Read Saluan YEREMIA 39 Bible Online

YEREMIA 39 - Saluan bible

YEREMIA 39

¹Ibitu'on kinosampulu'nyomo, taun kino osio'nyomo na i Zedekia nompalentah tempo'nyo ia tinimbalimo tomundo' nu Yehuda, i Nebukadnezar tomundo' nu Babel tiba suludadunyo iwi-iwi' tinokamo mae nontumbuhi Yerusalem.

²Itanggan osio' bitu'on kino osio'nyomo, bitu'on kino opatnyomo, taun kinosampulu'nyomo ka' sa'angu' na i Tomundo' Zedekia nompalentah, pagan mesen nu kota' ihobo'akonmo nu sampobali',

³ka' Yerusalem pinatundu'mo. Jadi iwi-iwi' na mian anu kopangkatnyo hi tomundo' Babel tinokamo mae ka' lako'mo sinumuhang i Sabatan Daka' anu i Totonga'nyo. Anu aijo' hi aha daagi' ko i Nergal Sarezer, i Samgar Nebo, i Sarsekim anu mongkapalai auan nu laigan nu tomundo', i Nergal Sarezer Rabmag tiba to sulu-suludadu sangga'at.

⁴Salatan tinoamo i Tomundo' Zedekia tiba iwi-iwi' na suludadunyo, iwi-iwi' na anu jinadimo aijo' aha binala usahamo nopalai namba i Bangka'nyo nu Yordan pihi-pihi aijo'. Aha nontulumo jalan anu monsahak taman anu kiijo' ilaigan nu tomundo', lantas nosabatmo nontulu sabatan daka' anu mompahaguntang tiba ohua' na pagan mesen itampat aijo'.

⁵Panyo suludadu nu Babel nololoi'mo aha ka' nohakopmo i Zedekia i hatanyo nu Yerikho. Lantas ia binoamo hi Tomundo' Nebukadnezar ikota' Ribla idaerah Hamat, lantas binee'anmo hukuman mate.

⁶Ikota' aijo' suele to anak-anaknyo pinateanmo i ahopnyo tiba iwi-iwi' na mian anu singkap kopangkatnyo ipamalentahan Yehuda suele pinateanmo.

⁷Lapas aijo' mata i Zedekia kinubatakonmo lantas pinungumo nu lante' besak ka' binoamo i Babel.

⁸Hau-haunyo nombau aijo' aha mian nu Babel nompapumo laigan nu tomundo' tiba sinin na laigan nu aha mian da'isan ka' nohobo'akonmo ingko-ingkot na pagan mesen nu kota' Yerusalem.

⁹Ahennyo mian da'isan anu daagi' tinontuha' ikota' tiba aha anu nopalaimo ka' naninggalumo hi aha Babel, binoamo i Nebukadnezar i Babel, kamundan nu suludadu nu Babel.

¹⁰Sambagian na aha mian da'isan anu kasiasi hondo ka' anu madi' kohalata' pinojoongmo nu aha i Yehuda ka' binee'anmo ale' nu anggur tiba tano' bau pongale'an.

¹¹I Tomundo' Nebukadnezar nompalentahmo i Nebuzaradan kamundan nu suludadunyo, da mombee'i palentah sumo uuka.

¹²“Lako' mamba lio na i Yeremia ka' ojagai na ia ima-ima'. Boli opoposia na ia; bau pa' apaa na anu nu poita hi belemiu.”

¹³Jadi i Nebuzaradan tiba ua'aha na suludadu anu kopangkatnyo matangkas, i Nebusyazban ka' i Nergal-Sarezer tiba iwi-iwi' na suludadu nu Babel sangga'at,

¹⁴nongalamo aku ipopasan nu laigan nu tomundo'. Lantas aku binee'mo hi Gedalya anak i Ahikam ka' makumpu i Safan, na anu tionyo ahi' momboa aku minsusule' da madi' ko anu mompoposia. Jadi jinojoongmo na aku hi aha mian da'isan.

¹⁵Tempo'nyo aku daagi' tinalungku' kiijo' ipopasan nu laigan nu tomundo' Tumpu nompalentahmo mae aku

¹⁶da mompoto'i hi Ebed-Melekh mian nu Sudan ai-aijo', kooNyo Tumpu Anu Balakuasa hondo, Tumpu Allah Israel nompoto'imo mae sumo uuka, “Susumo anu pinoto'ing-Kumo salatanmo pe'e naipuan mae, Ku potokamo ikota' aiya na balaa', misa' ka'ima'an nu kantumuu'an. Beleyum montoaje han aijo' jadi saidi' mae.

¹⁷Panyo Aku, Tumpu na saidi' mae monjagai beleyum. Beleyum madi' mule' obee' hi to mia-mian anu okabuhuk nu beleyum.

¹⁸Beleyum madi' mule' opatei kalana Aku na momposalamatmo beleyum. Nyawa nu beleyum salamatmo kalana beleyum saja' ahi' montaha'imani Aku. Aku, Tumpu notataemo.”