Read Saluan YEREMIA 36 Bible Online

YEREMIA 36 - Saluan bible

YEREMIA 36

¹ Itaun kino opatnyomo salatan i Yoyakim anak i Yosia tinimbalimo tomundo' nu aha Yehuda, Tumpu notataemo mae hi belengku,

²“Ala na kitab sa'angu' anu ilulun, ka' tulis ikiijo' iwi-iwi' na anu pinoto'ing-Kumo hi beleyum mongkona Israel tiba Yehuda ka' mule' mongkona iwi-iwi' na bansa. Tulis iwi-iwi na potataengKu lengkat pe'e mae momonanyo Aku notataemo hi beleyum tempo'nyo i Tomundo' Yosia nompalentahmo sampe tempo uuka aiya.

³Ugaat mian nu Yehuda belentimo na mombau palabuatan anu ma'idek de aha mohongomo iwi-iwi' na balaa' anu Ku pokona hi aha. Sahingga ku ampunimo na dosa' tiba palabuatan nu aha ma'i-ma'idek aijo'.”

⁴Kalana aijo' ilagangkumo na i Barukh anak i Neria ka' nonsisikmo hi ia iwi-iwi' na anu pinoto'imo nu Tumpu hi belengku. Sahingga tinulismo i Barukh iwi-iwi' ikitab anu ilulun aijo'.

⁵Lapas aijo' pinalentah-ngKumo na ia sumo uuka, “Aku madi'mo pinobee' minsoop i Laigan nu Tumpu.

⁶Kalana aijo' de maluanyo tokamo na sinaanyo mian bapuasa'mo, beleyum tionyo ahi' mambamo mokiijo' ka' obasa'akon hoso-hoson iwi-iwi' na anu sinisikkumo hi beleyum da nu hongo nu aha iwi-iwi' apaa na anu pinoto'imo mae nu Tumpu hi belengku. Bau na aijo' itampat anu timbali nu hongo nu mian iwi-iwi' kiijo' i Laigan nu Tumpu tiba mian nu Yehuda anu lengkat mae ikota-kota' nu aha.

⁷Ihe na monsumbu' tiba jalan anu sumo aijo' aha balado'amo hi Tumpu, ka' balatobatmo madi'mo mombau sinin na palabuatan nu aha ma'i-ma'idek aijo'. Tumpu notambuha'mo hondo hi aha ka' nompoto'imo hukuman hi aha.”

⁸Sahingga binasa'akonmo i Barukh na potatae nu Tumpu i uno nu Laigan nu Tumpu, susumo anu pinalentahkonmo hi ia.

⁹Ibitu'on kino osio'nyomo ka' itaun kino olima'nyomo na i Yoyakim tomundo' nu Yehuda nompalentah mian da'isan binapuasa'mo da nu Kanonongi mae nu Tumpu. Mian anu jojoong i Yerusalem tiba aha to mia-mian anu tinokamo lengkat mae ikota-kota' Yehuda, iwi-iwi' binapuasa'mo.

¹⁰Lantas binasa'akonmo i Barukh na kitab anu ilulun aijo' iwi-iwi' na anu kiijo' ikitab apaa na anu pinoto'ingkumo ka' iwi-iwi' na mian nohongomo. Nombasa' aijo' binau kiijo' i uno nu Laigan nu Tumpu ikantoon i Gemarya anak i Salum julutulis nu negara. Kantoon aijo' binau ipopasan sasu aita' mae, koko jalan pinsoopan i Sabatan Daka' Bu'ou kiijo' i Laigan nu Tumpu.

¹¹I Mikhaya anak i Gemarya ka' makumpu i Safan nohongomo i Barukh nombasa' akon potatae nu Tumpu anu kiijo' ikitab anu ilulun aijo'.

¹²Lantas ia nambamo i laigan nu tomundo' ikantoon nu julutulis nu negara. Ikiijo' iwi-iwi' na mian anu ko pangkatnyo hau-haunyo mogombu mombisalakon apa-apaa. I Delaya anak i Semaya, i Elnatan anak i Akhbor, i Gemarya anak i Safan, i Zedekia anak i Hananya, i Eliaama te julutulis tiba to mian anu ko pangkatnyo sangga'at daagi' ikiijo'.

¹³I Mikhaya nompoto'imo hi aha iwi-iwi' na anu binasa'akonmo i Barukh kiijo' i Laigan nu Tumpu.

¹⁴Lantas aha to mia-mian anu ko pangkatnyo haha aijo' nompokaumo i Yahudi (anak i Netanya makumpu i Selemya ka' lokon i Kusyi) da mamba hi Barukh mompoto'i da nu boa mae hi aha na kitab anu ilulun anu bibinasa'akonnyomo aijo'. Sahingga binoamo i Barukh na kitab aijo'.

¹⁵“Suhang mae” na koonyo nu aha, “Basa'akon mae na kitab anu ilulun atina' hi kami”, “I Barukh nontulutimo ahi'.”

¹⁶Salatan pinokobasa'nyomo, aha nompaha didinmo samian ka' samian ka' binata-batamo, ka' nompoto'imo i Barukh, “Aiya na tionyo ahi' opoto'i mami hi tomundo'.”

¹⁷Lapas aijo' pinokilawamo nu aha, “Soba sisik mae hi kami mosia na beleyum nontulismo iwi-iwi' aiya. Pa' i Yeremia ahi' na nonsisik hi beleyum lantas tinulisje nu beleyum?”

¹⁸“Memang totu'u, toto sa'angu' na potatae anu tuli-tulis i aiya, aijo' memang lewa' mae sinisik i Yeremia hi belengku ka' tinuliskumo nu tinta ikitab anu ilulun aiya.” Sumo aijo' na i Barukh nontaami.

¹⁹“Beleyum tiba i Yeremia tionyo ahi' maninsuluk. Boli sampe nusumbu' nu mian na paninsulukan nu belemiu aijo',” na koonyo nu aha.

²⁰To mia-mian anu ko pangkatnyo haha aijo' nompo una'mo kitab anu ilulun aijo' i uno nu salipi' i Elisama, julutulis ai-aijo' lapas aijo' aha nambamo hi tomundo' ka' nompoto'imo iwi-iwi' aijo'.

²¹Lantas pinokaumo itomundo' na Yehudi mamba mongala kitab anu ilulun' aijo'. Salatan ingalanyomo kiijo' isalipi' i Elisama, i Yehudi nombasa'akonmo hi tomundo' ka' hi iwi-iwi' na mian anu ko pangkatnyo anu hau-haunyo tinjo-tinjo montikubi ia.

²²Tempo'nyo aijo' bitu'onmo kino osio'nyo, ka' itomundo' hau-haunyo suha-suhang koko pinjohuan anu kiijo' ilaigan nu tomundo' kalana tempo'mo nu bakin.

²³Salatan totolu'mo kabai opatmo nakalimat na binasa'akon i Yehudi, ingalamo itomundo' ka' sinayu'annyomo na bahagian aijo' nu piso' ise-ise' ka' ingalinnyomo i uno nu apu. Sumo aijo'mo na saja' binaunyo sampe iningkot na kitab anu ilulun ai-aijo' nopapu.

²⁴Maunyomo ahi' i Elnatan, i Delaya, tiba i Gemarya nongkakasemo da boli nu papui itomundo' na kitab anu ilulun aijo' panyo madi' ahi' ia nongala-ala aha. Maumo ahi' itomundo' kabai to mia-mian anu kopangkatnyo nonohongomo isi nu kitab aijo' madi' ahi' mongoa'i buhuk kabai pa' mompele-pele na kinyonyoa.

²⁶Itomundo' ola mule' ahi' nompalentah anaknyo momo'ane, aijo'mo i Yerahmeel tiba i Seraya anak i Azriel tiba i Salemya anak i Abdeel da mohakop aku tiba i Barukh julutulisku. Panyo kami pinosulukmo nu Tumpu.

²⁷Salatan i Tomundo' Yoyakim nompapuimo kitab anu ilulun pipinoto'ingku da tinulis i Barukh, Tumpu nompalentahmo mae aku,

²⁸da mongala kitab anu ilulun sangga'at ka' po ule' montulis anu tinulismo iwi-iwi' ikitab anu ilulun momona aijo'.

²⁹Tumpu nompalentahmo mae aku da mamba mompoto'i hi tomundo' sumo uuka, “Beleyum nompapuimo kitab anu ilulun aijo', ka' beleyum nompokilawamo hi Yeremia kadaka' ia nontulismo taalu' itomundo' Babel tokamo mae ka' mohansunimo lipu' aiya ka' mule' mompateimo miannyo anu jojoong i aiya tiba sinin na binatangnyo.

³⁰Kalana aijo' Aku, Tumpu mompoto'i hi beleyum o Tomundo' Yoyakim, madi'mo daagi' ko samian na lee' nu beleyum na mompalentah salaku tomundo' lee' mae i Daud. Bangke' nu beleyum o'alinmo isambiha'nyo ka' nu penselimo nu singit de sinaamo ka' ombun nu bakin de pihimo.

³¹Beleyum tiba lee' nu beleyum tiba to mia-mian nu beleyum anu ko pangkatnyo Ku hukumo kalana dosa'-dosa' anu binaumo nu belemiu. Ku potokamo mae hi belemiu iwi-iwi' na balaa' anu toho'mo pinoto'ing-Ku hi belemiu, kalana mau beleyum kabai mian anu jojoong i Yerusalem tiba Yehuda madi'mo nompajuli apa-apaa na anu pinoto'ing-Ku.”

³²Sahingga ingalang-Kumo na kitab anu ilulun anu pipinombolosi ka' binee'-kumo hi Barukh julutulisku. Lantas tinulisnyomo iwi-iwi' na anu pinoto'ingkumo hi ia, aijo'mo isi nu kitab anu ilulun momona ka' tinuangan mule' nu to pia-piangkuka na potuunon sangga'at anu pokakana sumo aijo'.