Read Saluan YEREMIA 41 Bible Online

YEREMIA 41 - Saluan bible

YEREMIA 41

¹ Ibitu'on kinopopitu'nyomo taunmo ai-aijo' i Ismael anak i Netanya ka' makumpu i Elisama nambamo tiba aha sampulu' na mian nokiijo' i Mizpa da singkabot tiba i Gedalya. (I Ismael te lee' mae nu tomundo', sala' samian na suludadu anu ma' tangkas na pangkatnyo i uno nu kalaja'an). Hau-haunyo aha iwi-iwi' nongkaanmo,

²i Ismael tiba aha sampulu' aijo' nongkeatmo bajak nu aha ka' nompateimo i Gedalya, gubernur anu ihangkat nu aha mian nu Babel.

³I Ismael nompatei mule' ahi' iwi-iwi' na aha mian nu Yehuda anu kiijo' tiba i Gedalya i Mizpa, ka' iwi-iwi' na suludadu nu aha Babel anu pinopadonnyo daagi' ikiijo'.

⁴Dodododopnyo ma'isa pe'e sinumbu' nu mian na i Gedalya pinatean,

⁵tinokamo mae na mian aha ualumpulu' lengkat mae i Sikhem, Silo, tiba Samaria. Aha nongkiismo mae jangkut nu aha, nonggea-geatmo mae baju nu aha ka' nongkudulimo mae butong nu aha. Aha nomboa mae gandum tiba kamangian da osombahkon i Laigan nu Tumpu.

⁶Sahingga nosabatmo na i Ismael lengkat mae i Mizpa ka' nambamo nonsingkaboti aha. Hau-haunyo humang, ia notataemo, “Imbo' da mamba montoa i Gedalya.”

⁷Lia-lia' salatan aha tinokamo ikota', i Ismael tiba aha to mia-mian sangalunyo nompateimo aha. Panyo aha sampulu' na sangalu nu aha nompoto'imo hi Ismael, “Boli opatei mae na kami! Kami daagi' ko gandum ohua' na ngahannyo, ka' mule' lanya' nu zaitun ka' juu' nu uani'. Iwi-iwi' aijo' pinosuluk mami isambiha' nu kota'.” Kalana aijo' madi' pinatean i Ismael na aha panyo sangga'at pinateannyomo ka' bangke' nu aha ingalinmo i uno nu bubung.

⁹Bubung aijo', bubung daka' anu binau i Tomundo' Asa tempo'nyo ia tinumbuhanmo i Baesa tomundo' nu Israel.

¹⁰Lapas aijo' i Ismael nohakopmo to lalangkoyang anak nu tomundo' ka' iwi-iwi' na mian anu daagi' i Mizpa anu binee'mo i Nebuzaradan da nu jagai i Gedalya. I Ismael nomboamo aha tiba ia hingga-hinggat nambamo i daerah Amon.

¹¹I Yohanan anak i Kareah tiba iwi-iwi' na suludadu anu nambamo hingga-hinggat tiba ia nohongomo palabuatan ma'idek i Ismael.

¹²Sahingga aha tiba suludadu nu aha nambamo nololoi' ia ka' sinampamo nu aha na ia ikolam daka-daka' Gibeon,

¹³Nontoa i Yohanan tiba suludadu haha aijo tinokamo mae to mia-mian anu ihakop i Ismael ilame'mo,

¹⁴lantas nobalikmo ka' nopalai nonsingkaboti gombuan nu mian i Yohanan.

¹⁵Panyo i Ismael tiba aha ualu' na sangalunyo madi' pinoko hakop ka' nopalaimo namba ilipu' Amon.

¹⁶Lapas aijo' i Yohanan tiba to sulu-suludadunyo anu toto tangka-tangkas na pangkatnyo nomposihukmo to sulu-suludadunyo, boune, to ana-anak tiba to paga-pagawe nu laigan nu tomundo' anu ihakop ka' binoa mae i Ismael salatan pinoko pateannyomo na i Gedalya.

¹⁷Aha iwi-iwi' nabuhukmo hi mian nu Babel kalana i Ismael nompateimo i Gedalya anu ihangkatmo nu tomundo' Babel binau gubernur ilipu' aijo'. Jadi aha nopalaimo namba i Mesir. Hau-haunyo aha ilumajang tinokamo ilotonga'nyomo nu kojo'onnyo nu kalambanan aha sinonso'mo binelenti i Kimham madi'mo majo'on i Betlehem.