anu madi' nu poko ala Nu bau.

¹⁸Belento nompotoamo kalibosan nu Belento anu sampe toka sidu-sidutu hi aha momada-madala na mian, panyo Belento mule' ahi' mohukum mian kalana dosa' nu tu'anyo nu aha. Belento Tumpu Allah anu talasanggo ka' baani; sanggo nu Belento Tumpu Anu Mahakuasa.

¹⁹Sinin na tanga'an nu Belento opalias hondo ka' apa-apaa na anu nu bau nu Belento akabangangi hondo; Nu toa iwi-iwi'na anu nu bau nu manusia ka' mombalosakon aha sitimbang tiba palabuatan nu aha.

²⁰Naipuan mae Belento nombaumo hahan anu okabangangi tiba hahan anu daka' hondo i Mesir, ka' sampe toka tempo uuka aiya Belento daagi' ahi' saja' mombau mau hi aha mian nu Israel mau hi aha iwi-iwi' na bansa sangga'at. Kalana aijo' Belento tempo' uuka aiya tinalasanggomo iyaya mae.

²¹Tiba kuasa ka' kahosonan nu Belento anu daka' aijo' Belento nomboamo mian nu Israel nosabat lengkat mae i Mesir. Belento nombaumo hahan anu okabangi tiba hahan anu okahelani tiba hahan anu jinadimo nonompotolokengkengmo aha sampobali'.

²²Lipu' anu ma'ima' ka' molumba' aiya Nu bee'mo hi aha susumo anu jinanji'mo nu Beleyum hi mompolee' nu aha.

²³Panyo salatan aha tinokamo ilipu' aiya ka' po ule'mo no ngala lipu' aiya, aha madi'mo nontuluti palentah iwi-iwi' nu Belento, ka' madi'mo tinumuu' mombatuki ajalan-ajalan nu Belento. Iwi-iwi' na anu Nu palentahkon hi aha mau sa'angu' madi' ko anu binau nu aha. Kalana aijo' Belento nompotokamo mae iwi-iwi' na balaa' aiya hi aha.

²⁴To mia-mian nu Babel nombau pagan mesen da bau pontumbuhian iduhu-duhuk na kota' da timbali opoko ala na kota' aijo' ka' uuka aiya aha nontumbuhimo. Pahampatean, kasusa'an i anu okaan, tiba panyakit anu molele na monsaduakonmo kota aiya matundu'mo hi lima nu aha Babel.

²⁵Tinoa nu belento taalu' iwi-iwi' na anu binaumo nu Belento memang ahi' kino bukutinyo. Panyo maumo ahi' sumo aijo', o Tumpu Anu Matangkas hondo na Kuasanyo, Belentomo ahi' na nompokau mae aku no ngoli tano' aiya i ahop nu to sakisi-sakisi maumo ahi' gagana uuka kota' aiya nu alamo nu aha mian nu Babel.”

²⁶Lapas aijo' Tumpu nompoto'imo mae hi belengku,

²⁷“Akumo na Tumpu, Tumpu Allah nu mian iwi-iwi'. Madi' ko anu mahan na montutugi de hi Belengku.

²⁸ Kota' aiya Ku pojohokmo da nu kuasai i Nebukadnezar tomundo' nu aha Babel tiba suludadunyo. Aha saidi' mae mongalamo kota aiya,

²⁹ka nu papuimo nu aha sampe motanggotmo iwi-iwi' tiba laigan anu pinombauanmo nu mian palabuatan anu ma'idek sahingga nonsabapimo da Aku notambuha'mo, kalana aita iloteng nu laigan haha aijo' pinompapuanmo nu aha kamangian anu sinombahkon hi Baal ka' mule' nondudu'akonmo anggur sinombahkon hi to pilo-pilogot.

³⁰Salatanmo pe'e sisikon nu kantumuu'an nu aha, mian nu Israel tiba mian nu Yehuda nonsaduakonmo Aku da madi'mo sinanang hi aha. Aha nompolubatmo mae tambuha'-Ku nu palabuatan-palabuatan nu aha anu ma'idek.

³¹Salatanmo pe'e kota' aiya binau miannyo nonsaduakonmo Aku da pinusamo hondo. Aku nontantukanmo da monsilakaimo aha,

³²kalana iwi-iwi' na palabuatan ma'idek anu binaumo nu aha mian Yehuda tiba Yerusalem tibamo to tomu-tomundo'nyo, mian anu kopangkatnyo toto tangka-tangkas ipamalentahan, to ima-imam, ka' to nabi-nabi nu aha.

³³Aha nohikumo mae Aku ka' maumo ahi' Aku salio-liomo aha, aha madi' ahi' mohongo-hongo Aku ka' mule' madi' ahi' ko kasinsumbu'annyo.

³⁴ Pakalaus laigan anu binau da bau tampat ponsomban mae Aku ihumimi'anmo nu aha aijo'mo aha nompo una'mo bapilogotan nu aha anu mompobubun ilu itampat aijo'.

³⁵ Aha nombaumo mezbah-mezbah bau ponsomban Baal i Bangka'nyo nu Hinom, ka' nonsombahkonmo to ana-anak nu aha hi Pilogot Molokh. Padahan Aku madi' toho' nompalentah aha da molakukan han susumo aijo' ka' mule' madi' toho' tinolosinsumbu' i uno nu pikilan-Ku au' aitu aha timbali mombau palabuatan anu ma'idek hondo aijo' ka' nonsaduakonmo aha mian nu Yehuda da binaladosa'mo.”

³⁶Tumpu, Tumpu Allah Israel notataemo mae hi belengku, “O Yeremia, bansa Israel notataemo mae koonyo nu aha pahampatean, kasusa'an i anu okaan tiba panyakit anu molele aijo'mo na monsabapi kota' aiya nu alamo nu aha mian nu Babel. Uuka aiya potombihing mae suele apaa na anu kahanda' Ku poto'i.

³⁷Po ule'mo Ku posihuk na bansa aiya lengkat mae ibansa iwi-iwi' tampat pipinongga'a-ga'atakonan-Ku aha kalana Aku pinusamo, ka' notambuha'mo hi aha. Aha Ku boamo mule' mae itampat aiya ka' Ku pobee'mo jojoong i aiya sahingga madi'mo ko anu mompoposia.

³⁸Aha timbalimo mian anu palesayamo hi Belengku, ka' Aku timbalimo Tumpu Allah nu aha.

³⁹Ku bee'imo na aha tujuan nu kantumuu'an samata-mata ola sa'angu': aijo'mo, moholomati mae Aku sampe toka sidu-sidutu'; han aijo' na mombee'i ka'ima'an nu kantumuu'an nu aha, ka' suele kona hi lee' nu aha.

⁴⁰Aku mombaumo palajanjian anu sampe toka sidu-sidutu' hi aha. Aku madi' toho' belenti na mombau palabuatan ma'ima' hi aha. Ku pojadimo na aha da mabuhuk ka' moholomati mae Aku nu kinyonyoa anu totu-totu'u ahi' da aha madi'mo matikojo'on hi Belengku.

⁴¹Aku sanangmo na mombau palabuatan anu ma'ima' hi aha, ka' mompotataapmo aha ilipu' aiya sampe toka sidu-sidutu'.

⁴²Susumo Aku nompotokamo mae balaa' hi aha bansa aiya, sumo aijo'mo na Aku mombee'mo iwi-iwi' na anu ma'ima jijinanji'-Kumo hi aha.

⁴³Mian notataemo, koonyo nu aha lipu' aiya jinadimo susumo padang tampat anu nategesmo anu madi'mo jinojoongan nu manusia tiba binatang, ka' mule' koonyo nu aha lipu' aiya ingalamo nu aha mian nu Babel. Panyo uuka aiya Ku poto'i saba' saidi' mae te ale' po ule'mo opaha pobaluk mule' ilipu' aiya;

⁴⁴sulat anu salaku tanda ingolimo otandatanganimo ka' osegenmo ka' opohosonmo nu to sakisi-sakisi. Aijo' jadimo saidi' mae i daerah nu aha Benyamin, ikampung-kampung toto ise-ise' anu ohani tiba Yerusalem, i kota-kota' Yehuda, i kota-kota' daerah anu aita' mae ibungkutnyo, i daerah tengke nu bungkutnyo, tiba i Yehuda anu isasu salatan. Bansa aiya po ule'mo Ku pojadi susumo momonanyo mae na ka ada'annyo ma'ima' ahi' ilipu' aiya. Aku, Tumpu notataemo.”