Read Saluan YEREMIA 40 Bible Online

YEREMIA 40 - Saluan bible

YEREMIA 40

¹Tumpu notataemo mae hi belengku salatan i Nebuzaradan, kamundan nu suludadu aijo' nompobebasmo mae aku kiijo' i Rama. Aku binoamo kiijo' mae hau-haunyo pinungumo nu lante' besak tiba iwi-iwi' na mian sangga'at anu lengkat mae i Yerusalem ka' Yehuda anu hau-haunyomo binoa salaku mian anu ihakop binoa i Babel.

²Kamundan nu suludadu ai-aijo' nolagamo mae aku sausa'ku ka' nompoto'i, “Tumpu Allah nu beleyum nompoto'imo mae koo-Nyo mohansunimo lipu' aiya.

³Uuka aiya han aijo' binau-Nyomo kalana bansa nu beleyum binaladosa'mo ka' mule' madi'mo nohongo-hongo Ia.

⁴Uuka aiya ku bukaimo na lante' besak aiya da madi'mo opungu na lima nu beleyum ka' ku pobebasmo na beleyum. De beleyum mongka'oho', beleyum timbali mamba i Babel ka' aku sabole-bole mompotuu' beleyum. Panyo de beleyum madi' ahi' mamba yo madi' ahi' mongkuka. Isongko-songko na lipu' aiya beleyum bebas na mamba maumo ahi' pa' moya na nu ka'ima'i.”

⁵Ma'isa pe'e namba pinoto'imo i Nebuzaradan, “De mongka'oho', beleyumo timbalimo minsusule' hi Gedalya anak i Ahikam tiba makumpu i Safan, anu ihangkatmo i tomundo' Babel binau gubernur nu kota-kota' Yehuda. Beleyum timbali jojoong tiba ia hi aha mian da'isan kabai mamba maumo pa' moya na kalambanan nu beleyum anu nu ka'ima'i nu beleyum.” Lantas binee'annyomo mae mantu anu okaan tiba palasen hi belengku ka' nompobee'mo aku namba.

⁶Aku nambamo hi Gedalya kiijo' mae i Mizpa, ka' jinojoongmo hi ia hi aha mian da'isan anu pinojoongmo ilipu' Yehuda.

⁷ Itomundo' Babel nohangkatmo i Gedalya binau gubernur kiijo' i Yehuda da mompalentah iwi-iwi' mian anu daagi' jinojoong i Yehuda, aijo'mo aha to mia-mian anu kasiasi hondo. Sambagian na to sulu-suludadu tiba anak buanyo nu suludadu Yehuda anu madi' tina aluk hi Babel, nohongomo i Gedalya aijo' ihangkatmo.

⁸Sahingga i Ismael anak i Netanya, i Yohanan anak i Kareah, i Seraya anak i Tanhumet, tiba to ana-anak i Efai lengkat mae i Netofa ka' mule' i Yezanya lengkat mae i Maakha nambamo tiba to mia-mian nu aha hi Gedalya kiijo' i Mizpa.

⁹I Gedalya notataemo hi aha, “Belemiu madi' palalu mabuhuk ka' ta'aluk hi aha mian nu Babel. Jojoongmo ilipu'to aiya, ka' timbalimo ahi' botuan i tomundo' Babel. Ku taha'imani belemiu saidi' mae jadi' ma'ima'.

¹⁰Jojoongmo ikota-kota' anu nu ka'ima'i nu belemiu ka' pongalamo ka' mule' pompo una'mo anggur, bua' nu kau' anu okaan tiba lanya' nu zaitun. Aku suele jojoongmo i Mizpa ka' timbalimo wakin nu mian da'isan de aha mian nu Babel tokamo mae.”

¹¹Tempo'nyo aitu iwi-iwi' na mian nu Israel anu jojoong ilipu' Moab, Amon, Edom, tiba ilipu sangga'at nohongomo mae taalu' i tomundo' Babel nompobee'mo sambagian na aha mian nu Israel jojoong i Yehuda ka' mule' taalu' ia nohangkatmo i Gedalya binau gubernur.

¹²Kalana aijo' pinala'ianmo nu aha na tampat anu pinongga'a-ga'atakonan aha lantas ninsusule'mo i Yehuda. Aha nambamo hi Gedalya kiijo' i Mizpa, ka' nongalamo manjoo' hondo na anggur ka' bua' nu kau' anu okaan.

¹³Lapas aijo', i Yohanan tiba to sulu-suludadu anu madi' tina aluk hi sampobali tinokamo mae hi Gedalya kiijo' i Mizpa

¹⁴ka' notatae, “Pa' sinumbu'mo nu beleyum na i Baalis tomundo' nu aha Amon nompalentahmo i Ismael da mompateimo beleyum?” Panyo madi' pinalesaya i Gedalya na potatae nu aha aijo'.

¹⁵Lantas pinohowinimo i Yohanan na nompoto'i hi Gedalya, “Sahanyo mambamo ku patei na i Ismael; madi' ko anu monsumbu' pa' ihe na nompatei. Kadaka' ia opopilayamo mompatei beleyum? Aijo' timbali mongahenakon iwi-iwi' na mian nu Yehuda anu sinihukmo i aiya hi beleyum, moga'a-ga'atmo mule', ka' mule' han aijo' mo mohansunimo ingko-ingkot na mian da'isan anu daagi' tinontuha' i Yehuda.”

¹⁶Panyo tinaaman i Gedalya, “Boli! I Gedalya susumo kooyum itina' madi' totu'u!”