Read Saluan YEREMIA 47 Bible Online

YEREMIA 47 - Saluan bible

YEREMIA 47

¹ Ma'isa pe'e itomundo' nu Mesir nontumbuhi Gaza, Tumpu nompoto'imo mae hi belengku apaa na jadi saidi' mae hi lipu' nu Filistin.

²Tumpu notatae, “Toa na uee no ilimo lengkat mae isasu utara ka' nosawe'mo susumo uee anu ingiaba'mo ka' nonganjuhakonmo lipu' tiba apaa na anu kiijo' i unonyo. Mian naha loboo'anmo na momoita tulung, ka' iwi-iwi' na mian da'isan humangmo.

³Aha mohongomo galupak nu ajahan, tiba daladak nu kareta ka' mule' gelegek nu bolanyo. Mian to tu'a-tu'anyo lusekmo na butong nu aha ka' madi'mo daagi' sola' montutugi to ana-anak nu aha.

⁴Tinokamo na tempo'nyo bansa Filistin osilakaimo ingko-ingkot sahingga Tirus tiba Sidon madi'mo daagi' ko anu montulungi. Aku, Tumpu, monsilakaimo iwi-iwi' na aha mian nu Filistin anu daagi' tinontuha' lengkat mae i Kreta.

⁵Aha mian nu Gaza tinokanmo nu kasusa'an anu daka' hondo; mian anu jojoong i Askelon nomohokotmo. Sampe toka hipian na kopinnyo na aha mian nu Filistin anu daagi' tinontuha' me saja' susa' na kinyonyoanyo?

⁶Belemiu moloboo', ‘Sampe toka hipian na kopinnyo na beleyum montumbuhi, o, bajak nu Tumpu? Pinsusule'mo isalungum ka'jojoongmo kiijo' mae, bolimo daagi' mompoposia!’

⁷Panyo nu poko ala mule' na ia madi' mompoposia, de maluanyo Ku palentahmo da mambamo montumbuhi Askelon tiba mian anu jojoong isonibi nu ambai?”