Read Saluan YEREMIA 4 Bible Online

YEREMIA 4 - Saluan bible

YEREMIA 4

¹Tumpu notatae, “O mian Israel, de belemiu mongka'oho' mae minsusule' hi beleng-Ku. Alin pe'e mae na pilogot anu Ku ka'ideki aijo', ka' tulu-tulutanmo ahi' hi beleng-Ku.

²De belemiu basumpa' i uno nu sanggong-Ku ka' belemiu tumuu' ahi' sahondo-hondonyo, adin ka' madi' mombau kasala'an, saba' iwi-iwi' na bansa momoitamo mae hi belengku da Ku balakati na aha, ka' aha mompuji'mo mae Aku.”

³ Tumpu notatae hi aha mian anu jojoong i Yehuda tiba Yerusalem, “Kalajamo na tano' nu belemiu anu ma'isa kinalaja; boli monsu'an bibit itampat anu nu tumuu'i nu hemput anu ko hii'nyo.

⁴Toongi na palajanjian nu beleyum tiba Aku, Tumpu nu beleyum ka' posadiamo na butong nu beleyum da bau kapalaluan-Ku o belemiu anu jojoong i Yehuda tiba Yerusalem. De madi' ahi', saba' tambuha'-Ku saidi' mae tahahumo ka' montoyo'imo susumo apu anu madi'mo opoko ala opatei maumo ahi' pa' hihe. Iwi-iwi' aijo' mongkonamo butong nu beleyum kalana palabuatan nu beleyum ma'i-ma'idek aijo!”

⁵Puuhimo na tolompet isongko-songko na lipu'! Poloboo'mo nasa-nasa. Palentah na mian anu jojoong i Yehuda tiba Yerusalem popalaimo lako' mamba ikota-kota' anu ko bentengnyo.

⁶Potiju' na jalan mamba i Sion, puge'nyo nu Tumpu, palia-lia'mo popalai boli ola momohokot. Tumpu mompotokamo mae balaa' ka' kahansunan anu daka' hondo lengkat mae isasu utara.

⁷Sumomo ahi' singa anu nosabatmo lengkat mae ipinaninsulukannyo sumo aijo'mo mule' nambamo na anu sola' mohopu'i bansang-bansang anu tokamo mae kahanda' monsilakaimo Yehuda. Kota-kota' nu Yehuda singkapmo hansun jadimo tampat anu madi'mo nu jojoongi nu mian.

⁸Mokonyo aijo' haangmo ka' tando'imo pompusokmo hude kalung salaku tanda ko anumo sinilaka. Kalana tambuha' nu Tumpu anu kinosuhu-suhutmo ma'isa mule' naga'a lengkat mae i Yehuda.

⁹Tumpu notatae, “Toka isinaa aijo'to tomu-tomundo'tiba to mia-mian anu kopangkatnyo madi'mo daagi' moko ala mombau apa-apaa; to ima-imam langkakatanmo ka' mule' to nabi-nabi' tolokengkengmo.”

¹⁰Lantas aku notataemo, “Tumpu Anu Matangkas na Kuasanyo, Belento nongakalimo mian nu Yehuda tiba mian anu jojoong i Yerusalem! Belento notataemo, koonto saidi' mae ko kadameanmo, padahan uuka aiya nyawa mami opateimo nu bajak.”

¹¹Tempo'nyo tokamo mae mian nu Yehuda tiba mian anu jojoong i Yerusalem mohumpak mo lele koonyo mombun anu mapanas lengkat mae ipadang tampat anu mateges hau-haunyomo tobung mamba hi aha. Mombun aijo' misa' mombun biasa anu ola molahabakon ota',

¹²panyo mombun anu makansang hondo anu toka mae atas palentah nu Tumpu da mombee'imo hukuman hi aha mian anu palesayamo hi Ia.

¹³Soba toa sampobali tinokamo mae sumomo ahi' kundom. Kareta nu aha anu bau pahampate sumomo ahi' tombusisi', ajahan nu aha lebe malia' nulingkudui na bonyia nu mahap. Ado silakamo na kita! Kita mohopu'mo!

¹⁴O Yerusalem alinmo na palabuatan anu ma'idek anu lengkat ikinyonyoa nu beleyum da beleyum oposalamatmo. Sampe toka hipian na kopinnyo na pikilan toto ide-idek haha aijo' daagi' opo una' nu beleyum i uno nu kinyonyoa nu beleyum?

¹⁵Lengkat mae ikota' Dan, ka' mule' lengkat mae ibungkutnyo nu Efraim tinokamo mae na mian anu sinai mae ka' nomboamo mae lele anu ma'idek.

¹⁶Aha nompo ingatmo bansa-bansa ka' nompoto'imo mian anu jojoong ikota' Yerusalem, tukoonyo nu aha to sampo-sampobali' hau-haunyomo mae mamba lengkat mae ilipu' anu majo'on. Aha molo aisje mae nu ais nu pahampatean kona hi aha kota-kota' nu Yehuda.

¹⁷Ka' montumbuhimo Yerusalem susumo mian anu monjagai ale'. Iwi-iwi' aijo' jadi saidi' mae kalana bansa Yehuda notomuhukmo hi Tumpu. Tumpu notataemo.

¹⁸O Yehuda posi beleyumo na nompotoka mae balaa' aijo' hi posi butong nu beleyum. Bau-baunyo nu kantumuu'an nu beleyum tiba palabuatan-palabuatan nu beleyum nonsaduakonmo iwi-iwi' na kansalasala'an aijo' anu nonsusukmo kinyonyoa nu beleyum.

¹⁹Sinansalamo hondo na kinyonyoangku, madi'mo ku poko ala montahan kasansala'an. Aku madi'mo moko ala monsabaanakon butongku sulengku nangada'mo i uno nu saha'anku, kalana ihongongkumo na tolompet ingumonyi'mo, tiba ais nu pahampatean nayontokmo mae.

²⁰Balaa' me saja' tinoka mae nohansunimo songko-songko na lipu'. Monti-montiik ahi' kemahku ingideanmo, hudenyo iwi-iwi' pinaha bea-beakmo.

²¹Sampe toka hipian na aku tionyo monsakisi mian mahampate taha-tahahumo? Sampe toka hipian na tionyo aku mohongo onyi' nu tolompet anu talalomo na onyi'nyo?

²²Tumpu notatae, “Ponga' hondo na mian anu palesayamo hi beleng-Ku aijo' aha madi'mo nonsumbu' Aku. Aha sumomo ahi' to ana-anak anu mabongon hondo madi' ahi' ko anu nupisumbu-sumbu' maumo ola sangkiding. Pinandemo hondo ipalabuatan anu ma'idek, ka' madi'mo nonsumbu' palabuatan anu ma'ima'.”

²³Sasu aiya idunia tinanggalakonku, ka' tinoangku ilongkangmo ka' kinantisanmo, sasu mokiita' ilangit sinindangku, paya', madi'mo najingka.

²⁴Tinoangku na bungkutnyo tiba puge'nyo anu toto tangka-tangkas talalomo ahi' na ginayu'an.

²⁵Tinoangku madi'mo kino manusianyo, sadangkan pe'e tomonsi' singkapmo ilumahap iwi-iwi'.

²⁶Tano' anu molumba' nategesmo ka' nanggasmo to kota-kota' singkapmo ihansun, kalana Tumpu notambuha'mo hondo hi mian anu palesayamo hi Ia. (

²⁷Tumpu nompoto'i kooNyo songko-songko na dunia saidi' mae timbalimo padang tampat anu mateges panyo Ia madi' ahi' monsilakaimo iwi-iwi'.)

²⁸Tano' humangmo, langit pikatmo hondo. Tumpu notataemo, ka' madi'mo mongabali na anu tinanga'an-Nyomo. Ia nontantukanmo kaputusan ka' madi'mo daagi' tolosule' mau ola sumo pala nu tengke.

²⁹Ihongo na suludadu anu nonsake'i ajahan ka' anu mompana', talalomo hondo ihengge', sahingga nonsaduakonmo toto samian nopalaimo hahu-hahunsa'an. Sinin na kuhat pininsoopanmo nu aha, puge'nyo nu batu pinoliba'anmo nu aha. Songko-songko na kota' iliingmo, madi'mo daagi ko anu jojoong ikiijo'.

³⁰O Yerusalem beleyum pinala'ianmo ka' madi'mo daagi' moko ala mombau apa-apaa! Daagi' apaa na gunanyo mompusok baju' momea' ka' mompakei nu mosoni' tiba salaka, ka' mule' monjohiti mata nu celak? Palasuma na beleyum mompokopiani butong nu beleyum, kalana to mia-mian anu monsindua'i beleyum madi'mo daagi' mongka'ima'i beleyum. pakalaus mule' kahanda'mo nu patei nu aha na beleyum.

³¹Ihongongkumo na mongkadede'akon sumomo boune anu kahanda'mo monganak; sumomo langkoyang anu ai-aituje na monganak, sumo aijo'mo na haang nu Yerusalem anu binusokmo na mingkinyonyoa. Limanyo maha kaweanmo ka' ia mompele-pele'mo, “Silakamo na aku — aku nu pateimo nu sampobali'!”