Read Saluan YEREMIA 33 Bible Online

YEREMIA 33 - Saluan bible

YEREMIA 33

¹Tempo'nyo Aku hau-haunyo daagi' tinahan ipopasan, aku nohumpakmo potuunon sangga'at lengkat mae hi Tumpu,

²anu nompotimbalimo tano' ka' nombontukmo ka' nompokokomo itampatnyo. Ia notataemo,

³“Poloboo'mo mae hi Belengku da Ku taamije; Ku poto'ije hi beleyum hahan anu handa hondo ka' anu okahelani hondo ka' ma'isa nu sumbu' nu beleyum.

⁴Laigan nu tomundo' Yehuda tiba laigan anu i kota' Yerusalem tinatakanmo da bau pompohoson palatahanan mongahopi sampobali' de montumbuhimo mae. Panyo Aku, Tumpu, Tumpu Allah nu aha Israel mompoto'i saba',

⁵palasuma na mongewa aha mian nu Babel, kalana han aijo' ola ahi' monsaduakon da kota' aiya mobuke'mo nu bangke' nu to mia-mian anu Ku silakaimo nu tambuha'-Ku tiba pusang-Ku hi aha. Aku madi'mo halala' na montoa kota' aiya kalana aha miannyo nombaumo palabuatan anu ma'idek.

⁶Panyo saidi' mae po ule'mo Ku bau susumo u'utu mae momonanyo na ka ada'an nu kota' aiya tiba miannyo anu ikiijo'; aha po ule'mo mahoson mule'. Ku bee'imo na aha kantumuu'an anu sanang ka' mule' madi'mo ko anu lewa' mompoposia aha.

⁷Yehuda tiba Israel po ule'mo mohumpak kamajuan susumo naipuan mae ka' aha po ule'mo tuminjo salaku mian anu palesayamo hi Belengku.

⁸Ku pobelesi'mo na dosa-dosa' nu aha anu binaumo nu aha hi Belengku; sinin na dosa tiba ka'idekan nu aha Ku ampunimo.

⁹Yerusalem mompolame'mo mae kinyonyoang-Ku ka' mompopodaka'mo mae Aku. Iwi-iwi' na bansa i dunia mabuhukmo ka' nu lakatmo ka' mule' moholomatimo mae Aku, de aha mohongomo palabuatan ma'ima' anu binaung-Kumo iwi-iwi' hi aha mian anu jojoong i Yerusalem ka' mongkona kamajuan anu binee'-Kumo i kota' aijo'.”

¹⁰Tumpu notatae, “Mian nontaloakonmo koonyo nu aha tampat aiya sumomo padang tampat anu nategesmo madi'mo daagi' ko miannyo kabai binatang anu monjojoongi aijo'. Potatae nu aha memang totu'u, kalana kota-kota' nu Yehuda tiba jalan-jalan nu Yerusalem iwi-iwi' madi'mo ko miannyo anu otoa; madi'mo daagi' ko mian kabai binatang anu jojoong ikiijo'.

¹¹ Panyo itampat haha aijo' saidi' mae po ule'mo ohongo na lewo' nu mian anu lame' ka' anu binilahimo ka' mule' lewo' nu mian anu nombaumo babauon mo'osoa. Ka' ohongo mule' na nyanyian nu to mia-mian anu momboa koloban bau pontalima kase i Laigan-Ku. Aha motataemo, ‘Pontalima kasemo hi Tumpu Anu Balakuasa hondo, kalana Ia manonong ka' mule' kalibosan-Nyo sampe toka sidu-sidutu'.’ Lipu' aiya Ku pomajumo na kantumuu'an nu aha susumo momonanyo naipuan mae. Aku, Tumpu notataemo.”

¹²Tumpu Anu Mahakuasa notataemo, “Lipu' tiba kota-kota'nyo anu sumomo padang tampat anu mateges aiya madi'mo nu jojoongi nu manusia kabai binatang. Panyo maumo ahi' sumo aijo, saidi' mae imihinyo po ule'mo nu tumuu'i nu hemput padang ka' polaya'anmo nu mian dombanyo.

¹³Aita' mae ikota-kota' anu idaerah anu ibungkutnyo, ka' anu itengke nu bungkutnyo, ka' mule' i daerah Yehuda sasu salatan, ka' mule' daerah nu aha Benyamin tiba kampung anu toto ise-ise' anu madi' majo'on i Yerusalem, ka' mule' ikota-kota' Yehuda, to pola-polaya' domba po ule' mule' molekeng domba nu aha. Aku, Tumpu notataemo.”

¹⁴ Tumpu notatae, “Tokaje mae na tempo'nyo Ku ganapimo na palajanjian-Ku anu binaung-Kumo hi aha Israel ka' hi aha Yehuda.

¹⁵Toka itempo'nyo aijo' samian na anu lengkat mae hi lee' i Daud Ku pile'imo da timbali tomundo'. Tomundo' aijo' mompojalanmo anu adin tiba anu totu'u isongko-songko na lipu'.

¹⁶Aha mian nu Yehuda tiba anu jojoong i Yerusalem oposalamatmo ka' tumuu' madi'mo ko anu mompoposia. Kota' Yerusalem osanggohimo ‘Tumpu na Momposalamat Kita’.

¹⁷ Aku, Tumpu balajanji'mo da lee' mae i Daud saja'mo daagi' ko samian na timbali tomundo' nu Israel;

¹⁸ saja'mo daagi' ko to ima-imam anu lengkat mae hi tulunan nu bansa Lewi anu mombau apaa na Ku palentahkon hi aha ka' monsombahkon koloban binatang, gandum tiba palasombahan anu opotunu.”

¹⁹Tumpu notataemo mae hi belengku,

²⁰“Aku nombaumo palajanjian hi sinaa tiba pihi, daa sinaa tiba pihi saja' toka mae itempo'nyo' palajanjian aijo' madi' timbali ohapus.

²¹Sumo aijo' mule' Aku nombaumo palajanjian tiba posaihon-Ku i Daud, da lee'nyo mae saja'mo daagi' ko samian na anu timbali tomundo'; ka' Aku nombaumo palajanjian tiba to ima-imam lee' mae nu aha Lewi da aha saja' ahi' mombau apaa na anu Ku palentahkon. Palajanjian haha aijo' madi' timbali ohapus.

²²Ku pakatuangimo na lee' i Daud posaihon-Ku tiba aha to ima-imam tulunan nu bansa Lewi, sahingga kojoo'nyo saidi' mae sumomo ahi' bone' isonibi nu ambai ka' sumomo mandala' anu aita' ilangit anu madi'mo opoko ala olekeng.”

²³Tumpu notataemo mae hi belengku,

²⁴“Pinalahatikanmo nu beleyum apaa na anu pinoto'imo nu mian mongkona aijo' Israel tiba Yehuda? Aha nontaloakonmo tukoonyo nu aha Aku nongalinmo ohu-ohua' na bansa aijo' anu pinile'an-Kumo. Mokonyo aijo' nu toa nu aha na mian anu palesayamo hi Belengku aijo' madi'mo kinokaliangan-Nyo, ka' madi'mo daagi' monganggap aha salaku sa'angu' na bansa.

²⁵Panyo susumo anu binaung-Kumo nu Aku, Tumpu na palajanjian hi sinaa tiba pihi, ka' nombaumo atulan anu mongatun langit ka' tano',

²⁶sumo aijo'mo na Aku tataap ahi' na montoongi palajanjian-Ku tiba aha lee' mae i Yakub tiba posaihon-Ku i Daud. Samian na lee' mae i Daud Ku pile'imo da mompalentah lee' mae i Abraham, i Ishak, tiba i Yakub. Aku mongkalibosimo mian anu palesayamo hi Belengku, ka' po ule'mo mompojadi aha ko kamajuan i uno nu kantumuu'an nu aha.”